ນວ ສະຫລຸບວຽກງານພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງ
ຂປລ. ນະຄອນຫລວງວຽງຈັນ (ນວ) ຈັດກອງປະຊຸມສະຫລຸບວຽກງານ ກໍ່ສ້າງຮາກຖານການ ເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ປະຈຳປີ 2023-2024 ແລະ ວາງທິດທາງແຜນການ ປີ 2025 ໃນວັນທີ 1 ເມສາ 2025 ໂດຍການເປັນປະທານຂອງ ທ່ານ ອານຸພາບ ຕຸນາລົມ ເລຂາທິການສູນກາງພັກ ເລຂາຄະນະພັກ, ປະທານສະພາປະຊາຊົນ ນວ, ມີ ຮອງເລຂາຄະນະພັກ ນວ, ຮອງເຈົ້າຄອງ, ບັນດາຄະນະພັກ ນວ, ເຈົ້າເມືອງ, ຫົວໜ້າ, ຮອງຫົວໜ້າພະແນກການ, ອົງການທຽບເທົ່າຂັ້ນ ນວ ແລະ ພະນັກງານຂະແໜງການກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ, ທ່ານ ນາງ ສຸມາລີ ທໍາມະວົງ ຫົວໜ້າພະແນກພາຍໃນ ນວ ໄດ້ໃຫ້ຮູ້ວ່າ: ວຽກງານພັດທະນາຊົນນະບົດ ແກ້ໄຂຄວາມທຸກຍາກທົ່ວ ນວ ປະກອບມີ 2 ຈຸດສຸມ ເພື່ອສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ ຄື: ຈຸດສຸມບ້ານໃຫຍ່ນາຈະເລີນ, ຈຸດສຸມບ້ານຊໍ້ ເມືອງສັງທອງ, ປັດ ຈຸບັນ ຜ່ານການປະເມີນຄືນໃນປີ 2024 ບັນລຸມາດຖານ 100% ແລະ ນໍາສະເໜີທ່ານເຈົ້າຄອງ ນວ ອະນຸມັດຂໍ້ຕົກລົງ ເພື່ອຮັບຮອງ, ພ້ອມກັນນີ້ໄດ້ກໍານົດເພີ່ມ 1 ຈຸດສຸມພັດທະນາລະຫວ່າງສູນກາງ ແລະ ທ້ອງຖິ່ນ ຄື: ບ້ານນາໂງມເກົ່າ-ບ້ານນາໂງມໃໝ່-ບ້ານນາຕານ ເມືອງໄຊທານີ, ຜ່ານການປະເມີນບັນລຸ 14 ມາດຖານ, ຍັງບໍ່ທັນບັນລຸ 2 ມາດຖານ ຄື ມາດຖານທີ 8 ບໍ່ມີສູນລວມບໍລິການເຕັກນິກກະສິກໍາ ແລະ ມາດຖານທີ 9 ບໍ່ມີຫົວໜ່ວຍທະນາຄານ ແລະ ການເງິນຈຸລະພາກ.
ຜ່ານການປະເມີນຜົນຕາມມາດຖານພົ້ນທຸກ ແລະ ມາດຖານການພັດທະນາຕາມດໍາລັດ 348/ລບ ນະຄອນຫລວງວຽງຈັນ ມີຄອບຄົວພົ້ນທຸກ 155.493 ຄອບຄົວ, ເທົ່າກັບ 99,43%, ຄອບຄົວທຸກຍາກ ມີ 899 ຄອບຄົວ, ເທົ່າກັບ 0,57%, ຄອບຄົວພັດທະນາ ມີ 142.698 ຄອບຄົວ, ເທົ່າກັບ 91,24%, ຄອບຄົວບໍ່ພັດທະນາ ມີ 10.268 ຄອບຄົວ, ເທົ່າກັບ 6,57%, ບ້ານພັດທະນາ ມີ 379 ບ້ານ, ເທົ່າກັບ 78,79%, ຍັງບໍ່ບັນລຸ 102 ບ້ານ, ເທົ່າກັບ 21,21%, ມາຮອດປັດຈຸບັນ ສາມາດຮັບຮອງເມືອງພົ້ນທຸກສໍາເລັດແລ້ວ 9 ເມືອງ, ເທົ່າກັບ 100%, ໃນເດືອນທັນວາ 2024 ໄດ້ຈັດພິທີຮັບຮອງເອົາເມືອງປາກງື່ມ ເປັນເມືອງພົ້ນທຸກ. ພ້ອມນີ້, ນວ ຍັງໄດ້ ຮັບໃບຢັ້ງຢືນຈາກທ່ານນາຍົກ ລັດຖະມົນຕີ ເພື່ອຮັບຮອງເມືອງເຂັ້ມແຂງຮອບດ້ານ ຕາມດໍາລັດ 348/ລບ ໄດ້ 5 ເມືອງ ຄື: ເມືອງຈັນທະບູລີ, ສີສັດຕະນາກ, ໄຊເສດຖາ, ສີໂຄດຕະບອງ ແລະ ເມືອງຫາດຊາຍຟອງ.
ສະເພາະແຜນການ ປີ 2025 ຄາດຄະເນໃນເດືອນມີນາ ໃຫ້ສໍາເລັດ 2 ເມືອງຄື: ເມືອງສັງທອງ ແລະ ເມືອງນາຊາຍທອງ, ເດືອນກໍລະກົດ ຄາດຄະເນໃຫ້ໄດ້ຮັບຮອງອີກ 2 ເມືອງຄື: ເມືອງໄຊທານີ ແລະ ເມືອງປາກງື່ມ, ຮອດທ້າຍປີ 2025 ໃຫ້ສາມາດປະກາດເມືອງເຂັ້ມແຂງຮອບດ້ານ ຕາມດໍາລັດ 348/ລບ ໃຫ້ສໍາເລັດ 100% ແລະ ສາມາດປະກາດບ້ານໃຫຍ່ ເປັນຕົວເມືອງນ້ອຍໃນຊົນນະບົດ ໃຫ້ໄດ້ 2 ບ້ານຄື: ບ້ານໃຫຍ່ນາຈະເລີນ ແລະ ບ້ານຊໍ້ ເມືອງສັງທອງ.
ໃນໂອກາດດຽວກັນ, ຍັງໄດ້ມອບໃບຢັ້ງຢືນໃຫ້ພະນັກງານທີ່ລົງຮາກຖານການເມືອງ ພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ, ມອບໃບຢັ້ງຢືນຮັບຮອງເມືອງພົ້ນທຸກ 8 ເມືອງ ແລະ ເມືອງເຂັ້ມແຂງຮອບດ້ານ 5 ເມືອງ ໃຫ້ກຽດມອບໂດຍ ທ່ານ ອານຸພາບ ຕຸນາລົມ ແລະ ສືບຕໍ່ແຕ່ງຕັ້ງພະນັກງານຫັນລົງຮາກຖານການເມືອງ ພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງຊຸດໃໝ່ ປະຈໍາປີ 2025 ຕື່ມອີກ.
ຂໍ້ມູນ-ພາບ: ວຽງຈັນໃໝ່