ເປີດງານສັບປະດາດີຈິຕອນ 2025
ຂປລ. ກະຊວງ ເຕັກໂນໂລຊີ ແລະ ການສື່ສານ ຈັດງານສັບປະດາດິຈິຕອນ (Digital Week) 2025 ພາຍໃຕ້ຄໍາຂວັນ “ພັດທະນາພື້ນຖານໂຄງລ່າງດີຈິຕອນ ຂອງ ສປປ ລາວ ໃຫ້ເຂັ້ມແຂງ ແລະ ຍືນຍົງ”ໃນວັນທີ 2-6 ເມສາ 2025 ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ມີລັດຖະມົນຕີ, ຮອງລັດຖະ ມົນຕີ, ເຈົ້າແຂວງ, ຮອງເຈົ້າແຂວງ, ພ້ອມດ້ວຍພາກລັດ ແລະ ເອກະຊົນ ເຂົ້າຮ່ວມ.
ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ ໄດ້ກ່າວວ່າ: ປັດຈຸບັນ, ເຕັກໂນໂລຊີດີຈິຕອນ ໄດ້ຮັບການພັດທະນາດ້ວຍຈັງວະ ທີ່ກ້າວກະໂດດຢ່າງໄວວາ ແບບບໍ່ເຄີຍມີມາກ່ອນ ແລະ ໄດ້ກາຍເປັນກຳລັງຂັບເຄື່ອນ ການພັດທະນາເສດຖະກິດ-ສັງຄົມ ຂອງມວນນະມຸດ ແລະ ເປັນປັດໃຈທີ່ສໍາຄັນໃຫ້ຄົນເຮົາສາມາດ ເຊື່ອມຈອດກັນໂດຍບໍ່ມີພົມແດນ ຕອບສະໜອງໄດ້ຄວາມວ່ອງໄວ, ຄວາມຖືກຕ້ອງ, ຊັດເຈນ ແລະ ທັນການ. ຍິ່ງໄປກວ່ານັ້ນ, ການພັດທະນາເຕັກໂນໂລຊີໃໝ່ ໂດຍສະເພາະ ເຕັກໂນໂລຊີປັນຍາປະດິດ ໄດ້ເປັນກະແສຟອງໃໝ່ຂອງການປະຕິວັດໃນຂະແໜງ ການ ແລະ ທຸກຂົງເຂດ ໃນທົ່ວໂລກ ເຊິ່ງ ສປປ ລາວ ກໍບໍ່ອາດຈະຫລີກລ່ຽງໄດ້. ດັ່ງນັ້ນ, ເພື່ອຫັນປ່ຽນການພັດທະນາປະເທດເຮົາ ໃຫ້ກ້າວໄປສູ່ຄຸນນະພາບໃໝ່. ສປປ ລາວ ກໍໄດ້ຮັບການພັດທະນາໃນຫລາຍດ້ານ, ຫລາຍຂົງເຂດ ເລີ່ມຈາກພາກລັດ ກໍໄດ້ຈັດຕັ້ງຜັນຂະຫຍາຍຫລາຍແຜນງານ ແລະ ໂຄງ ການ ໃນການພັດທະນາເຕັກໂນໂລຊີ ສຳລັບການບໍລິຫານ ແລະ ບໍລິການລັດ ແລະ ພາກເອກະຊົນ ກໍໄດ້ຫັນການບໍລິຫານຜ່ານອອນລາຍຫລາຍຂຶ້ນ. ສ່ວນປະຊາຊົນ ກໍຮູ້ນຳໃຊ້ເຕັກໂນໂລຊີໃໝ່ ເຂົ້າໃນຊີ ວິດປະຈຳວັນ ນັບມື້ນັບກວ້າງຂວາງ. ເຖິງຢ່າງໃດກໍຕາມ ທຸກພາກສ່ວນຕ້ອງໄດ້ຮ່ວມເອົາໃຈໃສ່ຕື່ມ ໃນການເລັ່ງພັດທະນາ ແລະ ການນຳໃຊ້ເຕັກໂນໂລຊີ ໃຫ້ສອດຄ່ອງ ແລະ ຖືກຕ້ອງກັບແຜນພັດທະນາ ແລະ ລະບຽບການ. ໃນຍຸກທີ່ເຕັກໂນໂລຊີຂັບເຄື່ອນໂລກຢ່າງໄວວາ, ການຫັນເປັນດີຈິຕອນ ບໍ່ແມ່ນທາງເລືອກ ແຕ່ເປັນຄວາມຈຳເປັນຢ່າງພາວະວິໄສ ໃນການພັດທະນາເສດຖະກິດ-ສັງຄົມຂອງລາວ. ສະ ນັ້ນ, ລັດຖະບານ ໄດ້ກໍານົດຍຸດທະສາດການຫັນເປັນດີຈິຕອນແຫ່ງຊາດ ໂດຍອີງໃສ່ 3 ເສົາຄໍ້າຍຸດທະສາດຫລັກ ຄື: ລັດຖະບານດີຈິຕອນ, ເສດຖະກິດດີຈິຕອນ ແລະ ສັງຄົມດີຈິຕອນ.
ງານສັບປະດາດີຈິຕອນ ໄດ້ຈັດໃຫ້ມີຫລາຍສີສັນ ແລະ ຫລາຍກິດຈະກຳທີ່ສຳຄັນ ເປັນຕົ້ນແມ່ນ ເວທີສຳມະນາ ເພື່ອແລກປ່ຽນຄວາມຮູ້ດ້ານດີຈິຕອນ ໂດຍມີບັນດາລັດຖະມົນຕີ, ຮອງລັດຖະມົນຕີ ແລະ ນັກວິທະຍາກອນທີ່ມີຄວາມຊຳນານ ແລະ ປະສົບການສູງທັງພາຍໃນ ແລະ ຕ່າງປະເທດ ເປັນຜູ້ບັນລະຍາຍ ໃນຫົວຂໍ້ຕ່າງໆ ໂດຍສະເພາະ ເຕັກໂນໂລຊີ AI ແລະ Robotic ເຊິ່ງການຝຶກອົບຮົມ ແລະ ສໍາມະນາດັ່ງກ່າວເປີດໂອກາດ ໃຫ້ທຸກພາກສ່ວນໄດ້ເຂົ້າຮ່ວມ ໂດຍບໍ່ເສຍຄ່າໃຊ້ຈ່າຍໃດໆ. ນອກຈາກນີ້, ຍັງມີການສະແດງສິນຄ້າ ແລະ ນະວັດຕະກຳ ທາງດ້ານດີຈິຕອນ, ການຄັດເລືອກຜະລິດຕະພັນຂອງຄົນລາວ ທີ່ດີເດັ່ນທາງດ້ານດີຈິຕອນ ເພື່ອເຂົ້າແຂ່ງຂັນໃນເວລາທີສາກົນ ໂດຍສະເພາະການແຂ່ງຂັນປະຈຳປີລະດັບພາກພື້ນ, ການແຂ່ງຂັນຂຽນໂປຣແກຣມ ຫລື ການວັດຄວາມສາມາດຂອງນັກປະດິດຄົນລາວ, ຈັດກອງປະຊຸມສອງຝ່າຍ ກັບບັນດາປະເທດຮ່ວມຄູ່ພັດທະນາ ເພື່ອປຶກສາຫາລືການພັດທະນາເຕັກໂນໂລຊີໃໝ່ ຮ່ວມກັນ ແລະ ນຳໃຊ້ສຳລັບປະເທດລາວ.
ຂ່າວ: ກິດຕາ