ປະເທດ ບັງກລາເທດ
ເນື່ອງໃນໂອກາດ ວັນຊາດຂອງປະເທດ ບັງກລາເທດ(Bangladesh) ຫລື ຊື່ທາງການຄື ສາທາລະນະລັດປະຊາຊົນ ບັງກລາເທດ (People's Republic Of Bangladesh) ໃນວັນທີ 24 ມີນາ, ຊຶ່ງເປັນ ປະເທດ ໃນອາຊີໃຕ້, ມີຊາຍແດນທິດເໜືອ, ທິດຕາເວັນຕົກ ແລະ ທິດຕາເວັນອອກ ຕິດກັບ ອິນເດຍ ສ່ວນທິດໃຕ້ຕິດກັບ ອ່າວເບງກອນ ແລະ ຕາເວັນອອກສ່ຽງໃຕ້ ຕິດກັບ ມຽນມາ. ນະຄອນຫລວງ ຊື່ວ່າ: ດາກາ(Dakha); ກວມເອົາ ເນື້ອທີ່ທັງໝົດ 147.570 ກິໂລຕາແມັດ, ມີປະຊາກອນ 171,5 ລ້ານຄົນ (ໃນປີ 2023); ໃຊ້ພາສາທາງການ ຄື ພາສາເບງກາລີ(Bangali) ແລະ ພາສາອັງກິດ; ປະຊາຊົນສ່ວນໃຫຍ່ ນັບຖືສາສະໜາ ອິສລາມ 98,8%, ຮິນດູ 9,6% ອື່ນໆ 0,9%; ໃຊ້ສະກຸນເງິນ ຕາກາ(Taka).
ເສດຖະກິດຂອງ ບັງກລາເທດ ຂຶ້ນກັບ ການປູກຝັງ ເປັນສ່ວນໃຫຍ່ ເນື່ອງຈາກ ຕັ້ງຢູ່ອ່າວເບງກອນ ມະຫາສະໝຸດອິນເດຍ ເຮັດໃຫ້ໄດ້ຮັບອິດທິພົນລົມມໍລະສຸມ ຈາກ ມະຫາສະໝຸດ ອິນເດຍ ໂດຍສະເພາະ ຂະແໜງການກະສິກໍາ-ຫັດຖະກໍາ ເຊັ່ນ: ການຕຳແຜ່ນສົ່ງອອກ ຈັດເປັນອັນດັບ 2 ຂອງໂລກ. ໂດຍລວມຍອດຜະລິດຕະພັນພາຍໃນ(GDP) 437,4 ຕື້ໂດລາສະຫະລັດ (ໃນປີ 2023), ລາຍໄດ້ສະເລ່ຍຕໍ່ຫົວຄົນ 2.551 ກວ່າໂດລາສະຫະລັດຕໍ່ປີ, ອັດຕາການຂະຫຍາຍຕົວ ເສດຖະກິດ 5,8%ຕໍ່ປີ. ສ່ວນສິນຄ້າສົ່ງອອກ ລວມມີ ເຄື່ອງນຸ່ງ ສຳເລັດຮູບ, ໜັງສັດ, ປາ ແລະ ອາຫານທະເລແຊ່ແຂງ, ເຄື່ອງໜັງ, ເກີບ, ຢາສູບ. ສ່ວນສິນຄ້ານຳເຂົ້າ ເປັນປະເພດ ເຄື່ອງມື, ເຄື່ອງກົນຈັກ ແລະ ຊິ້ນສ່ວນປະກອບ, ຜະລິດຕະພັນເຄມີ, ເຫລັກ ແລະ ເຫລັກກ້າ, ອຸປະກອນ ເອເລັກໂຕຣນິກ ແລະ ອື່ນໆ. ປະເທດຄູ່ຮ່ວມມື ການຄ້າ ທີ່ສຳຄັນ ເປັນຕົ້ນ: ສ.ອາເມລິກາ, ເຢຍລະມັນ, ອັງກິດ, ຝຣັ່ງ, ແອັດສະປາຍ, ຈີນ, ອິນເດຍ ແລະ ສິງກະໂປ ຕາມລຳດັບ. ນອກຈາກນັ້ນ ຍັງມີສະຖານທ່ີທ່ອງທ່ຽວສວຍງາມ ຫລາຍແຫ່ງບໍ່ວ່າຈະເປັນ ແຫລ່ງທ່ອງທ່ຽວທິວທັດທຳມະຊາດ, ວັດທະນະທຳ, ສະຖາປັດຕະຍະກຳ ແລະ ອື່ນໆອີກ ຢ່າງຫລວງຫລາຍ./.
ໂດຍ:ດາວັນ
