ງານວາງສະແດງການນຳເຂົ້າສາກົນຈີນຄັ້ງທີ 8
ຂປລ.ວິທະຍຸ ສາກົນແຫ່ງ ສປ ຈີນ, ວັນທີ 16 ມີນານີ້, ອົງການ ວາງສະແດງ ການນຳເຂົ້າ ສາກົນຈີນ ແຈ້ງໃຫ້ຮູ້ວ່າ: ວຽກງານກະກຽມ ລາຍການຕ່າງໆ ຂອງງານວາງສະແດງ ການນຳເຂົ້າ ສາກົນຈີນ ຄັ້ງທີ 8 ພວມດຳເນີນໄປຢ່າງໝັ້ນທ່ຽງ, ໃນນັ້ນ ເນື້ອທີ່ການເຊັນສັນຍາ ກ່ຽວກັບ ເຂດວາງສະແດງ ຂອງວິສາຫະກິດ ໄດ້ລື່ນກາຍ 220.000 ຕາແມັດ ເຊິ່ງກວມເອົາ ຫລາຍກວ່າ 60% ຂອງເນື້ອທີ່ ແຜນການທີ່ວາງໄວ້.ງານວາງສະແດງ ການນຳເຂົ້າ ສາກົນຈີນ ຄັ້ງທີ 8 ຈະສືບຕໍ່ຮັກສາເນື້ອທີ່ຂະໜາດໃຫຍ່ ພິເສດຄື 360.000 ຕາແມັດ, ຍົກລະດັບເຂດສຳຜັດປັນຍາປະດິດ, ສ້າງເຂດວາງສະແດງສະເພາະກ່ຽວກັບ ຮູບແບບການອອກເດີນທາງ ໃນອະນາຄົດ, ວາງສະແດງເສດຖະກິດ ການບິນອາກາດຕ່ຳ ແລະ ຫົວຂໍ້ໃໝ່ອື່ນໆ ໂດຍປະສານສົມທົບກັບ ທ່າອ່ຽງນຳໜ້າ ຂອງເຕັກໂນໂລຊີ ພ້ອມທັງ ໄດ້ເພີ່ມເຂດວາງສະແດງ “ຕົວເມືອງທີ່ມີສະເໜ່” ໂດຍໄດ້ເຊື້ອເຊີນຕົວເມືອງ ຈາກຕ່າງປະເທດ ມາວາງສະແດງວັດທະນະທຳ ທີ່ເປັນເອກະລັກພິເສດ, ຊຸກຍູ້ການແລກປ່ຽນ ດ້ານວັດທະນະທຳ. ໃນຂະນະດຽວກັນ, ງານວາງສະແດງການນຳເຂົ້າສາກົນຈີນ ໃນຄັ້ງນີ້ ຈະວາງສະແດງຜະລິດຕະພັນ ທີ່ເປັນເອກະລັກພິເສດ ທີ່ມີຄຸນນະພາບສູງຂອງປະເທດ ກຳລັງພັດທະນາ ໃຫ້ຫລາຍຂຶ້ນກວ່າເກົ່າ, ຊ່ວຍເຫລືອວິສາຫະກິດຂະໜາດກາງ-ນ້ອຍ ຂອງປະເທດເຫລົ່ານີ້ເຂົ້າຮ່ວມ ເພື່ອເຮັດໃຫ້ ວິສາຫະກິດ ດັ່ງກ່າວ ສາມາດປັບຕົວເຂົ້າກັບຄວາມຕ້ອງການຂອງຕະຫລາດໃນປະເທດຈີນ ຢ່າງວ່ອງໄວ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ