ອິນໂດເນເຊຍ ເພີ່ມງົບຊຸກຍູ້ວິໄຈ ໃນມະຫາວິທະຍາໄລ ລະດັບ 1%
ຂປລ. ສຳນັກຂ່າວ ຊິນຮວາ ຂອງ ສປຈີນ ລາຍງານ ຈາກ ນະຄອນຫລວງ ຈາກາຕາ ປະເທດ ອິນໂດເນເຊຍ ເມື່ອບໍ່ດົນມານີ້, ທ່ານ ໄບຣອັນ ຢູລິຍາຣໂຕ ລັດຖະມົນຕີ ອຸດົມສຶກສາ ວິທະຍາສາດ ແລະ ເຕັກໂນໂລຊີ ຂອງອິນໂດເນເຊຍ ກ່າວວ່າ: ລັດຖະບານ ຕັ້ງເປົ້າເພີ່ມງົບປະມານ ການວິໄຈ ສຳລັບ ມະຫາວິທະຍາໄລເປັນ 1% ຂອງລວມຍອດ ຜະລິດຕະພັນ ພາຍໃນ ປະເທດ (ຈີດີພີ) ເພີ່ມຂຶ້ນຢ່າງຫລວງຫລາຍ ຈາກອັດຕາສ່ວນພຽງ 0,3% ເມື່ອປີ 2024.
ນອກນີ້ລັດຖະບານ ອິນໂດເນເຊຍ ຍັງເນັ້ນໜັກ ຄວາມມຸ້ງໝັ້ນຈະປັບປຸງ ສະຫວັດດີການວິໄຈ ຖືເປັນສິ່ງສຳຄັນສຳລັບ ການຟື້ນຟູ ເສດຖະກິດ ແລະ ອຸດສາຫະກຳຂອງ ອິນໂດເນເຊຍ ແຕ່ການບັນລຸເປົ້າໝາຍ 1% ບໍ່ສາມາດເກີດຂຶ້ນໄດ້ທັນທີ. ຂະນະດຽວກັນ ທ່ານ ໄບຣອັນ ຢູລິຍາຣໂຕ ໄດ້ເນັ້ນເຖິງ ຄວາມພະຍາຍາມ ຂອງ ພາກລັດ ໃນການເສີມສ້າງການວິໄຈ ແລະ ການສ້າງສັນ ນະວັດຕະກຳ ໃນມະຫາວິທະຍາໄລ ຂອງ ປະເທດ ຊຶ່ງເປັນ ເປົ້າໝາຍ ສຳຄັນ ໃຫ້ແກ່ການປ່ຽນຜ່ານ ມະຫາວິທະຍາໄລ ເປັນສູນກາງ ສ້າງສັນ ນະວັດຕະກຳ ແລະ ການພັດທະນາ ຜູ້ມີຄວາມຮູ້ ຄວາມສາມາດ./