ປະລິມານນໍ້າໃນທະເລ ຢູ່ ກາຊັກສະຖານ ເພີ່ມຂຶ້ນເກືອບ 2 ເທົ່າ
ຂປລ. ສຳນັກຂ່າວ ເອເອຟພີ ລາຍງານ ຈາກເມືອງ ອັລມາຕີ ປະເທດ ກາຊັກສະຖານ ເມື່ອວັນທີ 14 ມັງກອນ 2025, ກາຊັກສະຖານ ເປີດເຜີຍວ່າ ປະລິມານນໍ້າໃນທະເລ ອາຣັລ ທາງພາກເໜືອຂອງປະເທດ ເພີ່ມຂຶ້ນເກືອບ 2 ເທົ່າ ນັບຕັ້ງແຕ່ ປີ 2008 , ໂດຍ ທະເລອາຣັລ ຕັ້ງຢູ່ ລະຫວ່າງ ອຸດສະເບກິດສະຖານ ກັບ ກາຊັກສະຖານ ເຄີຍເປັນທະເລສາບ ທີ່ມີຂະໜາດໃຫຍ່ ເປັນອັນດັບ 4 ຂອງໂລກ ໂດຍມີຄວາມເລິກ 40 ແມັດ ແລະ ກວມເນື້ອທີ່ 68.000 ກິໂລຕາແມັດ ກ່ອນທີ່ໂຄງການ ຊົນລະປະທານຂອງ ສະຫະພາບໂຊຫວຽດ ຈະເຮັດໃຫ້ນໍ້າແຫ້ງ.
ກະຊວງຊັບພະຍາກອນນໍ້າ ຂອງ ກາຊັກສະຖານ ລາຍງານວ່າ ນັບແຕ່ປີ 2008 ປະລິມານນໍ້າ ໃນທະເລ ອາຣັລ ເພີ່ມຂຶ້ນ 42% ແລະ ຢູ່ທີ 27.000 ລ້ານແມັດກ້ອນ ຫລັງໂຄງການໄດ້ຮັບເງິນທຶນ ຈາກ ລັດຖະບານ ແລະ ທະນາຄານໂລກ (ເວິລແບງ) ໄດ້ຊ່ວຍສ້າງ ພື້ນຖານໂຄງລ່າງໃໝ່ ເພື່ອປ້ອງກັນ ບໍ່ໃຫ້ນໍ້າໄຫລອອກ. ມາຮອດປີ 2023 ພາກລັດໄດ້ສົ່ງນໍ້າ ຈາກ ແມ່ນໍ້າຊີດາຍາ ໄປເຖິງ ພາກເໜືອ 2.600 ລ້ານແມັດກ້ອນ ເພື່ອຊ່ວຍຫລຸດ ຄວາມເຄັມຂອງນໍ້າ ໄດ້ເກືອບ 4 ເທົ່າ ແລະ ສົ່ງເສີມລະບົບນິເວດ ໃນນໍ້າອີກດ້ວຍ. /