ຂປລ. ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້ ກະຊວງ ການເງິນ ຂອງ ສປຈີນ ລະບຸວ່າ: ສປຈີນ ໄດ້ຈັດສັນ ງົບປະມານ 30 ລ້ານຢວນ ເພື່ອສ້ອມແປງ ຖະໜົນ ທີ່ໄດ້ຮັບ ຄວາມເສຍຫາຍ ຈາກເຫດການແຜ່ນດິນໄຫວ ໃນເຂດປົກຄອງຕົນເອງ ທິເບດ (ຊີຈ້າງ) ທາງຕາເວັນຕົກ ສຽງໃຕ້ຂອງ ສປຈີນ.

ງົບປະມານດັ່ງກ່າວ ໄດ້ຈັດສັນຮ່ວມກັນ ລະຫວ່າງ ກະຊວງການເງິນ ແລະ ກະຊວງຄົມມະນາຄົມ ໃນຂະນະດຽວກັນ ງົບປະມານ ດັ່ງກ່າວ ຈະຖຶກນໍາໄປໃຊ້ ເພື່ອກວດກາ ໂຄງສ້າງ ອັນຕະລາຍ ເທິງຖະໜົນ ແລະ ຂົວ, ເພື່ອປ້ອງກັນ ໄພພິບັດ ທີ່ເກີດຂຶ້ນ ຕາມມາ ລວມທັງ ການຂົນສົ່ງ ວັດຖຸຊ່ວຍເຫລືອ ສຸກເສີນ ແລະ ສິ່ງຈຳເປັນ ໃນຊີວິດປະຈຳວັນ ໃຫ້ເປັນໄປຢ່າງດີ. ເມືອງຕິ້ງຣື່, ເມືອງຣືຄາເຈີ ຂອງ ທິເບດ ໄດ້ປະສົບ ເຫດແຜ່ນດິນໄຫວ ຂະໜາດ 6,8 ລິກເຕີ ເມື່ອວັນທີ 7 ມັງກອນ 2025 ໄດ້ສົ່ງຜົນໃຫ້ມີ ຜູ້ສຍຊີວິດ 126 ຄົນ, ໂດຍຂະນະນີ້ ບໍລິການ ຄົມມະນາຄົມ ການສັນຈອນ ເທິງທ້ອງຖະໜົນ ແລະ ໄຟຟ້າ ກັບມາໃຊ້ໄດ້ ເປັນປົກກະຕິແລ້ວ ໃນພື້ນທີ່ປະສົບ ແຜ່ນດິນໄຫວດັ່ງກ່າວ. /

KPL