ຂປລ.ສຳນັກ​ຂ່າວ ຊິນ​ຮວາ​ຂອງ ສປຈີນ, ເມື່ອບໍ່ດົນມານີ້ ບໍລິສັດ​ການ​ລົດ​ໄຟ​ ແຫ່ງ​ປະ​ເທດ ສປຈີນ ຈຳກັດ ກຳນົດ​ເປົ້າ​ໝາຍ ການຂະຫຍາຍ​ໄລຍະ​ທາງ​ ລົດ​ໄຟ​ຄວາມ​ໄວ​ສູງ ໃຫ້ໄດ້ປະມານ 60.000 ກິ​ໂລ​ແມັດ ໃນ​ປີ 2030 , ເພີ່ມ​ຂຶ້ນ​ຈາກ 48.000 ກິ​ໂລ​ແມັດ ຕາມ​ສະຖິຕິ​ ເມື່ອ​ປີ 2024. ໄລຍະ​ທາງ ຂອງ ເຄືອຂ່າຍ​​ທາງ​ລົດ​ໄຟ​ ທີ່​ເປີດ​ໃຊ້​ງານ​ຈະເພີ່ມຂຶ້ນ​ ເຖິງ 180.000 ກິ​ໂລ​ແມັດ ໃນ​ປີ 2030, ຊຶ່ງ​ເພີ່ມ​ຂຶ້ນ ຈາກ 162.000 ກິ​ໂລ​ແມັດ ​ໃນ​ທ້າຍ​ປີ 2024 ​ເພື່ອແນໃສ່ ພັດທະນາ ພື້ນຖານ​ໂຄງ​ລ່າງ ​ເສັ້ນທາງລົດໄຟ ຢ່າງ​ຕໍ່​ເນື່ອງ.

​ຄາດ​ວ່າ ການ​ລົງທຶນ​ໃນ​ຊັບ​ສິນ​ຖາວອນ ​ດ້ານ​ທາງ​ລົດ​ໄຟ​ຂອງ ສປຈີນ ​ໃນ​ປີ 2025 ຈະ​ເພີ່ມຂຶ້ນເຖິງ 590.000 ລ້ານ​ຢວນ, ພ້ອມ​ທັງ ການ​ເປີດ​ໃຊ້​ງານ​ ທາງ​ລົດ​ໄຟ​​ໃໝ່​ ໃນ​ປີ 2024 ​ໄດ້ເພີ່ມ​ຕື່ມອີກ​ ປະມານ 2.600 ກິ​ໂລ​ແມັດ. ​ນອກນັ້ນ ຍັງຮອງ​ຮັບ​ ການ​ເດີນທາງ​ ຂອງ ຜູ້​ໂດຍສານ ເພີ່ມຂຶ້ນ ​ເປັນ​ຄັ້ງປະຫວັດສາດ​ ເຖິງ 4.080 ລ້ານ​ເທື່ອ​ຄັ້ງ ​ໃນປີ 2023 ຫລື ປະມານ 10,8%.  ໃນປີ 2025 ຕົວ​ເລກ​ນີ້ ຈະ​ສືບຕໍ່​ເພີ່ມ​ຂຶ້ນ ​ເຖິງ 4.280 ລ້ານ​ເທື່ອ​ຄັ້ງ.  ສ່ວນການ​ລົງທຶນ ​ໃນ​ຊັບ​ສິນດັ່ງກ່າວ ລວມມີ​ ມູນ​ຄ່າ​ລວມ 850.000 ລ້ານ​ຢວນ ​ໃນປີ 2024 , ​ເພີ່ມ​ຂຶ້ນ 11,3% ​ເມື່ອ​ທຽບ​ປີ​ຕໍ່​ປີ. /

KPL