ຂປລ.ວິທະຍຸ ສາກົນ ແຫ່ງ ສປ ຈີນ, ແຫລ່ງຂ່າວ ຈາກກະຊວງ ອຸດສາຫະກຳ ແລະ ເຕັກໂນໂລຊີ ຂໍ້ມູນຂ່າວສານຈີນ ເມື່ອບໍ່ດົນມານີ້ວ່າ:  ກະຊວງ ອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນ ເປັນຕົ້ນ ໄດ້ຮ່ວມກັນເຜີຍແຜ່ “ແຜນດຳເນີນງານ ກ່ຽວກັບ ການເລັ່ງນຳໃຊ້ ຮີໂດຣແຊນ ທີ່ສະອາດ ກາກບອນຕ່ຳ ເຂົ້າໃນຂົງເຂດອຸດສາຫະກຳ” ໂດຍໄດ້ວາງມາດຕະການໃໝ່ ຢ່າງເປັນລະບົບ ເພື່ອເປີດກວ້າງ ການນຳໃຊ້ ຮີໂດຣແຊນ ທີ່ສະອາດກາກບອນຕ່ຳ ໃນຂົງເຂດ ອຸດສາຫະກຳ, ເລັ່ງການຍົກລະດັບ ຜະລິດຕະພັນ ອຸດປະກອນ ທາງເຕັກນິກ ແລະ ຊຸກຍູ້ການພັດທະນາ ດ້ວຍຄຸນນະພາບສູງ ຂອງອຸດສາຫະກຳ ຮີໂດຣແຊນ. ອຸດສາຫະກຳ ເປັນຂົງເຂດ ສຳຄັນ ໃນການນຳໃຊ້ ຮີໂດຣແຊນທີ່ສະອາດ ແລະ ກາກບອນຕ່ຳ, ການເລັ່ງນຳໃຊ້ ຮີໂດຣແຊນ ເຂົ້າໃນຂົງເຂດ ອຸດສາຫະກຳ ແມ່ນຊ່ອງທາງທີ່ສຳຄັນໃນການຊຸກຍູ້ ການປະຢັດພະລັງງານ, ຫລຸດການລະບາຍ ກາກບອນ ແລະ ຊຸກຍູ້ການຫັນເປັນ ອຸດສາຫະກຳ ແບບໃໝ່. ແຜນດຳເນີນງານດັ່ງກ່າວ ໄດ້ສະເໜີວ່າ: ຖືເອົາການເປີດກວ້າງ ການນຳໃຊ້ ຮີໂດຣແຊນ ທີ່ສະອາດ ແລະ ກາກບອນຕ່ຳໃນຂົງເຂດ ອຸດສາຫະກຳ ເປັນຈຸດສຳຄັນ, ເພີ່ມທະວີການເຊື່ອມຕໍ່ກັນ ລະຫວ່າງ ການສະໜອງກັບ ຄວາມຕ້ອງການ, ເລັ່ງຍົກລະດັບຜະລິດຕະພັນ ອຸປະກອນ ທາງເຕັກນິກ, ຊຸກຍູ້ໃຫ້ຕ່ອງໂສ້ ອຸດສາຫະກຳ ມີການພັດທະນາ ຢ່າງມີປະສິດທິພາບສູງ ແລະ ສ້າງຈຸດເຕີບໂຕໃໝ່ ດ້ານການຫັນປ່ຽນ ຮູບແບບ ແລະ ຍົກລະດັບ ທາງດ້ານອຸດສາຫະກຳ. ຂ່າວລາຍງານຕື່ມວ່າ: ການຕິດຕັ້ງໄຟຟ້າ ພະລັງງານໝູນວຽນ ຂອງ ສປ ຈີນ ມີຂະໜາດໃຫຍ່ ອັນດັບໜຶ່ງໃນໂລກ, ມີກຳລັງບົ່ມຊ້ອນອັນມະຫາສານໃນການຜະລິດ ຮີໂດຣແຊນ ດ້ວຍພະລັງງານ ໝູນວຽນໄດ້. ຕົວເລກສະຖິຕິ ໄດ້ສະແດງ ໃຫ້ເຫັນວ່າ ມາຮອດເດືອນມິຖຸນາປີ 2024, ຄວາມສາມາດ ການຜະລິດ ຮີໂດຣແຊນ ດ້ວຍພະລັງງານ ໝູນວຽນ ໄດ້ຂອງສປ ຈີນ ໄດ້ມີເຖິງໜຶ່ງແສນໂຕນຕໍ່ປີ, ຄວາມສາມາດການຜະລິດ ໃນແຜນກໍ່ສ້າງ ແລະ ໂຄງການທີ່ ພວມກໍ່ສ້າງມີປະມານ 8 ໝື່ນໂຕນຕໍ່ປີ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL