*ຕະຫລອດໄລຍະ 1 ປີຜ່ານມາແຂວງ ໄຊຍະບູລີ ໄດ້ສຸມໃສ່ຈັດຕັ້ງປະຕິບັດບັນດາຄາດໝາຍສູ້ຊົນ ດ້ວຍຈິດໃຈບຸກທະລຸເຮັດໃຫ້ເສດຖະກິດຂອງແຂວງໄດ້ຂະຫຍາຍຕໍ່ເນື່ອງ ແລະ ເມື່ອບໍ່ດົນມານີ້ ທ່ານ ສຸກສະເຫລີມ ເຮືອງຄໍາໄຊ ວ່າການຫົວໜ້າພະແນກການເງິນແຂວງ ໄຊຍະບູລີ ໄດ້ຊີ້ແຈງຕໍ່ກອງປະຊຸມສະໄໝສາມັນເທື່ອທີ່ 8 ຂອງສະພາປະຊາຊົນແຂວງ ຊຸດທີ II ວ່າ: ໄລຍະຜ່ານມາພວກເຮົາໄດ້ຈັດຕັ້ງປະຕິບັດລາຍຮັບໄດ້ດີ ແລະ ເກີນແຜນ ຊຶ່ງປະຕິບັດລາຍຮັບມາຮອດ ວັນທີ 19 ທັນວາ 2024 ໄດ້ທັງໝົດ 2.347,38 ຕື້ກີບ ເທົ່າກັບ 112,19%, ເກີນແຜນ 12,19% ເປັນເງິນເກີນຢູ່ 255,09 ຕ້ືກີບ, ພູດສູນກາງປະຕິບັດຢູ່ແຂວງບັນລຸ ໄດ້ 1.175,98 ຕື້ກີບ ເທົ່າກັບ 85,40%, ລາຍຮັບພາຍໃນພູດຂອງແຂວງ ປະຕິບັດໄດ້ 1.171,40 ຕື້ກີບເທົ່າກັບ 163,77% ຂອງແຜນການປີ, ລາຍຮັບ 15 ຫົວໜ່ວຍທີ່ສູນກາງມອບໃຫ້ແຜນການ 505,73 ຕື້ກີບ, ປະຕິບັດໄດ້ 877,53 ຕ້ືກີບ ເທ່ົາກັບ 173,52% ຂອງແຜນການ. ໃນນີ້, ສ່ວຍສາອາກອນແຜນ 254,65 ຕື້ກີບ, ປະຕິບັດໄດ້ 726,94 ຕື້ກີບ ເທົ່າກັບ 285,47% ຂອງແຜນການປີ, ລື່ນແຜນ 185,47%, ຊັບສິນ ແຜນ 251,08 ຕື້ກີບ, ປະຕິບັດໄດ້ 150,58 ຕື້ກີບ, ເທົ່າກັບ 59,97% ຂອງແຜນການປີ.

     ທ່ານ ສຸກສະເຫລີມ ເຮືອງຄໍາ ໄຊ ຍັງໄດ້ກ່າວຕື່ມອີກວ່າ: ການຈັດຕັ້ງປະຕິບັດລາຍຮັບໄດ້ເກີນແຜນ ຍ້ອນໄດ້ຮັບການຊີ້ນຳ-ນຳພາຂອງຄະນະພັກກະຊວງການເງິນ, ກົມກ່ຽວຂ້ອງ ແລະ ອົງການປົກຄອງແຂວງ, ຄະນະນຳພະແນກການເງິນ, ຂະແໜງການສາຍຕັ້ງທ່ີໄດ້ເອົາໃຈໃສ່ລົງເລິກຢ່າງໃກ້ຊິດຕິດແທດໃນການຄຸ້ມຄອງຈັດເກັບລາຍຮັບທີ່ສູນກາງມອບໃຫ້ໄດ້ຕາມແຜນການ ແລະ ລື່ນແຜນການ, ການຄຸ້ມຄອງຈັດເກັບລາຍຮັບທີ່ສູນກາງມອບໃຫ້ນີ້ເປັນຖານຂ້ໍມູນລາຍຮັບໃໝ່ທີ່ເຂັ້ມແຂງ ແລະ ເປັນທ່າແຮງທາງດ້ານລາຍຮັບທ່ີສຳຄັນບວກກັບລາຍຮັບພາຍໃນທ່ີມີຢູ່ໃນການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງໃຫ້ສາມາດບັນລຸຕາມແຜນການທີ່ວາງໄວ້,ການປະຕິບັດລາຍຮັບພາຍໃນມີທ່ວງທ່າຂະຫຍາຍຕົວດີຂຶ້ນ ເຂົ້າສູ່ລະບົບທັນສະໄໝໃນການແຈ້ງມອບລາຍຮັບຕາມການແບ່ງຂັ້ນຄຸ້ມຄອງ, ທຸລະກິດສາມາດແຈ້ງມອບພັນທະເຂົ້າງົບປະມານດ້ວຍຕົນເອງຫລາຍຂຶ້ນ.

ບົດ+ພາບໂດຍ: ອຸ່ນເຮືອນ ໂພທິລັກ

KPL