ສປຊ ຮຽກຮ້ອງໃຫ້ຊຸກຍູ້ຊີຣີບັນລຸການຂ້າມຜ່ານທາງການເມືອງທີ່ມີສັນຕິພາບ
ຂປລ.ວິທະຍຸ ສາກົນ ແຫ່ງ ສປ ຈີນ,ວັນທີ 19 ທັນວານີ້, ທ່ານ ອັນໂຕນີໂອ ກູເຕີເຣັສ, ເລຂາທິການໃຫຍ່ ອົງການ ສະຫະ ປະຊາຊາດ (ສປຊ)ໄດ້ຈັດ ກອງປະຊຸມ ຖະແຫລງຂ່າວ ກ່ຽວກັບ ບັນຫາຊີຣີ ໂດຍໄດ້ຮຽກຮ້ອງ ໃຫ້ປະຊາຄົມໂລກ ຈົ່ງຊຸກຍູ້ໃຫ້ ຊີຣີ ບັນລຸ ການຂ້າມຜ່ານ ທາງການເມືອງ ທີ່ມີສັນຕິພາບ, ມີການຜ່ອນສັ້ນ ຜ່ອນຍາວ ແກ່ກັນ ແລະ ໜ້າເຊື່ອຖື.ທ່ານ ອັນໂຕນີ ກູເຕີເຣັສ ກ່າວວ່າ: ຂະບວນການ ຂ້າມຜ່ານ ທາງການເມືອງ ໃນອະນາຄົດ ຂອງຊີຣີ ຕ້ອງຖືຫລັກການ ພື້ນຖານ ຂອງຂໍ້ຕົກລົງ ເລກທີ 2254 ຂອງສະພາ ຄວາມໝັ້ນຄົງ ອົງການ ສະຫະ ປະຊາຊາດ ເປັນການຊີ້ນຳ, ຕ້ອງນຳພາໂດຍ ປະຊາຊົນຊີຣີ ແລະ ຮັບໃຊ້ປະຊາຊົນຊີຣີ. ອົງການ ສປຊ ພວມສຸມ ກຳລັງ ເຂົ້າໃນການຊຸກຍູ້ໃຫ້ ຊີຣີ ບັນລຸ ຂະບວນການ ດັ່ງກ່າວ. ທ່ານ ອັນໂຕນີ ກູເຕີເຣັສ ກ່າວຕື່ມວ່າ: ການປົກປ້ອງ ປະຊາຊົນ ຍັງເປັນໜ້າທີ່ ສຳຄັນ ທີ່ສຸດ ໃນປັດຈຸບັນ ພ້ອມທັງ ຮຽກຮ້ອງໃຫ້ປະຊາຄົມໂລກ ຈົ່ງໃຫ້ການສະໜັບ ສະໜູນ ຫລາຍກວ່າເກົ່າ ເພື່ອຕອບສະໜອງ ຄວາມຕ້ອງການ ດ້ານມະນຸດສະທໍາ ແລະ ການກໍ່ສ້າງຄືນໃໝ່ ທີ່ຮີບດ່ວນ ຂອງຊີຣີ ແລະ ຊ່ວຍຊີຣີ ບັນລຸສັນຕິພາບ ແລະ ສະຖຽນ ລະພາບ ຖາວອນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ