ຂປລ. ສະຖານເອກ​ອັກ​ຄະ​ລັດ​ຖະ​ທູດ ແຫ່ງ ສປປ ລາວ ປະຈໍາ ສາທາລະນະລັດ ສິງກະໂປ, ໃນນາມປະທານອາຊຽນ 2024 ຮ່ວມກັບບັນດາສະຖານທູດອາຊຽນ ແລະ ຕີມໍ ເລສະເຕ ປະຈໍາ ສິງກະໂປ ໄດ້ພ້ອມກັນເປັນເຈົ້າພາບຈັດງານ ອາຊຽນ ກາລາໄນ 2024 (ASEAN Gala Night 2024) ເມື່ອບໍ່ດົນມານີ້, ທີ່ປະເທດສິງກະໂປ, ຊຶ່ງການຈັດງານດັ່ງກ່າວ, ເປັນປະເພນີປະຕິບັດກັນມາ ຂອງບັນດາສະຖານທູດ ອາຊຽນ ປະຈໍາ ສິງກະໂປ, ໂດຍປະເທດທີ່ເປັນປະທານອາຊຽນ ຕາມຮອບໜູນວຽນ ຈະຕ້ອງໄດ້ເປັນເຈົ້າພາບ ເຊິ່ງໃນປີນີ້ ເປັນຮອບໜູນວຽນຂອງ ສະຖານທູດລາວ ເປັນເຈົ້າພາບ ໂດຍມີທ່ານ ອານເບີດ ຈົວ ຫົວໜ້າຫ້ອງການ ກະຊວງການຕ່າງປະເທດ ສິງກະໂປ ພ້ອມດ້ວຍບັນດາທູດ ຂອງປະເທດຄູ່ຮ່ວມເຈລະຈາ ແລະ ແຂກຖືກເຊີນ ເຂົ້າຮ່ວມ.

ການຈັດງານດັ່ງກ່າວນີ້, ເປັນການສະຫລຸບຍ້ອງຍໍຊົມເຊີຍ ການເປັນທານອາຊຽນ ຂອງ ສປປ ລາວ ທັງເປັນການປະກາດມອບປະທານອາຊຽນ ຕາມຮອບໜູນວຽນ ໃຫ້ປະເທດມາເລເຊຍ ເປັນປະທານ ອາຊຽນ ໃນປີ 2025, ທັງເປັນການໂຄສະນາເຜີຍແຜ່ວັດທະນາທໍາ, ຮີດຄອງປະເພນີອັນດີງາມ, ຂອງບັນປະເທດອາຊຽນ. ພາຍໃນງານ, ໄດ້ການວາງສະແດງເຄື່ອງບໍລິໂພກ ແລະ ອຸປະໂພກ ທີ່ເປັນສັນຍາລັກຂອງແຕ່ລະຊາດ ເປັນຕົ້ນ ອາຫານ, ຜ້າໄໝແຜ່ນແພ ແລະ ອື່ນໆ ພ້ອມນີ້ ຍັງມີ ການສະແດງສິລະປະ-ວັດທະທໍາ ທີ່ເປັນເອກະລັກຂອງແຕ່ລະປະເທດນຳອີກ.

ງານຄັ້ງນີ້, ຖືເປັນການສ້າງໂອກາດທີ່ດີ ໃຫ້ບັນດານັກການທູດ, ພະນັກງານສະຖານທູດ ແລະ ສະມາຄົມຄົນຕ່າງປະເທດ ຂອງບັນດາປະເທດອາຊຽນ ທີ່ອາໄສຢູ່ສິງກະໂປ ໄດ້ພົບປະສັງສັນ ເຕົ້າໂຮມຄວາມສາມັກຄີ ແລະ ໂອ້ລົມສົນທະນາ ເພື່ອແລກປ່ຽນຄໍາຄິດເຫັນຮ່ວມກັນ, ສ້າງຄວາມຮັກແພງກັນ ລະຫວ່າງນັກການທູດ ແລະ ນັກທຸລະກິດ ຂອງສິງກະໂປ ກໍຄື ນັກທຸລະກິດຂອງບັນດາປະເທດອາຊຽນ ທີ່ເຮັດທຸລະກິດຢູ່ສິງກະໂປ.

ການເປັນເຈົ້າພາບຈັດງານ ອາຊຽນ ກາລາໄນ ຄັ້ງນີ້, ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ຟົດຟື້ນ ເຕັມໄປດ້ວຍເນື້ອໃນຄວາມໝາຍສຳຄັນ ແລະ ໄດ້ຮັບຜົນສໍາເລັດຢ່າງຈົບງາມ. ຜົນສໍາເລັດດັ່ງກ່າວນີ້ ແມ່ນໄດ້ຮັບການຮ່ວມມື ຈາກອ້າຍນ້ອງພະນັກງານພາຍໃນສະຖານທູດລາວ, ສະມາຄົມຄົນລາວ ແລະ ບັນດານ້ອງນັກຮຽນ-ນັກສຶກສາລາວ ຢູ່ສິງກະໂປ, ລວມທັງໄດ້ຮັບການຮ່ວມມື ແລະ ສະໜັບສະໜູນອັນດີ ຈາກບັນດາສະຖານທູດປະເທດອາຊຽນ ແລະ ຕີມໍ ເລສະເຕ ປະຈຳ ສ ສິງກະໂປ ກໍຄືເພື່ອນມິດໃກ້ສິດຈາກ ສິງກະໂປ ຈໍານວນໜຶ່ງ.

KPL