ຮວຜທ ຈັດກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ I
ຂປລ. ອົງຄະນະພັກໂຮງຮຽນ ວັດທະນະທຳຊົນເຜົ່າກອງທັບ (ຮວຜທ) ຈັດກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ I ໃນວັນທີ 17 ຕຸລາ 2024 ໂດຍມີ ສະຫາຍ ພົທ ທອງລອຍ ສິລິວົງ ກຳ ມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ ການເມືອງກອງທັບ, ພ້ອມດ້ວຍບັນດາສະຫາຍ ຄະນະພັກ, ຄະນະນຳໂຮງຮຽນວັດທະນະທຳຊົນເຜົ່າກອງທັບ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ, ສະຫາຍ ພັອ ສະແຫວງ ແດນນາມົນ ຫົວໜ້າການເມືອງ ໂຮງຮຽນວັດທະນະທຳຊົນເຜົ່າກອງທັບ ໄດ້ຕີລາຄາໝາກຜົນແຫ່ງ ການນໍາພາ-ຊີ້ນໍາ ການຈັດຕັ້ງປະຕິບັດມະຕິກອງປະຊຸມ ໃນໄລຍະຜ່ານມາ, ພ້ອມທັງ ຍົກໃຫ້ເຫັນ ຈຸດດີ, ຈຸດອ່ອນ ແລະ ບາງບົດຮຽນ ທີ່ຖອດຖອນໄດ້ ໃນໄລຍະຜ່ານມາ ເຊິ່ງມີຜົນສຳເລັດ ຫລາຍດ້ານ ເປັນຕົ້ນ ຄະນະພັກ ໄດ້ຊີ້ນໍາການສ້າງແຜນການ ລົງກໍ່ສ້າງຮາກຖານການເມືອງ ຢູ່ບັນດາບ້ານໃນຂອບເຂດຮັບຜິດຊອບ, ໄດ້ເປັນເຈົ້າການໃນ ການສຶກສາອົບຮົມສະມາຊິກພັກ, ພະນັກງານ, ນັກຮົບ ແລະ ນັກຮຽນ ແນໃສ່ສະກັດກັ້ນ ບັນດາໜໍ່ແໜງຕ່າງໆ ທີ່ພາໃຫ້ກົມກອງ ກໍຄື ໂຮງຮຽນບໍ່ມີຄວາມສະຫງົບ; ໄດ້ຊີ້ນໍາສ້າງແຜນການ ຈັດຕັ້ງປະຕິບັດລະບອບປະຈໍາການ ກຽມພ້ອມສູ້ຮົບ ໃນແຕ່ລະວັນຕະຫລອດ 24 ຊົ່ວໂມງ, ພ້ອມທັງຈັດຕັ້ງກຳລັງປະຈຳການ 3 ຂັ້ນ ກຳລັງປ້ອງກັນເວນຍາມ ຈຸດສຳຄັນຕ່າງໆ ຕາມຂອບເຂດຮັບຜິດຊອບ ເຮັດໃຫ້ສະພາບມີ ຄວາມສະຫງົບ-ປອດໄພ, ໄດ້ຊີ້ນໍາການສ້າງແຜນການ ກຽມພ້ອມຮັບມື ກັບໄພພິບັດຕ່າງໆ ໃນແຕ່ລະໄລຍະ. ໃນນີ້, ໄດ້ມີການຈັດຕັ້ງກໍາລັງ, ພາຫະນະເພື່ອກອບກູ້ ແລະ ຊ່ວຍເຫລືອ ໃນກໍລະນີເກີດມີໄພພິບັດ ໃຫ້ໄດ້ທັນເວລາ. ປັດຈຸບັນ, ທົ່ວອົງຄະນະພັກ ໂຮງຮຽນວັດທະນະທຳຊົນເຜົ່າກອງທັບ ມີ 6 ໜ່ວຍພັກຮາກຖານ, ໄລຍະຜ່ານມາ ໄດ້ຮັບການລາຍງານຈາກ 6 ໜ່ວຍພັກ ທີ່ຂຶ້ນກັບຄະນະພັກໂຮງຮຽນ ວັດທະນະທຳຊົນເຜົ່າກອງທັບ ທີ່ໄດ້ຕີລາຄາແບ່ງ ປະເພດສະມາຊິກພັກ ປະເພດແຂງ 178 ສະຫາຍ, ຍິງ 38 ສະຫາຍ, ປະເພດກາງ 10 ສະຫາຍ, ຍິງ 1 ສະຫາຍ, ອ່ອນ 2 ສະຫາຍ, ຍິງ 2 ສະຫາຍ, ບໍ່ໄດ້ຕີລາຄາແບ່ງປະເພດ 36 ສະຫາຍ, ຍິງ 2 ສະຫາຍ (ສາເຫດແມ່ນສະມາຊິກພັກສໍາຮອງ ແລະ ສະມາຊິກພັກຍ້າຍເຂົ້າມາໃໝ່). ສຳລັບ ວຽກງານການຮຽນ-ການສອນ ໄດ້ຊີ້ນຳຄູອາຈານເອົາໃຈໃສ່ ປະຕິບັດໂມງເວລາ ໃນການຂຶ້ນຫ້ອງສິດສອນຢ່າງເຂັ້ມງວດ ຍົກລະດັບການສິດສອນ ຄວາມຮູ້ໂດຍຖືນັກຮຽນເປັນໃຈກາງ ໝາຍຄວາມວ່າ ການສິດສອນສົ່ງຄວາມຮູ້ ຕິດພັນກັບການເສີມຂະຫຍາຍສະຕິປັນຍາ, ສ້າງໃຫ້ມີຫົວຄິດປະດິດສ້າງ, ມີຄວາມກະຕືລືລົ້ນ ຂອງນັກຮຽນ ໃນການຮັບເອົາ ຄວາມຮູ້ຈາກຄູອາຈານ ຈົນສາມາດນຳໃຊ້ເຂົ້າໃນການຮ່ຳຮຽນ, ສອບເສັງ ກໍຄື ການເຄື່ອນໄຫວກິດຈະກຳຕ່າງໆ.
ພ້ອມນີ້, ສະຫາຍ ພັອ ສະແຫວງ ແດນນາມົນ ຍັງໄດ້ຍົກໃຫ້ເຫັນ ທິດທາງແຜນການ ແລະ ຄາດໝາຍສູ້ຊົນໃນຕໍ່ໜ້າ ໂດຍຈະສູ້ຊົນປັບປຸງ ກໍ່ສ້າງໂຮງຮຽນ ວັດທະນະທຳຊົນເຜົ່າກອງທັບ ໃຫ້ເປັນບ່ອນກໍ່ສ້າງພະນັກງານ ຮຸ່ນສືບທອດ ທີ່ມີຄຸນນະພາບ ຂອງກອງທັບປະຊາຊົນລາວ; ສູ້ຊົນເຮັດໃຫ້ສະ ພາບຂອບເຂດກົມກອງຮັບຜິດຊອບ ໃຫ້ມີຄວາມສະຫງົບໂດຍພື້ນຖານ, ເອົາໃຈໃສ່ລົງກໍ່ສ້າງຮາກຖານການເມືອງ, ສົມທົບກັບອົງການປົກຄອງທ້ອງຖິ່ນ ຂອບເຂດກົມກອງຮັບຜິດຊອບ ພ້ອມກັນເຮັດວຽກງານ ປ້ອງກັນຊາດ-ປ້ອງກັນ ຄວາມສະຫງົບໃຫ້ດີກ່ວາເກົ່າ; ສູ້ຊົນສ້າງພະນັກງານ-ສະມາຊິກພັກ ໃຫ້ມີຄວາມໜັກແໜ້ນ ທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ ສ້າງສະມາຊິກພັກແຂງໃຫ້ໄດ້ 2/3 ຂຶ້ນໄປ, ສ້າງໜ່ວຍພັກປອດໃສເຂັ້ມແຂງ, ໜັກແໜ້ນ ແລະ ກົມກອງປອດໃສ, ປອດໄພ, ປອດຄະດີ ໃຫ້ໄດ້ 90% ຂຶ້ນໄປ, ສູ້ຊົນບໍ່ໃຫ້ມີ ສະມາຊິກພັກ ເສຍທາດຂາດຄຸນ, ສ້າງແຜນການຝຶກອົບຮົມກວດສອບເລຂາ, ຮອງເລຂາ ຄັ້ງທີ I ໃຫ້ ຮາກຖານພັກ ແລະ ສູ້ຊົນສ້າງກົມກອງວັດທະນະທໍາ-ນັກຮົບວັດທະນະທຳ ໃນທົ່ວກອງພັນໃຫຍ່ໃຫ້ໄດ້ 1 ກົມກອງ, ສູ້ຊົນສ້າງແຜນການ ກຳນົດພະນັກງານນຳພາ-ບັນຊາ ຂັ້ນກະຊວງປ້ອງກັນ ປະເທດຄຸ້ມຄອງ ແລະ ພະນັກງານນຳພາ-ບັນຊາ ຂັ້ນກົມກອງຄຸ້ມຄອງ, ສູ້ຊົນກໍ່ສ້າງພະນັກງານລະດັບ ປະລິນຍາໂທ, ປະລິນຍາຕີ, ຊັ້ນສູງ ໃຫ້ໄດ້ 45-55 ສະຫາຍ.
ໃນໂອກາດດຽວກັນ, ຜູ້ແທນສົມບູນ ແລະ ສຳຮອງ ຍັງໄດ້ປ່ອນບັດເລືອກເອົາຄະນະພັກຊຸດໃໝ່ ຕື່ມອີກ.
ຂ່າວ-ພາບ: ທະນູທອງ