ຂປລ. ງານຕະຫລາດນັດວາງສະແດງ-ຂາຍສິນຄ້າ ຫັດຖະກຳ ແລະ ອຸດສາຫະກຳ ຄັ້ງທີ 28 ປະຈໍາປີ 2025 ຂອງເມືອງນາຊາຍທອງ ນະຄອນຫລວງວຽງຈັນ (ນວ) ໄດ້ເປີດຂຶ້ນໃນລະຫວ່າງວັນທີ 13-17 ກຸມພາ 2025 ຜ່ານມາ ຢູ່ບ້ານແຈ້ງສະຫວ່າງ ໂດຍໄດ້ຈັດໃຫ້ມີຫລາຍສີສັນ ແລະ ມີຄວາມຄຶກຄື້ນຕະຫລອດງານ ເຊິ່ງເປັນບຸນມະໂຫລານ ຂອງມວນຊົນພາຍໃນເມືອງນາຊາຍທອງ ແລະ ຂອງມະຫາຊົນໃນທົ່ວສັງຄົມ ທຸກພາກສ່ວນ.

ທ່ານ ສຸລິວັນ ພົມມະຫາໄຊ ເຈົ້າເມືອງນາຊາຍທອງ ໄດ້ໃຫ້ຮູ້ວ່າ: ງານຕະຫລາດນັດ ປະຈຳປີ 2025 ຂອງເມືອງນາຊາຍທອງ ໄດ້ປິດລົງຢ່າງມີຜົນສໍາເລັດ ແລະ ໜ້າປະທັບໃຈ ເຊິ່ງທັງໝົດນັ້ນ, ແມ່ນຍ້ອນຄວາມເອົາໃຈໃສ່ ຂອງຄະນະຮັບຜິດຊອບຈັດງານ ກໍຄື ບັນດາອະນຸກໍາມະການ, ກຸ່ມບ້ານ ແລະ ບ້ານຕ່າງໆ ຕະຫລອດຮອດປະຊາຊົນບັນດາເຜົ່າ ເມືອງນາຊາຍທອງ, ຊາວຄ້າຂາຍ, ຫົວໜ່ວຍທຸລະກິດ, ຫ້າງຮ້ານທັງພາກລັດ ແລະ ເອກະຊົນລວມທັງກຳລັງປ້ອງກັນຊາດ-ປ້ອງກັນ ຄວາມສະຫງົບທຸກພາກສ່ວນ ໄດ້ເປັນເຈົ້າການມີສ່ວນຮ່ວມນໍາກັນ, ດ້ວຍຄວາມຮັບຜິດຊອບສູງ ເຊິ່ງເຮັດໃຫ້ງານຕະຫລາດນັດ ມີຄວາມເປັນລະບຽບຮຽບຮ້ອຍ, ສະອາດຈົບງາມ, ສະຫງົບປອດໄພ 100% ແລະ ບັນລຸຜົນສໍາເລັດຕາມລະດັບຄາດໝາຍ.

ງານຕະຫລາດນັດວາງສະແດງ ແລະ ຂາຍສິນຄ້າ ປະຈໍາປີ 2025 ມີລັກສະນະເຕີບໃຫຍ່ຂະຫຍາຍຕົວ ກວ່າທຸກປີຜ່ານມາ ແລະ ມີສິນຄ້າຫລາຍປະເພດ ທີ່ດຶງດູດມວນຊົນພາຍໃນເມືອງ ແລະ ຕ່າງເມືອງ, ພາຍໃນນະຄອນຫລວງວຽງຈັນ ແລະ ແຂວງໃກ້ຄຽງ ເຂົ້າມາທ່ຽວຊົມຕະຫລອດໄລຍະ ການຈັດງານຢ່າງຫລວງຫລາຍ. ການຈັດງານໃນຄັ້ງນີ້, ຍັງໄດ້ມີການແລກປ່ຽນປະສົບການ ນໍາມວນຊົນພາຍໃນ ເມືອງນາຊາຍທອງ, ໃນນະຄອນຫລວງວຽງຈັນ ແລະ ທົ່ວສັງຄົມ ເພື່ອເປັນການເຊີດຊູກຳລັງໃຈ ເປັນ ຄວາມເອກອ້າງທະນົງໃຈ ປະກອບສ່ວນເຂົ້າໃນການຊຸກຍູ້ ຂະບວນການຜະລິດຂອງປະຊາຊົນ ໃຫ້ເຕີບໃຫຍ່ຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ ແລະ ເປັນການເປີດກວ້າງ ຕະຫລາດຈຳໜ່າຍສິນຄ້າ, ການຄ້າ, ການບໍລິການ ແລະ ການທ່ອງທ່ຽວ ຂອງເມືອງນາຊາຍທອງ ໃຫ້ມີຫລາຍສີສັນໃໝ່ ທີ່ກວ້າງຂວາງກວ່າເກົ່າ,  ທັງເປັນກຳລັງແຮງຜັກດັນໃຫ້ແກ່ ການຜະລິດເປັນສິນຄ້າ ຕາມນະໂຍບາຍ 1 ບ້ານ, 1 ຜະລິດຕະພັນ, 1 ເມືອງບໍ່ໃຫ້ຫລຸດ 5 ຜະລິດຕະພັນ ທີ່ຫລາກຫລາຍ ແລະ ນັບມື້ເຕີບໃຫຍ່ຂະຫຍາຍຕົວ ທາງດ້ານປະລິມານ ແລະ ຄຸນນະພາບກ້າວໄປສູ່ການຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ. ເປັນການສ້າງພື້ນຖານທີ່ດີ ໃຫ້ແກ່ການຜະລິດເປັນສິນຄ້າ ແບບລວມໝູ່ ແລະ ເປັນຟາມ ກ້າວໄປສູ່ການສ້າງຕັ້ງເປັນຫົວໜ່ວຍ ການຜະລິດແບບສະຫະກອນ ຢ່າງແຂງແຮງໃນອະນາຄົດ.

ຂໍ້ມູນ-ພາບ: ວຽງຈັນໃໝ່

KPL