KPL
ຂປລ. ປັດຈຸບັນ, ທຸລະກິດການລ້ຽງນົກກະຈອກເທບ ຢູ່ ສປປ ລາວ ແມ່ນເລີ່ມມີການແຜ່ຫລາຍຂຶ້ນ ເພາະ ເປັນສັດເສດຖະກິດໃໝ່, ມີອາຍຸຍືນ, ລ້ຽງງ່າຍ, ໃຫຍ່ໄວ, ໃຫ້ຜົນຜະລິດສູງ, ສາມາດສ້າງລາຍຮັບ ໃຫ້ກັບຜູ້ລ້ຽງ ເປັນຈຳນວນຫລາຍ.
ຂປລ. ປັດຈຸບັນ, ທຸລະກິດການລ້ຽງນົກກະຈອກເທບ ຢູ່ ສປປ ລາວ ແມ່ນເລີ່ມມີການແຜ່ຫລາຍຂຶ້ນ ເພາະ ເປັນສັດເສດຖະກິດໃໝ່, ມີອາຍຸຍືນ, ລ້ຽງງ່າຍ, ໃຫຍ່ໄວ, ໃຫ້ຜົນຜະລິດສູງ, ສາມາດສ້າງລາຍຮັບ ໃຫ້ກັບຜູ້ລ້ຽງ ເປັນຈຳນວນຫລາຍ. ໃນນັ້ນ, ທ່ານ ແກ້ວສັນຕິສຸກ ໄຊຄຳວົງ ເຈົ້າຂອງ ຟາມນົກກະຈອກເທບບ້ານຖ້ຳ ເມືອງນາຊາຍທອງ ນະຄອນຫລວງວຽງຈັນ ກໍໄດ້ເລີ່ມລ້ຽງມາແຕ່ ປີ 2016 ມາຮອດປັດຈຸບັນ, ສາມາດສ້າງລາຍຮັບ ໃຫ້ກັບຄອບຄົວ ໄດ້ເຖິງ 1.500 ລ້ານກີບຕໍ່ປີ.
ທ່ານ ແກ້ວສັນຕິສຸກ ໄຊຄຳວົງ ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນນີ້ວ່າ: ຈຸດເລີ່ມຕົ້ນ ໃນການຕັດສິນໃຈ ລົງມືລ້ຽງນົກກະຈອກເທບ ກໍຍ້ອນມັກຮັກໃນການຜະລິດກະສິກຳ, ອີງໃສ່ພື້ນຖານຄວາມຮູ້, ຄວາມຊຳນິຊຳນານ ແລະ ມີຄວາມຊ່ຽວຊານທາງດ້ານສັດປີກ ຈຶ່ງເກີດມີແນວຄວາມຄິດ ຢາກທົດລອງຟັກໄຂ່ນົກກະຈອກເທບ ເປັນເສດຖະກິດ ຈຳໜ່າຍພາຍໃນ ແລະ ສົ່ງອອກຕ່າງປະເທດ ໂດຍໃຊ້ທຶນຮອນຂອງຕົນເອງ ຊື້ແນວພັນມາຟັກເອງ ແລະ ທ້ອນໂຮມແນວພັນຈຳນວນໜຶ່ງມາລ້ຽງ, ມາຮອດປັດຈຸບັນ ຟາມນົກກະຈອກເທບ ບ້ານຖ້ຳ ມີເນື້ອທີ ທັງໝົດ 8 ເຮັກຕາ, ມີນົກທັງໝົດ 180 ກວ່າໂຕ. ໃນນັ້ນ, ມີແມ່ພັນ 40 ໂຕ, ພໍ່ພັນ 20 ໂຕ, ນົກນ້ອຍ ພ້ອມຈຳໜ່າຍ ມີ 120 ໂຕ, ມີນົກທັງໝົດ 2 ສາຍພັນ ຄື: ສາຍພັນຄໍແດງ ແລະ ສາຍພັນຄໍນ້ຳເງິນ ເຊິ່ງນົກກະຈອກເທບ ເປັນສັດເສດຖະກິດໃໝ່, ລ້ຽງງ່າຍ, ໃຫຍ່ໄວ, ມີອາຍຸຢືນ ເຖິງ 65 ປີ ແລະ ໃຫ້ຜົນຜະລິດ ໄດ້ 44 ປີ, ສະເລ່ຍ ແມ່ໜຶ່ງສາມາດອອກໄຂ່ 40-60 ໜ່ວຍ/ປີ.
ຟາມນົກກະຈອກເທບ ບ້ານຖ້ຳ ສ່ວນໃຫຍ່ ແມ່ນເນັ້ນສະໜອງແນວພັນນົກກະຈອກເທບນ້ອຍ ແລະ ສະໜອງຊີ້ນ ໃຫ້ບັນດາຮ້ານອາຫານ ຢູ່ນະຄອນຫລວງວຽງຈັນ ເຊິ່ງປີໜຶ່ງສາມາດສະໜອງແນວພັນໄດ້ 400-600 ໂຕຕໍ່ປີ. ໃນອະນາຄົດ, ຈະຂະຫຍາຍຕະຫລາດ ໄປຍັງບັນດາຮ້ານອາຫານ ຢູ່ໂຮງແຮມຕ່າງໆ ໃນຂອບເຂດທົ່ວປະເທດ ທີ່ມີຄວາມຕ້ອງການ. ຄຽງຄູ່ກັບການລ້ຽງນົກກະຈອກເທບແລ້ວ, ຍັງໄດ້ປູກຫຍ້າ ເນເປຍ, ຫຍ້າອິດສະລາເອວ ເພື່ອເປັນອາຫານເສີມໃຫ້ກັບນົກ ຕື່ມອີກ.
ຂ່າວ-ພາບ: ທະນູທອງKPL
