ຂປລ. ​ເມື່ອ​ບໍ່​ດົນ​ມາ​ນີ້, ຄະນະກຳມະການ ໂອແລັມປິກແຫ່ງຊາດລາວ (ຄອລ) ຈັດປະຊຸມສະຫລຸບຜົນງານ ການເຄື່ອນໄຫວທີ່ພົ້ນເດັ່ນ ປະຈຳປີ 2024 ແລະ ວາງທິດທາງແຜນການ ປີ 2025 ພາຍໃຕ້ການເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທັງເປັນປະທານ ຄອລ, ມີຄະນະບໍລິຫານງານ ຄອລ ພ້ອມດ້ວຍປະທານສະຫະພັນກິລາແຫ່ງຊາດ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມ,  ໄດ້ຮັບຟັງການລາຍງານຜົນງານການເຄື່ອນໄຫວ ປະຈຳປີ 2024 ແລະ ວາງທິດທາງແຜນການ ປີ 2025 ໂດຍສະເພາະ ວຽກງານການເງິນຂອງ ຄອລ ປະຈໍາປີ 2024, ການຈັດຕັ້ງປະຕິບັດກອງທຶນ ສົ່ງເສີມກິລາສູ່ໂອແລັມປິກ, ວຽກງານກໍາມະການເຕັກນິກ, ວຽກງານກໍາມະການນັກກິ ລາ ລວມທັງ ການລາຍງານ ໂດຍຫຍໍ້ຂອງ 4 ສະຫະພັນກິລາ ທີ່ມີການເຄື່ອນໄຫວພົ້ນເດັ່ນໃນປີ 2024 ຂອງສະຫະພັນບານເຕະແຫ່ງຊາດ, ສະຫະພັນປິ່ງປ່ອງແຫ່ງຊາດ, ສະຫະພັນເພາະກາຍແຫ່ງຊາດ, ສະ ຫະພັນເປຕັງແຫ່ງຊາດ ແລະ ສະຫະພັນໝາກແລ້ ແຫ່ງຊາດ.

ໃນປີ 2024 ຜ່ານມາ, ຄະນະກຳມະການ ໂອແລັມປິກແຫ່ງຊາດລາວ ກໍໄດ້ເອົາໃຈໃສ່ຢ່າງຕັ້ງໜ້າ ຈັດຕັ້ງປະຕິບັດວຽກງານຂອງຕົນດ້ວຍຄວາມຮັບຜິດຊອບສູງ ທັງວຽກງານບໍລິຫານ, ການເງິນ, ການຮ່ວມມືສາກົນ ແລະ ວຽກງານພັດທະນາບຸກຄະລາກອນ ອັນພົ້ນເດັ່ນຄື ​ໄດ້ສົ່ງນັກກິລາ ເຂົ້າຮ່ວມມະຫະກຳກິລາ ໂອແລັມປິກສາກົນ 2024 ທີ່ນະຄອນຫລວງປາຣີ ປະເທດຝຣັ່ງ, ນັກກິລາເພາະກາຍລາວ ສ້າງປະຫວັດສາດໄດ້ຫລຽນຄຳ ລາຍການຊີງແຊັມໂລກຄັ້ງທຳອິດ ທີ່ເມົາດິບ, ສະຫະພັນບານເຕະແຫ່ງຊາດລາວ ໄດ້ຮັບລາງວັນສະຫະພັນບານເຕະດີເດັ່ນແຫ່ງປີ ຂອງສະຫະພັນບານເຕະອາຊີ ຫລື AFC Member Association of the Year ປະເພດ Ruby, ກິລາໝາກແລ້ ຖືກບັນຈຸເຂົ້າຊີງຫລຽນໃນງານກິລານັກຮຽນທົ່ວປະເທດຄັ້ງທຳອິດ ທີ່ແຂວງສາລະວັນ, ສະຫະພັນປິ່ງປ່ອງແຫ່ງຊາດ ສຳ ເລັດການເປັນເຈົ້າພາບປິ່ງປ່ອງ ເຍົາວະຊົນ-ຊາວໜຸ່ມ ລະດັບໂລກຄັ້ງທຳອິດ ລາຍການ WTT Youth Contender, ສ່ວນສະຫະພັນເປຕັງແຫ່ງຊາດ ກໍນຳພາຄະນະນັກກິລາຄວ້າ 3 ຫລຽນຄຳ, 2 ຫລຽນເງິນ, 4 ຫລຽນທອງ ໃນງານກິລາມະຫາວິທະຍາໄລອາຊຽນ ທີ່ອິນໂດເນເຊຍ.

ສຳລັບທິດທາງການເຄື່ອນໄຫວໃນປີ 2025 ຈະສືບຕໍ່ເປັນເສນາທິການ ປະສານງານທຸກຂົງເຂດວຽກງານທີ່ກ່ຽວຂ້ອງ ເພື່ອປັບປຸງ, ຍົກລະດັບ ແລະ ພັດທະນາກິລາລາວ ໃຫ້ເຕີບໃຫຍ່ຂະຫຍາຍຕົວ ແລະ ພົ້ນເດັ່ນກວ່າເກົ່າ ໃນເວທີພາກພື້ນ ແລະ ສາກົນ ໂດຍສະເພາະ ກຽມຄວາມພ້ອມເຂົ້າຮ່ວມແຂງຂັນ ໃນຊີເກມ ຄັ້ງທີ 33 ທີ່ປະເທດໄທ ແລະ ກຽມຮ່ວມຈັດງານກິລາແຫ່ງຊາດ ຄັ້ງທີ 12 ທີ່ນະຄອນ ຫລວງວຽງຈັນ.

ຂ່າວ-ພາບ: ຕຸໄລເພັດ

KPL