ຂປລ. ກອງປະຊຸມພົບປະສອງຝ່າຍ ປະຈໍາປີ 2025 ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ຈັດຂຶ້ນໃນວັນທີ 12 ມັງກອນ 2025 ທີ່ນະຄອນຫລວງຮ່າໂນ້ຍ ສສ ຫວຽດນາມ, ຝ່າຍລາວນໍາໂດຍ ສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ສະຫາຍ  ພົນເອກ ເລື່ອງ ຕາມ ກວາງ ກໍາມະການກົມການເມືອງ ສູນກາງພັກ ກອມມູນິດຫວຽດນາມ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ມີການນໍາຂັ້ນສູງ, ພະນັກງານກ່ຽວຂ້ອງ ສອງກະຊວງປ້ອງກັນຄວາມສະຫງົບ ລາວ ແລະ ຫວຽດນາມ ເຂົ້າຮ່ວມ.

ໂອກາດນີ້, ສອງຝ່າຍໄດ້ຕີລາຄາສູງ ຕໍ່ການຈັດຕັ້ງຜັນຂະຫຍາຍ ແຜນການຈັດຕັ້ງປະຕິບັດແຜນ ການຮ່ວມມືໃນປີ 2024 ເຫັນວ່າມີຜົນສໍາເລັດຫລາຍດ້ານ ພາຍໃຕ້ການນໍາພາ-ຊີ້ນຳ ຂອງສອງພັກ, ສອງລັດ ເຮັດໃຫ້ການຮ່ວມມືຮອບດ້ານຂອງສອງກະຊວງ ມີຜົນສໍາເລັດຕາມຄາດໝາຍ ເຊິ່ງ ສະຫາຍ ພົນເອກ ວິໄລ ຫລ້າຄຳຟອງ ໄດ້ກ່າວວ່າ: ພົບປະສອງຝ່າຍຄັ້ງນີ້, ຈະເປັນຂີດໝາຍໃໝ່ໃນ ການສືບຕໍ່ຈັດຕັ້ງຜັນຂະຫຍາຍ ເນື້ອໃນຂໍ້ຕົກລົງຕ່າງໆ ລະຫວ່າງສອງພັກ, ສອງລັດຖະບານ ໂດຍສະເພາະ ສອງກະ ຊວງປ້ອງກັນຄວາມສະຫງົບ ໃນການຮ່ວມ ກັນຜັນຂະຫຍາຍ ສັນຍາຮ່ວມມືປະຈໍາປີ, ຮ່ວມກັນເສີມສ້າງມູນເຊື້ອ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ໃຫ້ນັບມື້ແໜ້ນແຟ້ນ ແລະ ກ້າວສູ່ລວງເລິກຍິ່ງຂຶ້ນ. ກະຊວງປ້ອງກັນຄວາມສະຫງົບລາວ ເວລາໃດກໍຕີລາຄາສູງຕໍ່ຜົນງານ ແລະ ໄຊຊະນະຂອງກໍາລັງ ປ້ອງກັນຄວາມສະຫງົບ ປະຊາຊົນຫວຽດນາມ ໃນການສືບຕໍ່ ພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ, ປະກອບສ່ວນຮັບປະກັນ ສະຖຽນລະພາບ ທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ ທາງດ້ານສັງຄົມ ເຮັດໃຫ້ເສດຖະກິດຂະ ຫຍາຍຕົວຢ່າງຕໍ່ເນື່ອງ, ບົດບາດອິດທິພົນຂອງ ສສ ຫວຽດນາມ ເປັນຕົ້ນ ແມ່ນຂອງກໍາລັງປ້ອງກັນ ຄວາມສະຫງົບປະຊາຊົນຫວຽດນາມ ນັບມື້ໂດດເດັ່ນຂຶ້ນ ໃນເວທີພາກພື້ນ ແລະ ສາກົນ.

ສໍາລັບແຜນການຮ່ວມມືປະຈໍາປີ 2025 ລະຫວ່າງ ສອງກະຊວງຈະສືບຕໍ່ຮ່ວມມືກັນ ໃນຂົງ ເຂດວຽກງານທີ່ໄດ້ພົວພັນຮ່ວມມືກັນຜ່ານມາ ໂດຍສະເພາະ ການປະສານສົມທົບ, ສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ຂອງ ບັນດາເຫດການການເມືອງ, ການຕ່າງປະເທດເຊັ່ນ: ເພີ່ມທະວີ ການຮ່ວມມືປະສານສົມທົບກັນ ໃຫ້​ແໜ້ນແຟ້ນ ໃນການຕ້ານບັນດາອາຊະຍາກໍາ; ສືບຕໍ່ປະສານສົມທົບ ຕອບຕ້ານການເຄື່ອນໄຫວຂອງກຸ່ມຄົນບໍ່ດີ, ອິດທິກໍາລັງປໍລະປັກ ທີ່ໃສ່ຮ້າຍ ປ້າຍສີ, ແບ່ງແຍກຄວາມສາມັກຄີ ລະຫວ່າງສອງຊາດ ສືບຕໍ່ວຽກງານກໍ່ສ້າງກໍາລັງ ກະຊວງປ້ອງກັນຄວາມສະຫງົບ ສປປ ລາວ ໃຫ້ກາຍເປັນກໍາລັງທີ່ເຂັ້ມແຂງ ສືບຕໍ່ໂຄງ ການກໍ່ສ້າງສູນ ຂໍ້ມູນພົນລະເມືອງ ແລະ ສືບຕໍ່ຮັດແໜ້ນຄວາມສະມາຄີຮອບດ້ານ ໃຫ້ເຕີບໃຫຍ່ຂຶ້ນໄປເລື່ອຍໆ.

ຈາກນັ້ນ, ສະຫາຍ ພົນເອກ ວິໄລ ຫລ້າຄໍາຟອງ ພ້ອມຄະນະ ໄດ້ເຂົ້າຢ້ຽມຂໍານັບ ສະຫາຍ ໂຕ ເລິມ ເລຂາທິການໃຫຍ່ ພັກກອມມູນິດຫວຽດນາມ ພ້ອມທັງໄດ້ລາຍງານຜົນສໍາເລັດ ໃນການຮ່ວມມືສອງຝ່າຍໃນປີ 2024 ຜ່ານມາ ​ແລະ ແຜນການຮ່ວມມືປະຈໍາປີ 2025 ໂດຍພາຍໃຕ້ການນໍາພາ-ຊີ້ນໍາ ຂອງສອງພັກ-ສອງລັດ ເຮັດໃຫ້ສອງກະຊວງປ້ອງກັນຄວາມສະຫງົບ ລາວ ແລະ ກະຊວງປ້ອງກັນຄວາມສະຫງົບຫວຽດນາມ ສາມາດຮັກສາໄດ້ຄວາມສະຫງົບຮອບດ້ານ ເຮັດໃຫ້ສອງປະເທດມີສະ ຖຽນລະພາບທາງດ້ານການເມືອງ.

ໂອກາດນີ້, ສະຫາຍ ໂຕ ເລິມ ເລຂາທິການໃຫຍ່ ພັກກອມມູນິດຫວຽດນາມ ໄດ້ສະແດງຄວາມຍິນດີ ຕ້ອນຮັບຢ່າງອົບອຸ່ນ, ພ້ອມທັງຕີລາຄາສູງຕໍ່ຜົນ ການຮ່ວມມືຮອບດ້ານຕ່າງໆ ລະຫວ່າງສອງພັກ, ສອງລັດຖະບານ ໂດຍສະເພາະ ລະຫວ່າງສອງ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນ ຄວາມສະຫງົບ ສສ ຫວຽດນາມ ໃນການຮ່ວມ ກັນຜັນຂະຫຍາຍ ສັນຍາຮ່ວມມືປະຈໍາປີ, ຮ່ວມກັນເສີມສ້າງມູນເຊື້ອ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ໃຫ້ນັບມື້ແໜ້ນແຟ້ນ.

ຂ່າວ: ພັຕ ສີສະຫວ່າງ ຈັນມະນີ

KPL