ຂປລ. ລັດຖະບານ ແຫ່ງ ສປປ ລາວ ໄດ້ວາງວິໄສທັດ ການພັດທະນາ ເສດຖະກິດດີຈິຕອນ ແຫ່ງຊາດ ໄລຍະ 20 ປີ (2021-2040) ໂດຍຈະນໍາໃຊ້ເຕັກໂນໂລຊີດີຈິຕອນ ເປັນເຄື່ອງມືສໍາຄັນ ໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດີຈິຕອນ ແນໃສ່ປະກອບສ່ວນເຂົ້າໃນ ການດັດປັບໂຄງສ້າງ ເສດຖະກິດຂອງປະເທດ ໃຫ້ມີການຂະຫຍາຍ ຕົວຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງ.

ອີງຕາມ ວິໄສທັດການພັດທະນາ ເສດຖະກິດດີຈິຕອນ ແຫ່ງຊາດ ໄລຍະ 20 ປີ (2021-2040) ໃຫ້ຮູ້ວ່າ: ເປົ້າໝາຍລວມ ຂອງວິໄສທັດດັ່ງກ່າວ, ຈະເສີມຂະຫຍາຍປັດ​ໄຈ ແລະ ທ່າແຮງບົ່ມຊ້ອນ ຂອງປະເທດເຮົາ ໂດຍນໍາໃຊ້ເຕັກໂນໂລຊີ​ດີຈິຕອນ ທີ່ເໝາະສົມ ໃຫ້ກາຍເປັນໂອກາດ, ເປັນກຳລັງແຮງ ແລະ ເປັນພື້ນຖານການຜະລິດ, ການບໍລິການ ທີ່ເປັນ ປາຍແຫລມ, ເປັນຫົວຈັກໃຫ້ແກ່ການເຕີບໂຕ ເພື່ອສ້າງພື້ນຖານເສດຖະກິດ-ສັງຄົມ ໃຫ້ມີຄວາມເຂັ້ມແຂງ ແລະ ເປັນເຈົ້າຕົນເອງ ເພິ່ງຕົນເອງ ເປັນກ້າວໆ ຕິດພັນກັບ ການພັດທະນາ ຊັບພະຍາກອນມະນຸດ ທີ່ມີຄຸນນະພາບສູງ ເພື່ອເປັນປັດ​ໄຈທີ່ສໍາຄັນ ໃນການພັດ ທະນາເສດຖະກິດ-ສັງຄົມ, ສືບຕໍ່ກະກຽມຄວາມພ້ອມຮອບດ້ານ ເພື່ອນໍາເອົາປະເທດຊາດ ອອກຈາກ ສະຖານະພາບດ້ອຍພັດທະນາ ແລະ ກ້າວເດີນສູ່ຈຸດໝາຍສັງຄົມນິຍົມ.

ສຳລັບ ເປົ້າໝາຍປີ 2025 ຈະສູ້ຊົນຫັນເປັນທັນສະໄໝ ເພື່ອພັດທະນາ ເສດຖະກິດດີຈິຕອນ, ປັບປຸງການຊຳລະສະສາງ, ການເກັບລາຍຮັບ ແລະ ຄຸ້ມຄອງລາຍຈ່າຍງົບປະມານ ດ້ວຍລະບົບເອເລັກ ໂຕຣນິກ, ຄຸ້ມຄອງ ແລະ ນໍາໃຊ້ທຸລະກິດຊັບສິນດີຈິຕອນ ໃຫ້ມີປະສິດທິຜົນ, ພັດທະນາການຄ້າເອເລັກໂຕຣນິກ ໃຫ້ເປັນຮູບປະທຳ, ຊຸກຍູ້ສົ່ງເສີມທຸລະກິດ ຂະໜາດກາງ, ຂະໜາດນ້ອຍ ແລະ ທຸລະກິດລິເລີ່ມ (ສະຕາດອັບ) ໃຫ້ນໍາໃຊ້ເຕັກໂນໂລຊີດີຈິຕອນ; ສ້າງລະບົບຄຸ້ມຄອງເອກະສານ ແລະ ບຸກຄະລາກອນ ຂອງພາກລັດແບບດີຈິຕອນ ໃຫ້ສໍາເລັດຢູ່ທຸກກະຊວງ, ອົງການ ແລະ ຫ້ອງວ່າການແຂວງໃນທົ່ວປະເທດ, ຫັນການບໍລິການຂອງລັດ ຜ່ານລະບົບອອນລາຍໃຫ້ໄດ້ 50%; ພັດທະນາໂຄງລ່າງພື້ນຖານດີຈິຕອນ, ສູນຂໍ້ມູນມະຫາສານ ແລະ ການເຊື່ອມຕໍ່ອິນເຕີເນັດຄວາມໄວສູງ, ຂະຫຍາຍສະຖານີ ຮັບ-ສົ່ງ ສັນຍານມືຖື ລະບົບ 4G ໃຫ້ໄດ້ 90% ແລະ 5G ໃຫ້ໄດ້ 50% ຂອງ ພື້ນທີ່ທົ່ວປະເທດ, ພັດທະນາຊັບພະຍາກອນມະນຸດ ໃຫ້ມີຄຸນນະພາບສູງຂຶ້ນ ໃຫ້ສາມາດຕອບສະໜອງຄວາມຕ້ອງການ ຂອງການພັດທະນາ, ສ້າງແຮງງານດ້ານເຕັກໂນໂລຊີດີຈິຕອນ ຈາກ 0,3% ໃຫ້ໄດ້ 1% ໃນປີ 2025, ເຮັດໃຫ້ ເສດຖະກິດດີຈິຕອນ ສາມາດສ້າງລາຍຮັບປະກອບເຂົ້າ GDP ຂອງປະເທດໃຫ້ໄດ້ 5%.

ສ່ວນເປົ້າໝາຍປີ 2030 ຈະສ້າງບາດກ້າວໃໝ່ດ້ວຍ ການນໍາໃຊ້ເຕັກໂນໂລຊີດີຈິຕອນ ເຂົ້າໃນບັນດາຂະແໜງການຕົ້ນຕໍ ໃນການພັດທະນາເສດຖະກິດ-ສັງຄົມ ເພື່ອເຮັດໃຫ້ ສປປ ລາວ ກາຍເປັນປະເທດກຳລັງພັດທະນາ ທີ່ມີລາຍຮັບປານກາງສູງ ຕາມເສດຖະກິດພູມປັນຍາ, ສີຂຽວ ແລະ ຍືນຍົງ. ສ້າງພື້ນຖານໂທລະຄົມມະນາຄົມທີ່ເຂັ້ມແຂງ, ສ້າງລະບົບອິນເຕີເນັດ ຄວາມໄວສູງ ແລະ ຮັບປະກັນໃຫ້ສັນຍານມືຖື ລະບົບ 5G ກວມເອົາ 100% ຂອງພື້ນທີ່ທົ່ວປະເທດ, ຫັນການບໍລິຫານ ແລະ ການບໍລິການຂອງລັດ ດ້ວຍລະບົບອອນລາຍ ໃຫ້ໄດ້ 100%, ພັດທະນາຊັບພະຍາກອນ ມະນຸດໃຫ້ມີຄຸນນະ ພາບສູງ ແລະ ມີຈໍານວນແຮງງານດ້ານດີຈິຕອນ ກວມເອົາ 2% ຂອງແຮງງານທັງໝົດ, ເຮັດໃຫ້ເສດ ຖະກິດດີຈິຕອນ ສ້າງລາຍຮັບໃຫ້ໄດ້ 7% ຂອງ GDP.

ສຳລັບ ເປົ້າໝາຍປີ 2040 ຈະນໍາໃຊ້ເຕັກໂນໂລຊີດີຈິຕອນ ຢ່າງກວ້າງຂວາງໃນທົ່ວສັງຄົມ ເພື່ອເປັນເຄື່ອງມື ສໍາຄັນໃນການຂັບເຄື່ອນທຸກຂະແໜ່ງການ ໃຫ້ມີການຂະຫຍາຍຕົວຢ່າງ ເຂັ້ມແຂງ ແລະ ຍືນຍົງ; ສ້າງພື້ນຖານການຜະລິດ ແລະ ການບໍລິຫານແບບອັດສະລິຍະ, ສ້າງຕົວເມືອງອັດສະລິຍະ ແລະ ເຮັດໃຫ້ເສດຖະກິດດີຈິຕອນ, ສ້າງລາຍຮັບໃຫ້ໄດ້ເຖິງ 10% ຂອງ GDP; ພັດທະນາຊັບພະຍາ ກອນມະນຸດ ໃຫ້ມີຄວາມຊ່ຽວຊານ ແລະ ສາມາດເປັນເຈົ້າເຕັກໂນໂລຊີດີຈິຕອນ ແລະ ສ້າງ ແຮງງານ ທີ່ມີທັກສະທາງດ້ານດີຈິຕອນ ກວມເອົາ 4% ຂອງແຮງງານທັງໝົດ.

ຂ່າວ: ທະນູທອງ

KPL