ຂປລ. ບົນເສັ້ນທາງແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວ ອົງການໄອຍະການປະຊາຊົນ ຕະຫລອດ 35 ປີ ຜ່ານມາ, ອົງການໄອຍະການປະຊາຊົນ ໃນແຕ່ລະຮຸ່ນ ສາມາດເຮັດຫລ້ອນໜ້າທີ່ ທີ່ພັກ ​ແລະ ປະຊາຊົນມອບໝາຍໃຫ້ ສາມາດປັບປຸງ ແລະ ພັດທະນາຕົນເອງ ໃຫ້ກາຍເປັນອົງການ ທີ່ເຂັ້ມແຂງທາງດ້ານການເມືອງ, ປະກອບສ່ວນອັນສຳຄັນ ເຂົ້າໃນການເພີ່ມທະວີ ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕາມແນວທາງຂອງພັກ ເຊິ່ງໄດ້ກາຍມາເປັນມູນເຊື້ອອັນດີງາມ ຂອງອົງການໄອຍະການປະຊາຊົນ ໃນການປົກປ້ອງ ກົດໝາຍ ແລະ ຄວາມຍຸຕິທຳໃນສັງຄົມ. 

ທ່ານ ສຸພາສິດ ລໍວັນໄຊ ຫົວໜ້າອົງການໄອຍະການປະຊາຊົນ ແຂວງອັດຕະປື ໄດ້ໃຫ້ສຳພາດ ໃນໂອກາດສະເຫລີມສະຫລອງ ວັນສ້າງຕັ້ງອົງການໄອຍະການປະຊາຊົນ ຄົບຮອບ 35 ປີ ເມື່ອບໍ່ດົນນີ້ວ່າ: 35 ປີ ອົງການໄອຍະການປະຊາຊົນ ໄດ້ເຕີບໃຫຍ່ຂະຫຍາຍຕົວ ທາງດ້ານປະລິມານ ແລະ ຄຸນນະ ພາບ ເຊິ່ງໄດ້ຜ່ານຜ່າບັນດາຄວາມ ຫຍຸ້ງຍາກ ແລະ ອຸປະສັກນາໆປະການ ທ່າມກາງສະພາບແວດລ້ອມຂອງພາກພື້ນ ແລະ ສາກົນ ໄດ້ຜັນແປໄປຢ່າງສະຫລັບສັບຊ້ອນ ມີທັງຂໍ້ສະດວກ ແລະ ຂໍ້ຫຍຸ້ງຍາກທົດສອບຫລາຍປະການ. ແຕ່ພາຍໃຕ້ການຊີ້ນຳຢ່າງໃກ້ຊິດຂອງ ກົມການເມືອງສູນກາງພັກ, ສະພາແຫ່ງຊາດ ແລະ ລັດຖະບານ ພວກເຮົາສາມາດຍາດໄດ້ຜົນງານ ອັນພົ້ນເດັ່ນໃນຫລາຍດ້ານ, ໄດ້ມີການປັບປຸງ ແລະ ມີບາດກ້າວໃໝ່ອັນຕັ້ງໜ້າ ໃນຫລາຍດ້ານ ໂດຍສະເພາະ ການພັດທະນາທາງ ດ້ານວິຊາສະເພາະ ຄື: ວຽກງານຕິດຕາມກວດກາທົ່ວໄປ, ວຽກງານຕິດຕາມກວດກາ ການປະຕິບັດກົດໝາຍ ຂອງອົງການ ສືບສວນ-ສອບສວນ, ວຽກງານຕິດຕາມກວດກາ ການປະຕິບັດກົດໝາຍ ໃນການດໍາເນີນຄະດີຢູ່ສານ, ວຽກງານຕິດຕາມກວດກາການປະຕິບັດກົດໝາຍ ໃນຄ້າຍຄຸມຂັງ-ດັດສ້າງ, ການສ້າງ ແລະ ປັບປຸງນິຕິກໍາ, ການພັດທະນາພື້ນຖານໂຄງລ່າງ, ວັດຖຸ, ເຕັກນິກ.

ທ່ານ ສຸພາສິດ ລໍວັນໄຊ ຍັງ​ໃຫ້​ຮູ້​ອີກວ່າ: ຕະຫລອດໄລຍະ 35 ປີ ອົງການໄອຍະການປະຊາ ຊົນ ໄດ້ມີຜົນງານພົ້ນເດັ່ນຫລາຍດ້ານ, ເປັນຂີດໝາຍສໍາຄັນຂອງພັກ, ລັດ ກໍຄື ຂອງປະເທດຊາດ, ຂອງປະຊາຊົນທີ່ໄດ້ມອບໝາຍໃຫ້ ກໍຄື ເຮັດໃຫ້ການເຄື່ອນໄຫວຂອງ ອົງການໄອຍະການແຂວງອັດຕະປື ໄດ້ເຕີບໃຫຍ່ຂະຫຍາຍຕົວເປັນກ້າວໆ. ສິ່ງສໍາຄັນທີ່ສຸດເຮັດໃຫ້ ພະນັກງານຢູ່ ໃນຂົງເຂດ ໄດ້ຈັດຕັ້ງປະຕິ ບັດກົດໝາຍເຊື່ອມຊຶມ ແລະ ກໍາແໜ້ນໄດ້ແນວທາງນະໂຍບາຍຂອງພັກ, ມີຄວາມໜັກແໜ້ນດ້ານການ ເມືອງແນວຄິດ ຕິດຈອດໃສ່ກັບວຽກງານ ການຈັດຕັ້ງປະຕິບັດວິຊາສະເພາະ ກໍຄື ວຽກງານກົດໝາຍ ໃນປັດຈຸບັນ ຖືວ່າການດໍາເນີນຄະດີອາຍາ ຫລື ການຕິດຕາມກວດກາ ການດໍາເນີນຄະດີອາຍາ ສາມາດປະຕິບັດໄດ້ເກີນ 95% ຂຶ້ນໄປໃນຂອບເຂດທົ່ວປະເທດ. ສໍາລັບຄະດີແພ່ງ ແມ່ນປະຕິບັດໄດ້ 98% ຂຶ້ນໄປ.

ສໍາລັບການຕິດຕາມກົດໝາຍທົ່ວສັງຄົມ ໂດຍສະເພາະ ແມ່ນເນັ້ນໃສ່ວຽກງານຕິດຕາມກວດກາ ກົດລະບຽບຂອງບ້ານ, ມີບາງເລື່ອງທີ່ກົດລະບຽບ ຂອງບ້ານຍັງບໍ່ທັນເປັນເອກະພາບກັນ ຕໍ່ກັບບັນຫາດັ່ງກ່າວ, ພະນັກງານໄອຍະການ ໄດ້ສຸມໃສ່ແກ້ໄຂ ໂດຍໄດ້ລົງໄປຊ່ວຍອໍານາດການປົກຄອງເມືອງ ເພື່ອອ້າງກົດລະບຽບຂອງບ້ານ ໃຫ້ເປັນເອກະພາບກັນ ໂດຍສະເພາະ ຢູ່ເມືອງສະໜາມໄຊ ແຂວງອັດຕະປື ເຊິ່ງຄະນະຮັບຜິດຊອບ ໄດ້ເຊີນເອົາບັນດາຄະນະເມືອງເຂົ້າມາປະຊຸມ ເພື່ອເຮັດໜ້າທີ່ໃນ ການຕິດຕາມກວດກາ ການປະຕິບັດກົດໝາຍໃຫ້ທົ່ວເຖິງ ແລະ ລົງທຶນບ້ານ.

ຂ່າວ: ກິດຕາ

KPL