KPL
ກະຊວງ ພາຍໃນ ອົດສະຕຣາລີ ຖະແຫລງການວ່າ: ນັບຕັ້ງແຕ່ ວັນທີ 1 ກໍລະກົດ ເປັນຕົ້ນໄປ ຄ່າວີຊາ ສໍາລັບ ນັກສຶກສາ ຕ່າງປະເທດ ໄດ້ປັບ ເພີ່ມຂຶ້ນ ຈາກ 710 ໂດລາ ອົດສະຕຣາລີ ມາເປັນ 1.600 ໂດລາ ອົດສະຕຣາລີ
ຂປລ.ຕາມຂ່າວຈາກ ຊິດນີ, ກະຊວງ ພາຍໃນ ອົດສະຕຣາລີ ຖະແຫລງການວ່າ:ນັບຕັ້ງແຕ່ ວັນທີ 1 ກໍລະກົດ ເປັນຕົ້ນໄປຄ່າວີຊາ ສໍາລັບ ນັກສຶກສາ ຕ່າງປະເທດ ໄດ້ປັບ ເພີ່ມຂຶ້ນ ຈາກ 710 ໂດລາ ອົດສະຕຣາລີ ມາເປັນ 1.600 ໂດລາ ອົດສະຕຣາລີ ສ່ວນຜູ້ຖື ວີຊາ ທ່ອງທ່ຽວ ແລະ ນັກສຶກສາ ທີ່ຖືວີຊາ ຊົ່ວຄາວ ຫລັງສຳເລັດ ການສຶກສາ ບໍ່ສາມາດ ຢືນຂໍວີຊາ ນັກສຶກສາ ຂະນະທີ່ຢູ່ ໃນອົດສະຕຣາລີໄດ້ ຊຶ່ງເປັນການປ່ຽນແປງ ທີ່ຈະຊ່ວຍຟື້ນຟູ ລະບົບ ການສຶກສາ ສາກົນ ຂອງອົດສະຕາຣາລີ ກັບຄືນມາ ເປັນປົກກະຕິ ອີກຄັ້ງ ແລະ ສ້າງລະບົບ ຄົນເຂົ້າເມືອງ ທີ່ຍຸຕິທຳ ແລະ ດີກວ່າ ສຳລັບ ອົດສະຕຣາລີ. ໃນປີງົບປະມານ ທີ່ສິ້ນສຸດ ໃນວັນທີ 30 ກັນຍາ 2023.ອົດສະຕຣາລີ ມີຄົນເຂົ້າເມືອງ ເພີ່ມຂຶ້ນ 60% ຈຳນວນ 548.800 ຄົນ ໃນປີ 2022-2023, ນັກສຶກສາ ຕ່າງປະເທດ ທີ່ຍື່ນຂໍ ວີຊາໃໝ່ ໃນຂະນະທີ່ຢູ່ ໃນອົດສະຕຣາລີ ເພີ່ມຂຶ້ນ ຫລາຍກວ່າ 30%ຫລຍກວ່າ 150.000 ຄົນ.ນະໂຍບາຍນີ້ ບໍ່ເປັນຜົນດີ ຕໍ່ວິທະຍາໄລ ແລະ ເສດຖະກິດ ອົດສະຕຣາລີ ເພາະລາຍໄດ້ ຈາກນັກສຶກສາ ຕ່າງປະເທດ ເປັນ 1 ໃນອຸດສາຫະກຳ ການສົ່ງອອກ ໃຫຍ່ທີ່ສຸດຂອງປະເທດ ມີມູນຄ່າສູງເຖິງ 36,4ຕື້ໂດລາ ອົດສະຕຣາລີ ໃນປີ ງົບປະມານ 2022- 2023./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
