KPL
ຂປລ. ລັດຖະບານ ສາທາລະນະລັດ ສະຫະພັນ ເຢຍລະມັນ ໃຫ້ທຶນສະໜັບສະໜູນ ກ່ຽວກັບການສ້າງຄວາມເຂັ້ມແຂງ ໃຫ້ແກ່ວຽກງານ ຕິດຕາມກວດກາ ຂອງສະພາແຫ່ງຊາດ ແລະ ການປະສານງານ ຂອງອົງການກວດສອບແຫ່ງລັດ ແຫ່ງ ສປປ ລາວ ລວມມູນຄ່າ 1 ຕື້ກວ່າກີບ ຫລື 125.000 ໂດລາສະຫະລັດ.
ຂປລ. ລັດຖະບານ ສາທາລະນະລັດ ສະຫະພັນ ເຢຍລະມັນ ໃຫ້ທຶນສະໜັບສະໜູນ ກ່ຽວກັບການສ້າງຄວາມເຂັ້ມແຂງ ໃຫ້ແກ່ວຽກງານຕິດຕາມກວດກາ ຂອງສະພາແຫ່ງຊາດ ແລະ ການປະສານງານ ຂອງອົງການກວດສອບແຫ່ງລັດ ແຫ່ງ ສປປ ລາວ ລວມມູນຄ່າ 1 ຕື້ກວ່າກີບ ຫລື 125.000 ໂດລາສະຫະລັດ. ພິທີເຊັນສັນຍາ ໄດ້ມີຂຶ້ນໃນວັນທີ 19 ມີນາ 2015 ຢູ່ຫໍສະພາແຫ່ງຊາດ ລະຫວ່າງ ທ່ານ ທ່ານ ດຣ.ບຸນທັນ ບຸນວິໄລ ຫົວໜ້າໂຄງການຄຸ້ມຄອງ ການຮ່ວມມືສາກົນ ສະພາແຫ່ງຊາດ (ICPMS) ແລະ ທ່ານ ເອີນ ຮູສຕາ Ernst Hustaedt ຜູ້ອໍານວຍການ ອົງການຮ່ວມມືເພື່ອການພັດທະນາ ປະຈໍາພາກພື້ນອາຊີ ຂອງປະເທດ ເຢຍລະມັນ (GIZ) ໂດຍມີທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ທ່ານ Micheal Grau ເອກອັກຄະລັດ ຖະທູດວິສາມັນ ຜູ້ມີອໍານາດເຕັມແຫ່ງ ສາທາລະນະລັດ ສະຫະພັນ ເຢຍລະມັນ ປະຈໍາ ສປປ ລາວ, ມີບັນດາຫົວໜ້າກົມ-ຮອງກົມ ພ້ອມດ້ວຍພາກສ່ວນທີ່ກ່ຽວຂ້ອງ ທັງສອງຝ່າຍ ເຂົ້າຮ່ວມ ເປັນສັກຂີພິຍານ.
ຈຸດປະສົງຂອງໂຄງການ ແມ່ນເພື່ອແນ່ໃສ່ປັບປຸງ ການຕິດຕາມກວດກາ ຂອງສະພາແຫ່ງຊາດ ແລະ ການປະສານງານ ຂອງອົງການກວດສອບແຫ່ງລັດ. ສ້າງຂີດຄວາມສາມາດ ທາງດ້ານວິຊາການໃຫ້ແກ່ພະນັກງານ ວິຊາການທັງສູນກາງ ແລະ ທ້ອງຖິ່ນ ໃນການຍົກລະດັບຄວາມຮູ້, ຄວາມສາມາດ ແລະ ປະສົບການ ລະຫວ່າງ ສະຖາບັນກວດສອບຂອງບັນດາ ປະເທດສະມາຊິກອາຊຽນ, ນັກວິຊາການ ໂດຍມີເປົ້າໝາຍເຮັດໃຫ້ບັນດາປະເທດອາຊຽນ ເປັນພາກພື້ນທີ່ຮັບປະກັນການຄຸ້ມຄອງນໍາໃຊ້ງົບປະມານຂອງລັດ ໃຫ້ມີປະສິດທິພາບ, ປະສິດທິຜົນ, ໂປ່ງໃສ ແລະ ເປັນປະໂຫຍດສູງສຸດໃຫ້ແກ່ປະເທດຊາດ. /.
KPL
