ຂປລ. ໃນວັນທີ 13 ພະຈິກ 2024, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ພ້ອມດ້ວຍການນໍານະຄອນຫລວງວຽງຈັນ ແລະ ຄະນະ ໄດ້ຢ້ຽມຊົມບຸນນະມັດສະການ ພະທາດຫລວງວຽງຈັນ ເປັນຕົ້ນ ຢ້ຽມຊົມຫ້ອງວາງສະແດງ ຮູບພາບປະຫວັດສາດພະທາດຫລວງ ແລະ ຮ້ານວາງສະແດງສິນຄ້າ ຜະລິດຕະພັນລາວ.

ໃນໂອກາດນີ້, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ໄດ້ລາຍງານວ່າ: ບຸນນະມັດສະການພະທາດຫລວງ ແລະ ງານວາງສະແດງສິນຄ້າ ປະຈຳປີ 2024 ໄດ້ມີຮ້ານວາງ ສະແດງສິນຄ້າ ຢູ່ເດີນສະໜາມຫລວງ 1.463 ຫ້ອງ, ຢູ່ສູນການຄ້າລາວ-ໄອເຕັກ 142 ຮ້ານ ສິນຄ້າສ່ວນຫລາຍເປັນຜະລິດຕະພັນ ສິນຄ້າພາຍໃນເປັນຕົ້ນຕໍ ເຊັ່ນ: ຜະລິດຕະພັນສິນຄ້າກະສິກຳ; ຫັດຖະກຳ ແລະ ຜະລິດຕະພັນວັດທະນະທຳ; ຜະລິດຕະພັນອຸດສາຫະກຳໂຮງຈັກ, ໂຮງງານຂະໜາດໃຫຍ່, ກາງ ແລະ ຂະໜາດນ້ອຍ ພ້ອມນີ້, ຍັງໄດ້ເຊີນ ບັນດານະຄອນ, ແຂວງເພື່ອນມິດຕ່າງປະເທດ ເຂົ້າມາຮ່ວມງານຕື່ມອີກ ເພື່ອສ້າງເງື່ອນໄຂ ໃຫ້ມີການນຳເອົາຜະລິດຕະພັນສິນຄ້າມາແລກປ່ຽນ ວາງສະແດງ ແລະ ຂາຍຢູ່ພາຍໃນງານຄັ້ງນີ້ ຊຶ່ງມີ 2 ນະຄອນ ເຂົ້າຮ່ວມຄື: ແຂວງຢຸນນານ ສປ ຈີນ ແລະ ແຂວງໜອງຄາຍ ປະເທດໄທ. ພາຍໃນບຸນນະມັດສະການພະທາດຫລວງ ປີນີ້ ໄດ້ຈັດໃຫ້ມີຫລາກຫລາຍກິດຈະກຳ ທີ່ໜ້າທ່ຽວຊົມ ເປັນຕົ້ນ ມີເຮືອນຊົງລາວ, ມີຮ້ານວາງສະແດງສິນຄ້າ ເຄື່ອງອຸປະໂພກ-ບໍລິໂພກ, ມີອາຫານພື້ນບ້ານ ປະເພດເຂົ້າຫລາມ, ປີ້ງໄກ່, ອາຫານລາວຈຳນວນໜຶ່ງ. ນອກຈາກນີ້, ໃນແຕ່ລະມື້ ຍັງມີການ ສະແດງສິລະປະວັນນະຄະດີ (ເວທີກາງ) ການສະແດງການຟ້ອນ, ຂັບລຳຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກບັນດາເມືອງ, ສູນວັດທະນະທຳເດັກ ແລະ ສະໂມສອນດ່ານຊ້າງ. ທັງນີ້, ແນໃສ່ກໍເພື່ອເປັນການສົ່ງເສີມ ວັດທະນະທຳ ຮີດຄອງປະເພນີອັນດີງາມຂອງຊາດ ໃຫ້ຄົງຢູ່ຄູ່ກັບຄົນລາວ ແລະ ຊາດລາວ ຕະຫລອດໄປ ທັງເປັນການຊຸກຍູ້ ສົ່ງເສີມການທ່ອງທ່ຽວ ທາງດ້ານວັດທະນະທຳ ແລະ ປະຫວັດສາດຂອງຊາດ.

ບຸນນະມັດສະການພະທາດຫລວງ ເປັນປາງບຸນປະເພນີໃຫຍ່ສຳຄັນ, ເປັນສູນກາງເຕົ້າໂຮມຄວາມສາມັກຄີ ຂອງປວງຊົນລາວບັນດາເຜົ່າ ແລະ ຂໍເຊີນຊວນປະຊາຊົນລາວບັນດາເຜົ່າ, ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າຮ່ວມທ່ຽວຊົມ ແລະ ເຂົ້າຮ່ວມກິດຈະກຳຕ່າງໆ ໃນງານຄັ້ງນີ້ ດ້ວຍຄວາມເບີກບານມ່ວນຊື່ນ ພ້ອມທັງປະຕິບັດ ຕາມຮີດຄອງປະເພນີ ອັນດີງາມຂອງຊາດລາວ ແລະ ປະຕິບັດຕາມກົດລະບຽບ ຂອງງານຢ່າງເຂັ້ມງວດ ເພື່ອເຮັດໃຫ້ບຸນນະມັດສະການພະທາດຫລວງ ໃນຄັ້ງນີ້ ດຳເນີນໄປດ້ວຍບັນຍາກາດ ອັນຄຶກຄື້ນຮັກສາໄດ້ ຄວາມສະຫງົບ ແລະ ປອດໄພ.

KPL