ຂປລ. ໃນວັນທີ 12 ພະຈິກ 2024 ຜ່ານມາ, ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ (ຜທ) ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ຕິດຕາມ ການຈັດຕັ້ງປະຕິບັດວຽກງານ ຢູ່ເມືອງວຽງໄຊ ແຂວງຫົວພັນ.

ໂອກາດນີ້, ທ່ານ ສິງວົງໄຊ ສຸລິວົງພັນ ວ່າການເຈົ້າເມືອງ ເມືອງວຽງໄຊ ໄດ້ໃຫ້ຮູ້ກ່ຽວກັບສະພາບຈຸດພິເສດ ໂດຍລວມຂອງເມືອງວຽງໄຊ ເຊິ່ງການຂະຫຍາຍຕົວ ດ້ານເສດຖະກິດຂອງ ເມືອງ ວຽງໄຊ ຢູ່ໃນລະດັບ 4,5%/ປີ, ລວມຍອດຜະລິດຕະພັນພາຍໃນ ຫລື GDP ບັນລຸໄດ້ 185,26 ຕື້ກີບ ສະເລ່ຍໃສ່ຫົວຄົນຜູ້ໜຶ່ງໄດ້ 5.937.820 ກີບ/ຄົນ/ປີ ທຽບແຜນການ 5 ປີ ປະຕິບັດໄດ້ 74,51%. ໃນນັ້ນ, ຂະແໜງກະສິກຳ ແລະ ປ່າໄມ້ ກວມເອົາ 67,63% ຂອງ GDP, ຂະແໜງອຸດສາຫະກຳ ກວມເອົາ 17,57% ຂອງ GDP, ຂະແໜງການບໍລິການ ກວມເອົາ 14,80% ຂອງ GDP. ພ້ອມນີ້, ເມືອງວຽງໄຊ ຍັງໄດ້ສຸມໃສ່ປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດການເງິນ ແຕ່ລະຂົງເຂດ ໄດ້ຜັນຂະຫຍາຍເປັນອັນລະອຽດ ຂອງແຕ່ລະຂະແໜງການ. ສັງລວມແລ້ວ, ພື້ນຖານໂຄງລ່າງໄດ້ຮັບການພັດທະນາ ເຊັ່ນ: ທຸກບ້ານໄດ້ມີທາງເຂົ້າເຖິງທຸກບ້ານ ໃນນັ້ນ, ສາມາດທ່ຽວໄດ້ 2 ລະດູ ມີ 64 ບ້ານ ແລະ ທົ່ວເມືອງ ມີຊົນລະປະທານ 613 ແຫ່ງ ສະດວກໃນ ການປູກຝັງໄດ້ 2 ລະດູ ເຊັ່ນ: ຂະແໜງກະສິກຳ ແລະ ປ່າໄມ້ ໄດ້ຊຸກຍູ້ການປູກຝັງລ້ຽງສັດ ແລະ ປູກພືດເປັນສິນຄ້າ ເພື່ອທົດແທນການນໍາເຂົ້າ, ຂະແໜງການເງິນ ໄດ້ຜັນຂະຫຍາຍເຜີຍແຜ່ລະບຽບການປະຢັດ ຕ້ານການພູມເຟືອຍ   ນັບທັງຫ້ອງການບໍລິຫານລັດ ແລະ ນິຕິບຸກຄົນ, ໄດ້ເກັບກໍາຖານຂໍ້ມູນລາຍຮັບໃນທົ່ວເມືອງ ຈາກທຸກພາກສ່ວນທີ່ມີລາຍຮັບ, ໄດ້ເອົາໃຈໃສ່ຄຸ້ມຄອງທີ່ດິນ ຮັບປະກັນບໍ່ທໍາລາຍສິ່ງແວດລ້ອມ ໃຫ້ໄປຕາມທິດສີຂຽວຍືນຍົງ, ສໍາຫລວດວັດ ແທກອອກໃບຕາດິນເປັນລະບົບຕາມບ້ານຈຸດສຸມຂອງໂຄງການ, ເອົາໃຈໃສ່ຄຸ້ມຄອງລາຄາສິນຄ້າ ໃຫ້ເຂົ້າສູ່ລະບຽບກົດໝາຍ, ໄດ້ລົງຕິດຕາມ ກວດກາ ແລະ ຊຸກຍູ້ບັນດາບໍລິສັດ ທີ່ເຂົ້າມາລົງທຶນກ່ຽວກັບແຮ່ທາດ ຢູ່ພາຍໃນເມືອວຽງໄຊ, ໄດ້ຄຸ້ມຄອງການລົງທຶນຂອງລັດ ແລະ ເອກະຊົນໃນການລົງທຶນຕ່າງໆເຂົ້າສູ່ລະບຽບກົດໝາຍ ມາຮອດປັດຈຸ ບັນ ສາມາດເກັບລາຍຮັບເຂົ້າງົບປະມານໄດ້ 95% ຂອງແຜນການປີ.

ໂອກາດນນີ້, ທ່ານ ເພັດ ພົມພີພັກ ກໍໄດ້ມີຄຳເຫັນສະເໜີຄະນະນໍາ ຂອງເມືອງນໍາໃຊ້ທ່າແຮງ ທີ່ເປັນມູນເຊື້ອການຜະລິດຂອງປະຊາຊົນ, ທ່າແຮງທາງປະຫວັດສາດ, ວັດທະນະທຳ ເປັນພື້ນຖານໃນການພັດທະນາເສດຖະກິດ, ສ້າງແຜນໂຄງການ ການປັບປຸງພື້ນຖານໂຄງລ່າງຂອງເມືອງ ເພື່ອເປັນເມືອງທ່ອງທ່ຽວ ປະຫວັດສາດ ແລະ ສີຂຽວ, ສົ່ງເສີມຊຸກຍູ້ໃຫ້ມີ ການຜະລິດດ້ານກະສິກຳ, ປູກຝັງລ້ຽງສັດ ແລະ ການບໍລິການດ້ານການທ່ອງທ່ຽວທາງປະຫວັດ ສາດ, ເມືອງສີຂຽວສະອາດ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ.

ໃນໂອກາດນີ້, ທ່ານລັດຖະມົນຕີກະຊວງແຜນການ ແລະ ການລົງທຶນ ໄດ້ມອບເງິນ ຈຳນວນ 100 ລ້ານກີບ ໃຫ້ເມືອງວຽງໄຊ ເພື່ອປະກອບສ່ວນ ໃນການປັບປຸງພື້ນຖານໂຄງລ່າງ ການພັດທະນາຂອງເມືອງ.

ພາຍຫລັງສຳເລັດການເຮັດວຽກຢູ່ທີ່ເມືອງວຽງໄຊ, ທ່ານ ເພັດ ພົມພິພັກ ພ້ອມຄະນະ ໄດ້ສືບຕໍ່ລົງຕິດຕາມ ຊຸກຍູ້ ການຈັດຕັ້ງປະຕິບັດໂຄງການຂຸດຄົ້ນ ແລະ ປຸງແຕ່ງແຮ່ມັງການ ຢູ່ເຂດບ້ານຫົວຄັງ ເມືອງຊໍາເໜືອ ແຂວງຫົວພັນ ໃນເນື້ອທີ່ 80 ເຮັກຕາ ພາຍຫລັງບໍລິສັດໄດ້ຮັບ ການພິຈາລະນາສັນຍາຂຸດຄົ້ນ ໃນປີ 2022 ບໍລິສັດໄດ້ກໍ່ ສ້າງໂຮງງານປຸງແຕ່ງ ເພື່ອຮັບຮອງໃນການປຸງແຕ່ງແຮ່ມັງການ ສົ່ງອອກຈຳໜ່າຍຕ່າງປະເທດ. ປັດຈຸບັນ ສາມາດຂຸດຄົ້ນແຮ່ມັງການດິບ ອອກມາແລ້ວ 50.000 ກວ່າໂຕນ ແລະ ສາມາດປຸງແຕ່ງແຮ່ມັງການ ພ້ອມສົ່ງອອກຈໍາໜ່າຍ 10.000 ກວ່າໂຕນ ຖ້າທຽບເປັນສ່ວນຮ້ອຍ ໄດ້ພຽງແຕ່ 10%-15% ຂອງເນື້ອທີ່ 5 ເຮັກຕາ ແລະ ໄດ້ເຊັນສັນຍາຊື້-ຂາຍ ແຮ່ມັງການ ອອກໄປ ສປ ຈີນ ແລ້ວ ຈໍານວນ 7000 ໂຕນ. ໃນປີ 2025 ນີ້ ບໍລິສັດຈະສູ້ຊົນໃຫ້ໄດ້ສົ່ງອອກປະມານ 50.000 ໂຕນ/ປີ.

ຂ່າວ-ພາບ: ກະຊວງ ຜທ

KPL