KPL
ຂປລ. ພິທີແຫ່ຜາສາດເຜິ້ງ ບຸນນະມັດສະການພະທາດຫລວງວຽງຈັນ ປະຈຳປີ 2024 ຈັດຂຶ້ນດ້ວຍບັນຍາກາດຄຶກຄື້ນມ່ວນຊື່ນ, ສອດຄອງກັບວັດທະນະທຳ, ຮີດຄອງປະເພນີ ອັນດີງາມຂອງຊາດເຮົາ ທີ່ໄດ້ປະຕິບັດກັນມາໃນແຕ່ລະປີ ແລະ ໃນປີນີ້, ແມ່ນຖືກມື້ຂຶ້ນ 14 ຄໍ່າ ເດືອນ 12 ລາວ, ກົງກັບວັນທີ 14 ພະຈິກ 2024
ຂປລ. ພິທີແຫ່ຜາສາດເຜິ້ງ ບຸນນະມັດສະການພະທາດຫລວງວຽງຈັນ ປະຈຳປີ 2024 ຈັດຂຶ້ນດ້ວຍບັນຍາກາດຄຶກຄື້ນມ່ວນຊື່ນ, ສອດຄອງກັບວັດທະນະທຳ, ຮີດຄອງປະເພນີ ອັນດີງາມຂອງຊາດເຮົາ ທີ່ໄດ້ປະຕິບັດກັນມາໃນແຕ່ລະປີ ແລະ ໃນປີນີ້, ແມ່ນຖືກມື້ຂຶ້ນ 14 ຄໍ່າ ເດືອນ 12 ລາວ, ກົງກັບວັນທີ 14 ພະຈິກ 2024 ໂດຍມີຂະບວນພະສົງອອກໜ້າ ແລະ ການນຳພັກ-ລັດ ນຳພາໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນ ຫລວງວຽງຈັນ ພ້ອມດ້ວຍພັນລະຍາ, ທ່ານ ນາງອິນລາວັນ ແກ້ວບຸນພັນ ຮອງປະທານສູນກາງແນວລາວສ້າງຊາດ ພ້ອມດ້ວຍການນໍາພັກ, ລັດ, ມີພີ່ນ້ອງເຊື້ອຊາດລາວ ທີ່ດຳລົງຊີວິດຢູ່ຕ່າງປະເທດ, ພີ່ນ້ອງເຊື້ອຊາດລາວທີ່ດຳລົງຊີ ວິດ ແລະ ເຮັດທຸລະກິດຢູ່ ສປປ ລາວ ແລະ ພຸດທະສາສະນິກະຊົນ ລາວບັນດາເຜົ່າ ກໍຄື ປະຊາຊົນພາຍໃນນະ ຄອນຫລວງວຽງຈັນ ເຂົ້າຮ່ວມ.
ໃນມື້ແຫ່ຜາສາດເຜິ້ງ, ປະຊາຊົນລາວ ໄດ້ພ້ອມຈິດພ້ອມໃຈກັນ ປະດິດຕົ້ນເຜິ້ງ ຂອງໃຜລາວ, ບາງບ້ານບາງເມືອງ ປະດິດສ້າງຕົ້ນເຜິ້ງ ຂະໜາດໃຫຍ່ ເປັນຮູບຄື ຜາສາດ ໂດຍໃຊ້ຫລາຍຄົນແບກຫາມ, ສ່ວນຂະບວນ ແຫ່ກໍມີສີສັນແຕກຕ່າງກັນຄື: ມີຂະບວນຊຸດຊົນເຜົ່າ, ຕຳເຂົ້າ, ເປົ່າແຄນ, ຕີກອງ, ຕີແຊ່ງ ແລະ ລຳເຊີ້ງ ເມື່ອໄປຮອດ ເດີ່ນພະທາດຫລວງ ຂະບວນໄດ້ໄຫລໄປແບບຊ້າໆ ຕາມຄວາມຄວາມອັ່ງອໍ ຂອງຜູ້ສັດທາ, ແຕ່ຜູ້ຄົນກໍຍັງຍິ້ມ ແຍ້ມແຈ່ມໃສ ແລະ ຖາມໄຖ່ກັນ ເໝືອນດັ່ງພີ່ນ້ອງໃນຄອບຄົວ. ຈາກນັ້ນ, ກໍຍ່າງອ້ອມກົມມະລຽນ ພະທາດຫລວງ ແລະ ວາງຕົ້ນເຜິ້ງເພື່ອເປັນການບູຊາ, ອະທິຖານຕໍ່ໜ້າພະທາດຫລວງ ແລະ ຂໍພອນຕາມຄວາມເຊື່ອຖືຂອງຊາວລາວ ເຮັດໃຫ້ຂະບວນການແຫ່ຜາສາດເຜິ້ງ ໄດ້ຮັບຄວາມສົນໃຈ ຈາກບັນດານັກທ່ອງທ່ຽວ ທັງພາຍໃນ ແລະ ຕ່າງປະເທດ.
ປະເພນີແຫ່ຜາສາດເຜິ້ງ ເປັນພິທີກໍາທາງສາສະໜາ ແມ່ນວັດທະນະທໍາອັນດີງາມ ທີ່ສະແດງເຖິງຄວາມພາກພຽນ ການປະດິດຄິດສ້າງ ແລະ ການເຕົ້າໂຮມຄວາມສາມັກຄີ ຂອງປະຊາຊົນລາວບັນດາເຜົ່າ ໂດຍສະເພາະ ແມ່ນປະຊາຊົນຊາວນະຄອນຫລວງວຽງຈັນ ທີ່ສືບທອດກັນມາແຕ່ບູຮານນະການ ໂດຍແຕ່ລະປີ ໄດ້ມີການຈັດຂຶ້ນ ໃນມື້ຂຶ້ນ 14 ຄ່ຳເດືອນ 12 ຂອງງານສະເຫລີມສະຫລອງ ບຸນນະມັດສະການ ພະທາດຫລວງວຽງຈັນ ເພື່ອເປັນການສືບສານວັດທະນະທໍາອັນດີງາມ ໃຫ້ຄົງຢູ່ຄູ່ກັບປະຊາຊົນລາວຕະຫລອດໄປ.
ຂ່າວ: ກິດຕາ
KPL
