ຂປລ. ຄະນະກຳມະການຄຸ້ມຄອງ ໄພພິບັດຂັ້ນສູນກາງ (ຄພສ) ຈັດກອງປະຊຸມປຶກສາຫາລື ເອກະພາບກ່ຽວກັບ ການປະເມີນຜົນກະທົບ, ຜົນເສຍຫາຍ ແລະ ການສະເໜີຂໍການຟື້ນຟູສຸກເສີນ ໃຫ້ບັນດາແຂວງທີ່ໄດ້ຮັບຜົນກະທົບຈາກໄພພິບັດ ໃນໄລຍະທ້າຍເດືອນກໍລະກົດ ເຖິງເດືອນກັນຍາ 2024 ໃນວັນທີ 13 ພະຈິກ 2024 ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ, ມີຄະນະລັດຖະມົນຕີ, ຮອງປະທານຜູ້ປະຈຳການຄະນະກຳມະການ ຄພສ, ຮອງປະທານຄະນະກຳມະການ ຄພສ, ຄະນະກຳມະການ ຄພສ ແລະ ບັນດາຜູ້ປະສານງານຄະນະກຳມະການ ຄພສ ເຂົ້າຮ່ວມ.

ສະຫາຍ ວົງຄໍາ ພັນທະນຸວົງ ຫົວໜ້າກົມສັງຄົມສົງເຄາະ, ຫົວໜ້າກອງເລຂາ ຄພສ ໄດ້ລາຍງານການປະເມີນຜົນກະທົບ, ຜົນເສຍຫາຍ ແລະ ການສະເໜີຂໍການຟື້ນຟູສຸກເສີນ ໃຫ້ແກ່ບັນດາແຂວງທີ່ໄດ້ຮັບຜົນກະທົບ ຈາກໄພພິບັດໃນໄລຍະທ້າຍ ເດືອນກໍລະກົດ ເຖິງ ເດືອນສິງຫາ 2023 ບັນດາແຂວງພາກເໜືອ, ພາກກາງ ແລະ ພາກໃຕ້ ເຮັດໃຫ້ນໍ້າຫລາຍສາຂາ ມີລະດັບນນໍ້າສູງຂຶ້ນຢ່າງໄວ ແລະ ລົ້ນຕາຝັ່ງເຂົ້າຖ້ວມພື້ນທີ່ທໍາການຜະລິດ, ພື້ນຖານໂຄງລ່າງ ແລະ ທີ່ຢູ່ອາໄສຂອງປະຊາຊົນ ໄດ້ຮັບຜົນກະທົບ ຢູ່ 16 ແຂວງ ແລະ ນະຄອນຫລວງວຽງຈັນ ຄື: ນະຄອນຫລວງວຽງຈັນ, ແຂວງບໍລິຄຳໄຊ, ວຽງຈັນ, ຄຳມ່ວນ, ອຸດົມໄຊ, ຫລວງນໍ້ທາ, ບໍ່ແກ້ວ, ຜົ້ງສາລີ, ຫລວງພະບາງ, ຫົວພັນ, ໄຊຍະບູລີ, ຊຽງຂວາງ, ສາລະວັນ, ສະຫວັນນະເຂດ, ຈຳປາສັກ, ເຊກອງ ແລະ ແຂວງໄຊສົມບູນ, ສົ່ງຜົນກະທົບໂດຍກົງຕໍ່ລະບົບພື້ນຖານໂຄງລ່າງ, ໄດ້ຮັບຜົນເສຍຫາຍ 89 ເມືອງ, 1.167 ບ້ານ, 54.314 ຄອບຄົວ, 255.933 ຄົນ, ຍິງ 177. 259 ຄົນ ແລະ ເສຍຊີວິດ 13 ຄົນ, ສ້າງຄວາມເສຍຫາຍ ຕໍ່ໂຄງລ່າງພື້ນຖານທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ, ຄິດເປັນມູນຄ່າເສຍຫາຍ ທັງໝົດ 6.715 ຕື້ກວ່າກີບ.

ຕໍ່ກັບສະພາບການດັ່ງກ່າວ, ລັດຖະບານ ກໍຄື ຄະນະກໍາມະການ ຄຸ້ມຄອງໄພພິບັດຂັ້ນສູນກາງ ໄດ້ມີການລົງຊຸກຍູ້ ແລະ ໃຫ້ການຊ່ວຍເຫລືອ ແກ້ໄຂສຸກເສີນໃຫ້ກັບທ້ອງຖິ່ນ ແລະ ຕິດຕາມຊຸກຍູ້ຢ່າງໃກ້ຊິດ, ໄດ້ມີການຊີ້ນໍາໃຫ້ ກອງເລຂາຄະນະກຳມະການ ຄຸ້ມຄອງໄພພິບັດຂັ້ນສູນກາງ, ຮ່ວມກັບບັນດາກະຊວງ ແລະ ຂະແໜງການ ຢູ່ໃນຄະນະກໍາມະການຄຸ້ມຄອງໄພພິບັດ ລົງສົມທົບກັບຄະນະ ກຳມະການຄຸ້ມຄອງໄພພິບັດຂັ້ນແຂວງ ທີ່ໄດ້ຮັບຜົນກະທົບຈາກໄພພິບັດ ໃນການປະເມີນຜົນເສຍຫາຍ, ຄວາມຕ້ອງການໃນການຟື້ນຟູສຸກເສີນ ແລະ ໄລຍະຍາວຢູ່ 5 ແຂວງ ທີ່ໄດ້ຮັບຜົນກະທົບໜັກ ແລະ ບັນດາແຂວງທີ່ໄດ້ຮັບຜົນກະທົບ ກໍໄດ້ມີການປະເມີນຜົນ ແລະ ລາຍງານມາຍັງຄະນະ ກຳຄຸ້ມຄອງໄພພິບັດຂັ້ນສູນກາງ. ພ້ອມນີ້, ກໍໄດ້ມີການປະກອບສ່ວນຈາກສັງຄົມ ເຊິ່ງໃນໄລຍະເກີດເຫດໄພພິບັດ ແລະ ຄະນະນຳພາກສ່ວນຕ່າງໆ ກໍໄດ້ເຄື່ອນໄຫວມອບເຄື່ອງ ແລະ ມອບເງິນຊ່ວຍເຫລືອ ເຊິ່ງນຳໂດຍ ຄະນະ ນາ ຍົກລັດຖະມົນຕີ, ຮອງນາຍົກລັດຖະມົນຕີ, ບັນດາລັດຖະມົນຕີ, ຄະນະ ຄພສ. ນອກນີ້, ກະຊວງການເງິນ ກໍອະນຸມັດບ້ວງແຮລັດຖະບານ ເຂົ້າກອງທຶນຄຸ້ມຄອງໄພພິບັດຂັ້ນສູນກາງ ຈໍານວນ 20 ຕື້ກີບ.

ກອງປະຊຸມໃນຄັ້ງນີ້, ກໍເພື່ອປຶກສາຫາລືຮ່ວມກັນ ໂດຍສະເພາະ ການເອກະພາບໃນການແກ້ໄຂ ສຸກເສີນ ໃຫ້ແຂວງຫລວງນໍ້າທາ, ແຂວງຫົວພັນ ທີ່ທາງສູນກາງໄດ້ລົງສົມທົບກັບ ຄະນະກໍາມະການແຂວງ ໃນການປະເມີນຜົນ ແລະ ບັນດາແຂວງທີ່ມີການລາຍງານ ຜົນການປະເມີນໃຫ້ສູນກາງ ເຊິ່ງນໍາມາຜ່ານໃນກອງປະຊຸມໃນຄັ້ງນີ້, ໃຫ້ບັນດາຂະແໜງ ການໃນຄະນະກຳມະການ  ພິຈາລະນາຕາມພາລະບົດບາດໜ້າທີ່ ຄວາມຮັບຜິດຊອບຂອງຕົນ ໂດຍສະເພາະ ຂໍ້ມູນການລາຍງານແກ້ໄຂ ຂະແໜງການໃນສາຍຕັ້ງຂອງຕົນ ແລະ ການສັງລວມລາຍງານ ບັນດາຜົນເສຍຫາຍທີ່ເກີດຂຶ້ນໃນບັນດາແຂວງ ໃຫ້ມີຄວາມກົງກັນກັບການສັງລວມລາຍງານຂອງ ກອງເລຂາຄະນະ ກຳມະການຄຸ້ມຄອງໄພພິ ບັດ, ເນື່ອງຈາກເຫັນໄດ້ຄວາມສຳຄັນ ໃນການຟື້ນຟູພື້ນຖານໂຄງລ່າງທີ່ຈຳເປັນ ແນໃສ່ຮັບປະກັນໃຫ້ແກ່ການດຳລົງຊີວິດ ແລະ ການທຳການຜະລິດຄືນໃໝ່ ຂອງບັນດາແຂວງທີ່ໄດ້ຮັບຜົນກະທົບ ເພື່ອໄດ້ຮັບການແກ້ໄຂຟື້ນຟູ ຫລັງຈາກການລາຍງານໃນຄັ້ງນີ້ແລ້ວ, ກອງເລຂາ ຄພສ ຈະໄດ້ຮ່າງລາຍງານໃນນາມ ປະທານຄະນະກຳມະການເຖິງ ລັດຖະບານ ເພື່ອພິຈາລະນາ ແກ້ໄຂບັນດາໂຄງການສຸກເສີນ ທີ່ມີຄວາມຈໍາເປັນ ທີ່ອາດເຮັດໃຫ້ປະຊາຊົນມີຄວາມຫຍຸ້ງຍາກໃນການດຳລົງຊີວິດ.

ຂໍ້ມູນ-ພາບ: ໜັງສືພິມກອງທັບ

KPL