ຂປລ. ພິທີເປີດຊຸດຮຽນທິດສະດີ ການເມືອງຂັ້ນຕົ້ນ ຊຸດທີ 2 ຂອງກະຊວງຖະແຫລງຂ່າວ, ວັດທະນາທຳ ແລະ ທ່ອງທ່ຽວ(ຖວທ) ໃຫ້ສະມາຊິກພັກ, ພະນັກງານສືບທອດ ຈຳນວນ 40 ສະຫາຍ, ຍິງ 16 ສະຫາຍ ຈັດຂຶ້ນໃນວັນທີ 14 ພະຈິກ 2024 ໂດຍມີ ສະຫາຍ ວັນສີ ກົວມົວ ກຳມະການສໍາຮອງສູນກາງພັກ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງ ຖວທ, ສະຫາຍ ນາງ ຄໍາຫລ້າ ແກ້ວອຸ່ນຄໍາ ຄະນະພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ສະຫາຍ ຄຳຫລ້າ ຍອຍສາຍຄຳ ກຳມະການພັກກະຊວງ, ຫົວໜ້າສະຖາບັນສື່ມວນຊົນ, ວັດທະນາທຳ ແລະ ທ່ອງທ່ຽວ, ມີຫົວໜ້າກົມ, ຮອງກົມ, ພ້ອມດ້ວຍສຳມະນາກອນຈາກ ເຂົ້າຮ່ວມ.

ການຈັດຝຶກອົບຮົມດັ່ງກ່າວ, ກໍເພື່ອເຮັດໃຫ້ຜູ້ເຂົ້າຮ່ວມ ມີແນວຄິດທັດສະນະຫລັກໝັ້ນ ຊົນຊັ້ນກຳມະ ກອນ, ມີແນວຄິດເຊື່ອໝັ້ນຕໍ່ການນຳພາຂອງພັກ, ເຊື່ອໝັ້ນຕໍ່ອຸດົມການ ກໍຄື ພາລະກິດປ່ຽນແປງໃໝ່ຢ່າງມີຫລັກການຂອງພັກ, ມີຄຸນສົມບັດສິນທຳປະຕິວັດ, ມີຄວາມຈົ່ງຮັກພັກດີຕໍ່ປະເທດຊາດ ຕໍ່ປະຊາຊົນ, ມີຄວາມຫ້າວຫັນ ເປັນແບບຢ່າງ ໃນທຸກວຽກງານທີ່ຕົນຮັບຜິດຊອບ, ເຮັດໃຫ້ການປະຕິບັດໜ້າທີ່ ວຽກງານຂອງຕົນ ນັບມື້ນັບມີຄຸນນະພາບສູງຂຶ້ນ.

ໂອກາດນີ້, ສະຫາຍ ວັນສີ ກົວມົວ ໄດ້ໂອ້ລົມ ແລະ ເນັ້ນໜັກບັນດາສະຫາຍ ທີ່ສຳເລັດການຮຽນທິດສະດີຂັ້ນຕົ້ນ ໂດຍຮຽກຮ້ອງບັນດາສະຫາຍກຳແໜ້ນ ບັນດາຫລັກມູນພື້ນຖານທິດສະດີມາກ-ເລນິນ, ແນວຄິດໄກສອນພົມວິຫານ ພ້ອມກັນນັ້ນກໍສືບຕໍ່ເຊື່ອມຊຶມ ກຳແໜ້ນເນື້ອໃນຈິດໃຈ ແນວທາງນະໂຍບາຍ ຂອງພັກແຕ່ ລະໄລຍະໃຫ້ດີ, ຮັບຮູ້ສະພາບຄວາມເປັນຈິງ ເພື່ອເພີ່ມທັກສະຄວາມອາດສາມາດ ກ້າຄິດ ບົນພື້ນຖານປຶກສາຫາລືເປັນໝູ່ຄະນະ,ກ້າເຮັດ, ກ້າຮັບຜິດຊອບ ເພື່ອຜັນຂະຫຍາຍເຂົ້າສູ່ຊີວິດຕົວຈິງ, ສ້າງການຫັນປ່ຽນຢ່າງແຂງແຮງເລິກເຊິ່ງ, ໝູນໃຊ້ບົດຮຽນ ທີ່ບັນດາສະຫາຍໄດ້ຮຽນ ມາເຂົ້າໃສ່ວຽກງານຕົວຈິງ ໃຫ້ສອດຄ່ອງ ແລະ ເໝາະສົມ. ນຳເອົາທິດສະດີ, ແນວທາງ ທີ່ພວກສະຫາຍຮຽນມາ ໄປທົດສອບຢູ່ກົມ, ກອງ ໃນວຽກງານຕົວຈິງ ທີ່ຕົນຮັບຜິດຊອບ ຊຶ່ງຈະຊ່ວຍໃຫ້ບັນດາສະຫາຍເຫັນໄດ້ວ່າ ອັນໃດຖືກ, ອັນໃດຜິດ, ອັນໃດສອດຄ່ອງເໝາະສົມ ບົນພື້ນຖານເດັດດ່ຽວປົກປ້ອງສິ່ງທີ່ຖືກຕ້ອງ. ພ້ອມກັນນັ້ນ, ກໍຕັດສິນໃຈ ດັດແປງແກ້ໄຂ ອັນທີ່ບໍ່ຖືກຕ້ອງຢ່າງທັນການ ໂດຍສະເພາະ ຖືຄວາມສຳຄັນໃນການຈົງຮັກພັກດີຕໍ່ຊາດ, ຕໍ່ພັກ, ປະຕິບັດຕາມການນຳພາ-ຊີ້ນຳ ຂອງການຈັດຕັ້ງຢ່າງເຂັ້ມງວດ, ຕ້ານປະກົດການຍໍ້ທໍ້ທຸກຮູບແບບ, ຕ້ານການສໍ້ລາດບັງຫລວງ, ຕ້ານການຟຸມເຟືອຍ, ຕ້ອງຖືຜົນປະໂຫຍດສ່ວນລວມ ກໍຄື ຂອງຊາດສຳຄັນທີ່ສຸດ.

ພ້ອມນີ້, ສະຫາຍ ສັນສີ ກົວມົວ ຍັງເຊື່ອໝັ້ນຢ່າງໜັກແໜ້ນວ່າ: ບັນດາສະຫາຍ ທີ່ສຳເລັດການຮຽນທິດສະດີຂັ້ນຕົ້ນ ຊຸດທີ II ໃນເທື່ອນີ້ ຈະຮັກສາໄວ້ເຊິ່ງຊື່ສຽງ, ກຽດສັກສີ ຂອງຕົນ ກໍຄື ຂອງກົມ, ກອງ ທີ່ຕົນເອງສັງກັດ ລວມທັງຂອງກະຊວງ ຖວທ, ການເຄື່ອນໄຫວ, ການປະພຶດທຸກຢ່າງ ຕ້ອງໄດ້ຮັບຄວາມໄວ້ເນື້ອເຊື່ອໃຈ ຈາກໝູ່ເພື່ອນ, ການຈັດຕັ້ງພັກ-ລັດ ແລະ ປະຊາຊົນ. ສະນັ້ນ, ຕ້ອງຍຶດໝັ້ນໃນທາດແທ້ ຊົນຊັ້ນກໍາມະກອນ ຂອງພັກ ຍຶດໝັ້ນອຸດົມການ ສັງຄົມນິຍົມຢ່າງສະເໜີຕົ້ນສະເໜີປາຍ.

ຂ່າວ: ສົມຫວັງ

ພາບ: ອ່າຍຄໍາ

KPL