KPL
ພິທີປະກາດສ້າງຕັ້ງຄະນະພັກຮາກຖານ ສະຖານທູດລາວ ປະຈຳ ສປ ຈີນ ຈັດຂຶ້ນໃນວັນທີ 8 ພະຈິກ 2026 ຢູ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ພາຍໃຕ້ການເປັນປະທານຂອງ ສະຫາຍ ໄມທອງ ທຳມະວົງສາ ຮອງເລຂາຄະນະພັກ, ຮອງລັດຖະມົນຕີກະຊວງການຕ່າງປະເທດ ໂດຍມີຄະນະໜ່ວຍພັກສະຖານທູດ, ສະຖານກົງສຸນໃຫຍ່, ຄະນະກົມ ແລະ ຄະນະພະແນກຈາກກົມກ່ຽວຂ້ອງກະຊວງການຕ່າງປະເທດ, ພ້ອມດ້ວຍສະມາຊິກພັກສະຖານທູດ, ຕົວແທນບັນດາສະຖານກົງສຸນໃຫຍ່ ແຫ່ງ ສປປ ລາວ ທີ່ ສປ ຈີນ ເຂົ້າຮ່ວມ.
ໃນພິທີ, ສະຫາຍ ວັນດີ ບຸດສະດີ ກຳມະການປະຈຳຄະນະພັກ, ຫົວໜ້າກົມຈັດຕັ້ງ ກະຊວງການຕ່າງປະເທດ ໄດ້ຜ່ານມະຕິຕົກລົງວ່າດ້ວຍການສ້າງຕັ້ງຄະນະພັກຮາກຖານ ແລະ ມະຕິຕົກລົງວ່າດ້ວຍການບົ່ງຕົວແຕ່ງຕັ້ງຄະນະພັກຮາກຖານ ສະຖານທູດລາວ ປະຈຳ ສປ ຈີນ ໂດຍໄດ້ແຕ່ງຕັ້ງ ສະຫາຍ ສົມພອນ ສີຈະເລີນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ເປັນເລຂາຄະນະພັກຮາກຖານ, ສະຫາຍ ພູວາ ຊາມຸນຕີ ຫົວໜ້າຫ້ອງການສະຖານທູດ ເປັນຮອງເລຂາຄະນະພັກຮາກຖານ, ສະຫາຍ ພັນເອກ ຄຳຄ່ອງ ອິນທິລາດ ທີ່ປຶກສາທູດປ້ອງກັນຊາດ ເປັນກຳມະການຄະນະພັກຮາກຖານ.
ໃນໂອກາດດັ່ງກ່າວ, ສະຫາຍ ໄມທອງ ທຳມະວົງສາ ໄດ້ໃຫ້ກຽດໂອ້ລົມ ໂດຍໄດ້ຍົກໃຫ້ເຫັນເຖິງຄວາມສຳຄັນ ແລະ ຄວາມຮຽກຮ້ອງຕ້ອງການຂອງວຽກງານພັກ-ພະນັກງານ ຢູ່ ສປ ຈີນ ທີ່ເປັນປະເທດເພື່ອນມິດຍຸດທະສາດທີ່ສຳຄັນ, ມີບັນດາໜ່ວຍພັກ, ສະມາຊິກພັກ, ພະນັກງານ-ນັກການທູດ ແລະ ນັກສຶກສາຈຳນວນຫຼາຍ; ຄະນະພັກຮາກຖານສະຖານທູດ ຈະກາຍເປັນເສນາທິການໃຫ້ແກ່ຄະນະກະຊວງ ລົງເລິກນຳພາ-ຊີ້ນຳຢ່າງໃກ້ຊິດຕິດແທດກັບບັນດາໜ່ວຍພັກ, ຮາກຖານພັກ ແລະ ສະມາຊິກພັກ. ພ້ອມນັ້ນ, ສະຫາຍຍັງໄດ້ໃຫ້ທິດຊີ້ນຳທີ່ສຳຄັນເພື່ອໃຫ້ຄະນະພັກຮາກຖານ ແລະ ບັນດາໜ່ວຍພັກນຳໄປຈັດຕັ້ງປະຕິບັດ.
ຫຼັງຈາກນັ້ນ, ສະຫາຍ ສົມພອນ ສີຈະເລີນ ເລຂາຄະນະພັກຮາກຖານ ໄດ້ຕາງໜ້າຄະນະພັກຮາກຖານຂຶ້ນຮັບຄຳໂອວາດ ໂດຍໃຫ້ຄຳໝັ້ນສັນຍາວ່າຈະນຳເອົາທິດຊີ້ນຳຂອງຄະນະພັກຂັ້ນເທິງໄປຈັດຕັ້ງຜັນຂະຫຍາຍໃຫ້ເກີດດອກອອກຜົນ; ກໍ່ສ້າງຄະນະພັກຮາກຖານ, ໜ່ວຍພັກ, ຈຸພັກ ຢູ່ບັນດາສຳນັກງານການທູດ ແລະ ຖັນແຖວນັກສຶກສາ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ.
ພາຍຫຼັງສຳເລັດພິທີ ສະຫາຍ ໄມທອງ ທຳມະວົງສາ ຍັງໄດ້ສືບຕໍ່ເປັນປະທານກອງປະຊຸມແລກປ່ຽນລະຫວ່າງສຳນັກງານການທູດ ແຫ່ງ ສປປ ລາວ ປະຈຳ ສປ ຈີນ ແລະ ບັນດາກົມພາຍໃນກະຊວງການຕ່າງປະເທດ ປະຈຳປີ 2026 ຕື່ມອີກ.
KPL
