ຂປລ
ທ່ານ ໂມຮຳເໝັດ ບິນ ຊັລມານ ມົງກຸດ ຣາຊະກຸມານ ແລະ ນາຍົກ ລັດຖະມົນຕີ ແຫ່ງ ອາຣັບບີ ຊາອຸດິດ ແລະ ທ່ານ ຈໍຣເຈຍ ເມໂລນີ ນາຍົກລັດຖະມົນຕີ ອິຕາລີ ໄດ້ລົງນາມຮ່ວມກັນ ໃນຂໍ້ຕົກລົງ ເພື່ອຍົກລະດັບ ຄວາມສຳພັນ ເນື່ອງໃນໂອກາດ ທີ່ ທ່ານ ຈໍຣເຈຍ ເມໂລນີ ເດີນທາງມາຢ້ຽມຢາມ ເມືອງອັລອູລາ ທາງພາກ ເໜືອ ຂອງ ອາຣັບບີ ຊາອຸດິດ.
ຂປລ. ສຳນັກຂ່າວ ເອເອຟພີ ລາຍງານ ຈາກ ນະຄອນຫລວງ ຣິຢັດ ປະເທດ ອາຣັບບີ ຊາອຸດິດ ເມື່ອວັນທີ 27 ມັງກອນ 2025, ທ່ານ ໂມຮຳເໝັດ ບິນ ຊັລມານ ມົງກຸດ ຣາຊະກຸມານ ແລະ ນາຍົກ ລັດຖະມົນຕີ ແຫ່ງ ອາຣັບບີ ຊາອຸດິດ ແລະ ທ່ານ ຈໍຣເຈຍ ເມໂລນີ ນາຍົກລັດຖະມົນຕີ ອິຕາລີ ໄດ້ລົງນາມຮ່ວມກັນ ໃນຂໍ້ຕົກລົງ ເພື່ອຍົກລະດັບ ຄວາມສຳພັນ ເນື່ອງໃນໂອກາດ ທີ່ ທ່ານ ຈໍຣເຈຍ ເມໂລນີ ເດີນທາງມາຢ້ຽມຢາມ ເມືອງອັລອູລາ ທາງພາກ ເໜືອ ຂອງ ອາຣັບບີ ຊາອຸດິດ. ໃນລະຫວ່າງ ກອງປະຊຸມ ທີ່ຈັດຂຶ້ນ ຢູ່ເມືອງອັລອູລາ ໂດຍຜູ້ນໍາທັງສອງ ປະເທດ ໄດ້ປຶກສາຫາລື ຮ່ວມກັນ ກ່ຽວກັບ ການສົ່ງເສີມ ຄວາມສຳພັນ ທະວີພາຄີ, ການເສີມສ້າງ ຄວາມຮ່ວມມື ດ້ວຍຫລາກຫລາຍດ້ານ ແລະ ການພັດທະນາ ລະດັບພາກພື້ນ ແລະ ລະຫວ່າງ ປະເທດ.
ນອກນັ້ນ, ຜູ້ນຳທັງສອງປະເທດ ໄດ້ລົງນາມ ຂໍ້ຕົກລົງ ກ່ຽວກັບ ການຈັດຕັ້ງໜ່ວຍງານ ເພື່ອຄວາມຮ່ວມມື ທາງຍຸດທະສາດ ລະຫວ່າງ ອາຣັບບີຊາອຸດິດ ແລະ ອິຕາລີ. ໂດຍມີ ການລົງນາມ ຂໍ້ຕົກລົງອື່ນໆ ຊຶ່ງຄວບຄຸມ ອີກຫລາຍດ້ານ ເຊັ່ນ: ການປ້ອງກັນ ປະເທດ, ການເຄື່ອນຍ້າຍ ແບບຍືນຍົງ, ຄວາມຮ່ວມມື ດ້ານພະລັງງານ, ກິລາ ແລະ ການປົກປ້ອງ ມໍລະດົກ ທາງດ້ານວັດທະນະທຳ ແລະ ບູຮານຄະດີ. /
KPL
