ຂປລ. ໃນວັນທີ 2 ກັນຍາ  2024  ເປັນມື້ບຸນຫໍ່ເຂົ້າປະດັບດິນ ພຸດທະສາສະນິກະຊົນ ໃນຂອບເຂດທົ່ວປະເທດ ໄດ້ພ້ອມກັນ ໃສ່ບາດຖະຫວາຍສັງຄະທານ ແດ່ພະສົງສາມະເນນ ຢູ່ບັນດາວັດວາອາຮາມ ໃນຂອບເຂດທົ່ວປະເທດ ເຊິ່ງບຸນຫໍ່ເຂົ້າປະດັບດິນ ເປັນປະເພນີໜຶ່ງໃນຮີດສິບ ສອງຄອງສິບສີ່ ໂດຍເຮັດບຸນເພື່ອອຸທິດສ່ວນບຸນສ່ວນກຸສົນ ໃຫ້ສຳພະເວສີ (ຜີເຜດ) ຫລື ໃຫ້ຍາດຕິພີ່ນ້ອງ, ເຈົ້າກໍານາຍເວນ, ຜີບໍ່ມີຍາດ, ເພື່ອນມິດສະຫາຍ ທີ່ໄດ້ລ່ວງລັບໄປແລ້ວ.

​         

ໃນ​ໂອກາດ​ນີ້, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແລະ ທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັດຖະມົນຕີ ພ້ອມດ້ວຍ ການນໍາຂອງແຂວງ, ນະຄອນ ກໍໄດ້ຮ່ວມໃສ່ບາດຢູ່ຕໍ່ໜ້າວັດແສນສຸຂະຣາມ ນະຄອນຫວງພະບາງ ເຊິ່ງມີພຸດສາສະນິກກະຊົນທັງພາຍໃນ ແລະ ແຂກຕ່າງປະເທດ ທີ່ມີຈິດໃຈເຫລື້ອມ ໃສສັດທາທາງພຸດທະສາສະໜາ ໄດ້ພ້ອມກັນຫ້າງຫາກະກຽມເຂົ້າໜ້ຽວ, ເຂົ້າຕົ້ມ, ເຂົ້າໜົມ ແລະ ປັດ​ໄຈ ມາໃສ່ບາດຢູ່ຕາມວັດວາອາຣາມ ແລະ ເສັ້ນທາງຕ່າງໆ ພາຍໃນຕົວເມືອງ ນະຄອນຫລວງພະບາງ ຕາມວັດທະນະທຳ-ຮິດຄອງປະເພນີ ຂອງຊາວຫລວງພະບາງ ທີ່ໄດ້ສຶບທອດກັນມາແຕ່ບູຮານນະການ. ທັງເປັນການສົ່ງເສີມກິດຈະກໍາການທ່ອງທ່ຽວ ທີ່ຕິດພັນກັບການອານຸລັກຮັກສາວັດທະນະທໍາ ຮີດຄອງປະເພນີອັນດີງາມ ທີ່ເປັນເອກລັກສະເພາະ ຂອງຊາວຫລວງພະບາງທີ່ມີມາແຕ່ດົນນານ.

ບຸນຫໍ່ເຂົ້າປະດັບດິນ ​ແມ່ນ​ຈັດ​ຂຶ້ນໃນມື້ແຮມ 14 ຄໍ່າ ເດືອນ 9 ລາວ ຂອງ​ທຸກໆ​ປີ ​ເຊິ່ງປີ​ນີ້, ປີພະພຸດທະ​ສັງກາດ 2567 ແມ່ນ​ກົງ​ກັບ​ວັນ​ທີ 2 ກັນຍາ 2024 ເປັນ​ມື້​ເຮັດບຸນຫໍ່ເຂົ້າປະດັບດິນ, ວິທີ​ຫໍ່​ເຂົ້າປະດັບດິນ​ນັ້ນ ຄວນຫໍ່ໃສ່ໃບຕອງກ້ວຍ, ໃບບົວ ຫລື ໃບໄມ້ປະເພດຕ່າງໆ ບໍ່ຄວນ​ເຮັດໃສ່ກ່ອງໂຟມ ຫລື ຖົງຢາງ, ໃນຫໍ່ເຂົ້າປະດັບ​ດິນນັ້ນປະກອບມີ ​ເຂົ້າຕົ້ມ, ​ເຂົ້າໜົມ, ເຂົ້າສຸກ, ຊີ້ນແຫ້ງ, ປາຕາຍ, ອາຫານ​ຫວານຄາວ, ໝາກໄມ້ປະເພດຕ່າງໆທີ່​ຊື້​ມາຕາມ​ຕະຫລາດ ຫລື ໝາກ​ໄມ້​ປ່າ, ຫລັງ​ຈາກ​ທີ່​ຫໍ່​ຮຽບຮ້ອຍ​ແລ້ວ ນໍາເອົາໄປບູຊາຕອນເຊົ້າກ່ອນຕາເວັນຂຶ້ນ ຂອງມື້ແຮມ 14 ຄໍ່າ ເດືອນ 9 ຫລື ເດືອນ 9 ດັບ ​ໃຫ້ຖືເອົາເວລາປະມານ 4:00-5:00 ​ໂມງ​ເຊົ້າ ໂດຍບໍ່ຕ້ອງເຄນໃຫ້ພະສົງ ເອົາໄປຢາຍບູຊາປະດັບ​ໄວ້ ​ໃນສະຖານທີ່ບູຊາ, ໜ້າ​ເຮືອນຕົນເອງ, ຕາມກຳແພງວັດ, ຕາມທາດ​ເຈດີ, ຕາມຫົວໄຮ່ປາຍນາ, ຕາມ​ດິນ​ດອນຕ່ອນຫຍ້າ, ​ເຫງົ້າ​ໄມ້ ວາງລົງກັບພື້ນດິນ​ໂລດ ​ແລ້ວໄຕ້ທູບທຽນບູຊາ ຢາດນໍ້າ ຫລື ບໍ່ຢາດນໍ້າ ເວົ້າເອົາກະໄດ້ວ່າ: ຂ້າພະເຈົ້າຊື່…. ໄດ້ແຈກຢາຍຫໍ່ເຂົ້າປະດັບດິນ ບູຊາແຜ່ນດິນ ພະແມ່ທໍລະ ນີ, ຍາດພີ່ນ້ອງຊື່…. ຕະຫລອດເຖິງຜີ​ເຜດ, ຜີທີ່ມີຍາດ ແລະ ບໍ່ມີຍາດ ກໍ​ດີ ຂໍໃຫ້ມາຮັບ​ເອົາ​ຫໍ່​ເຂົ້າປະດັບດິນ​ນີ້ ​ໃຫ້ໄດ້ຢູ່ໄດ້ກິນ ແລ້ວໃຫ້ໄປເກີດທີ່ດີເຖິງ ສຸກພຸ້ນເທີ້ນ ສາທຸ ຖື​ວ່າຈົບພິທີ, ​ເວລາ​ຟ້າແຈ້ງ ເວລາ 07:00 ໂມງ ຈຶ່ງ​ໄປ​ເວນພາເຂົ້າ, ຖວາຍພາເຂົ້າທິບ, ອາຫານຫວານຄາວ ແລະ ຕັກບາດຢາດນໍ້າອຸທິດ​ສ່ວນ​ບຸນ​ກຸສົນ ​ໄປຫາບັນພະບຸລຸດ ຢູ່​ໃນ​ວັດຕາມປະເພນີ ທີ່​ເຮັດ​ສືບ​ທອດ​ກັນ​ມາ​ແຕ່​ດົນ​ນານ. ສ່ວນ​ກິດຈະ​ກໍາ​ອື່ນໆ ​ໃນ​ບຸນ​ຫໍ່​ເຂົ້າປະດັບດິນ​ມີ ​ໄຫວ້​ພະສູດ​ມົນ, ຟັງ​ເທດ​ສະໜາ, ລົງ​ອຸ​ໂປ​ສົດ​ສັງຄະ​ກັມ, ຈໍາ​ສິນ​ແປດ, ວຽນທຽນ ​ແລະ ປະ​ເພນີ​ບຸນຊ່ວງ​ເຮືອ​ແຂວງ​ຫລວງ​ພະ​ບາງ.

ສະຫລຸບ​ລວມແລ້ວ, ​ຄວາມ​ເຊື່ອ ​ແລະ ສັດທາ​​ໃນການ​ເຮັດບຸນ​ຫໍ່​ເຂົ້າປະດັບດິນ ມີ​ມາ​ແຕ່​ອະດີດ ​ຈົນເຖິງ​ປັດຈຸບັນ ບໍ່​ມີ​ວັນ​ຈະ​ເສື່ອ​ມຄາຍ​ລົງ ​ເພາະ​ມີ​ຄວາມ​ເຊື່ອ​ວ່າ ການ​ເຮັດບຸນ​ໃນວັນ​ດັ່ງກ່າວ​ນັ້ນ ​ເປັນ​ການອຸທິດສ່ວນບຸນກຸສົນໄປຫາເຜດ ຫລື ຍາດພີ່ນ້ອງທີ່ລ່ວງລັບໄປແລ້ວ ​ໂດຍ​ເຊື່ອ​ກັນ​ວ່າ​ເປັນ​ວັນ​ທີ່​ຈ່າ​ຍົມພິບານ ​ເປີດ​ປະຕູ​ນະຣົກ ​ໃຫ້​ແກ່​ພວກຜີ, ພວກ​ເຜດ ທັງຫລາຍ ຂຶ້ນ​ມາ​ຊອກ​ຫາ​ອາຫານ​ກິນ​ໃນ​ມື້​ນັ້ນ, ​ເພາະ​ອີກ​ຄວາມ​ເຊື່ອ​ໜຶ່ງ ​ເຊື່ອ​ກັນວ່າການ​ເຮັດບຸນຫໍ່ເຂົ້າປະດັບດິນ ​ເປັນ​ຮີດຄອງ​ທີ່​ມີ​ມາ​ກ່ອນ ​ສາສະໜາ​ພຸດ ​ເປັນ​ຮີດຄອງ​ສືບ​ເນື່ອງ​ມາ​ຈາກ ລັດທິ​ຖື​ຜີ ມີ​ຈຸດປະສົງ ​ເພື່ອ​ກິນ​ທານ​ຫາ​ບັນພະບຸລຸດ​ຜູ້​ລ່ວງ​ລັບ​ໄປ​ແລ້ວ ​ໂດຍ​ມີ​ການຮ້ອງເຊີນເອົາດວງວິນຍານຍາດພີ່ນ້ອງ ມາຮັບເອົາຕາມ​ຄວາມ​ເຊື່ອ​ຖື ​ເມື່ອ​ມີ​ສາສະໜາ​ພຸດ​ເຂົ້າ​ມາ​ໃນ​ອານາຈັກ​ລ້ານ​ຊ້າງ ຈຶ່ງ​​ໄດ້​ມີ​ການ​ປັບ​ເຂົ້າ​ຫາ​ກັນ ແລະ ຈຶ່ງ​ເກີດ​ມີ​ພິທີ​ກໍາ​ພິທີ ການໄຫວ້​ພະ ສະ​ມະ​ທານ​ສິນ ຕັກບາດ ຖວາຍພັດຕະຫານ, ຟັງທໍາມະເທດສະໜາ, ວຽນທຽນ ແລະ ກິດຈະ​ກໍາອື່ນໆ ສືບ​ເນື່ອງ​ມາ​ຈົນເຖິງປັດຈຸບັນ ​ແລະ ຍັງ​ຄົງ​ຄວາມ​ເຊື່ອ​ນີ້​ໄວ້ຢ່າງຍືນ​ຍົງ​ຕໍ່​ໄປອີກ.

ຂ່າວ: ກິດຕາ

ພາບ: ​ແຂວງ​ຫລວງ​ພະ​ບາງ+ເກດສະໜາ

KPL