ຂປລ
ຂປລ.ກົມການນໍາເຂົ້າ ແລະ ສົ່ງອອກ ກະຊວງອຸດສາຫະກຳ ແລະ ການຄ້າ ໄດ້ສຳເລັດການສັງ ລວມ ສະຖິຕິການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າ ປະຈຳປີ 2019
ຂປລ.ກົມການນໍາເຂົ້າ ແລະ ສົ່ງອອກ ກະຊວງອຸດສາຫະກຳ ແລະ ການຄ້າ ໄດ້ສຳເລັດການສັງ ລວມ ສະຖິຕິການນຳເຂົ້າ ແລະ ສົ່ງອອກ ພາຍໃຕ້ສິດທິພິເສດທາງການຄ້າ ປະຈຳປີ 2019 ໂດຍແບ່ງອອກເປັນ 02 ຮູບແບບດ້ວຍກັນຄື: ແບບຝ່າຍດຽວ (GSP) ແລະ ແບບຕອບແທນກັນ ຫລື ຕ່າງຝ່າຍຕ່າງໄດ້ຮັບຜົນປະໂຫຍດ(FTA) ຊຶ່ງສາມາດບັນລຸໄດ້ປະມານ 1.328 ລ້ານກວ່າໂດລາສະຫະລັດ ກວມເອົາ 22,65% ຂອງມູນຄ່າການສົ່ງອອກທັງໝົດຂອງ ສປປ ລາວ ປະມານ 5.864 ລ້ານກວ່າໂດລາສະຫະລັດ. ຂະນະທີ່ ມູນຄ່າການນຳເຂົ້າ ພາຍໃຕ້ສິດທິພິເສດ ທາງການຄ້າແມ່ນປະມານ 665,92 ລ້ານໂດລາສະຫະລັດ ກວມເອົາ 11.60% ຂອງມູນຄ່າການນຳເຂົ້າ ທັງໝົດຂອງ ສປປ ລາວ ປະມານ 5.740 ລ້ານກວ່າໂດລາສະຫະລັດ.
ຂໍ້ມູນຂ່າວສານທາງການຄ້າ ສປປ ລາວ ໄດ້ລະບຸວ່າ: ໃນປີ 2019 ຜ່ານມາ ເມື່ອສົມທຽບລະ ຫວ່າງ ສອງຮູບແບບການສົ່ງອອກ ພາຍໃຕ້ສິດທິພິເສດທາງການຄ້າ ເຫັນວ່າ ການສົ່ງອອກແບບຝ່າຍດຽວ ມີມູນຄ່າພຽງ 327 ລ້ານກວ່າໂດລາສະຫະລັດ; ໃນຂະນະທີ່ການສົ່ງອອກແບບ ຕອບແທນກັນ ມີມູນຄ່າສູງກວ່າ 1.000 ລ້ານໂດລາສະຫະລັດ. ການສົ່ງອອກແບບຕອບແທນກັນ ກວມເອົາອັດຕາສ່ວນຫລາຍ ຂອງການສົ່ງອອກພາຍໃຕ້ ສິດທິພິເສດທາງການຄ້າ ປະມານ 75,32%. ໃນການສົ່ງອອກໂດຍນຳໃຊ້ສິດທິພິເສດ ແບບຝ່າຍດຽວສ່ວນໃຫຍ່ແມ່ນ ການສົ່ງອອກໄປ ບັນດາປະເທດ ໃນສະຫະພາບເອີຣົບ. ສ່ວນການສົ່ງອອກພາຍໃຕ້ FTA ສາມາດປະຕິບັດໄດ້ ໂດຍກວມເອົາອັດຕາສ່ວນຫລາຍກວ່າ ການສົ່ງອອກພາຍໃຕ້ສິດ ທິພິເສດທາງການຄ້າສູງ ຍ້ອນວ່າສິນຄ້າທີ່ສົ່ງອອກ ສ່ວນໃຫຍ່ເປັນທ່າແຮງຂອງ ສປປ ລາວ ແລະ ໃນຂອບ FTA ນີ້ ກໍມີຫລາຍສັນຍາ ເຊັ່ນ: ສັນຍາການຄ້າດ້ານສິນຄ້າ ຂອງອາຊຽນ/ສັນຍາການຄ້າເສລີອາ ຊຽນ, ສັນຍາພາຍໃຕ້ເຂດ ການຄ້າເສລີອາຊຽນ-ຈີນ, ສັນຍາການຄ້າເສລີ ອາຊຽນ- ອິນເດຍ, ສັນຍາພາຍໃຕ້ເຂດການຄ້າເສລີ ອາຊຽນ-ສ ເກົາຫລີ, ສັນຍາວ່າດ້ວຍຄູ່ຮ່ວມມື ດ້ານເສດຖະກິດຮອບດ້ານ ອາຊຽນ-ຢີ່ ປຸ່ນ ແລະ ສັນຍາພາຍໃຕ້ເຂດການຄ້າເສລີ ອາຊຽນ-ອົດສະຕາລີ-ນິວຊີແລນ.
ຂ່າວສານທາງການຄ້າ ສປປ ລາວ ຊີ້ໃຫ້ເຫັນຕື່ມວ່າ: ໃນປີ 2019 ສປປ ລາວ ສົ່ງອອກພາຍໃຕ້ສິດທິພິເສດທາງການຄ້າ ໄປຍັງ 38 ປະເທດ ເຊັ່ນ: ໄທ, ຈີນ, ຫວຽດນາມ, ເຢຍລະມັນ, ອີຕາລີ, ຢີ່ປຸ່ນ, ອັງກິດ, ສະວີເດນ, ໂປໂລຍ, ແບນຊິກ, ໂຮນລັງ, ດານມາກ, ປ໋ອກຕຸຍການ, ກຣົວຊີ, ຟີລິບປິນ ແລະ ປະເທດອື່ນໆຕາມລຳດັບ. ໃນນັ້ນ, ປະເທດທີ່ມີການສົ່ງອອກ ໄປຫລາຍກວ່າໝູ່ແມ່ນ ໄທ ມີມູນຄ່າປະມານ 361 ລ້ານກວ່າໂດລາສະຫະລັດ, ສປ ຈີນ 322 ລ້ານກວ່າໂດລາສະຫະລັດ ແລະ ຫວຽດນາມ 312 ລ້ານກວ່າໂດລາສະຫະລັດ.
ສ່ວນປະເທດທີ່ ສປປ ລາວ ນໍາເຂົ້າພາຍໃຕ້ສິດທິພິເສດ ທາງການຄ້າມີທັງ ໝົດ 33 ປະເທດ ເຊັ່ນ: ໄທ, ຈີນ, ຫວຽດນາມ, ຢີ່ປຸ່ນ, ອິນໂດເນເຊຍ, ອັງກິດ, ສ ອາເມລິກາ, ສະຫະນະຄອນອາເມຣັດ, ສ ເກົາຫລີ, ອິນເດຍ, ເຢຍລະມັນ, ມາເລເຊຍ, ສິງກະໂປ, ໄຕ້ຫວັນ, ໂອຕຣິດ ແລະ ອື່ນໆ ຕາມລຳ ດັບ. ໃນນັ້ນ, ປະເທດທີ່ມີການນຳເຂົ້າ ຫລາຍກວ່າໝູ່ແມ່ນ ໄທ ມີມູນຄ່າປະມານ 380 ລ້ານກວ່າໂດລາສະຫະລັດ, ສປ ຈີນ 98 ລ້ານກວ່າໂດລາສະຫະລັດ ແລະ ສສ ຫວຽດນາມ 86 ລ້ານກວ່າໂດລາສະ ຫະລັດ.
KPL
