ຂປລ
ຂປລ. ໃນຕອນຄ່ຳຂອງວັນທີ 11 ກັນຍາ 2018 ທີ່ໂຮງແຮມຄຣາວ ພາຊາວຽງຈັນ, ໂຄງການສົ່ງເສີມ ນັກອອກແບບໜຸ່ມນ້ອຍຂອງລາວ ພາຍໃຕ້ລາວແຟຊັນວີກ ໄດ້ຈັດ ງານເດີນແບບອາພອນ ຂອງ ລາວ ແລະ ຕ່າງປະເທດ, ແລະ ປະກາດ ຜົນການແຂ່ງຂັນ ການອອກ ແບບອາພອນທ້ອງຖິ່ນ ເພື່ອ ສົ່ງເສີມປີທ່ອງທ່ຽວລາວ 2018,
ຂປລ. ໃນຕອນຄ່ຳຂອງວັນທີ 11 ກັນຍາ 2018 ທີ່ໂຮງແຮມຄຣາວພາຊາວຽງຈັນ, ໂຄງການສົ່ງເສີມນັກອອກແບບໜຸ່ມນ້ອຍຂອງລາວ ພາຍໃຕ້ລາວແຟຊັນວີກ ໄດ້ຈັດງານເດີນແບບອາພອນ ຂອງລາວ ແລະ ຕ່າງປະເທດ, ແລະ ປະກາດ ຜົນການແຂ່ງຂັນ ການອອກແບບອາພອນທ້ອງຖິ່ນ ເພື່ອສົ່ງເສີມປີທ່ອງທ່ຽວລາວ 2018, ເຊິ່ງຜູ້ຊະນະເລີດແມ່ນ ທ້າວ ພອນປະເສີດ ແສງມະນີວົງ ຈາກແຂວງ ສະຫວັນນະເຂດ ແລະ ຮອງຊະນະເລີດແມ່ນ ນາງ ມະນີວອນ ວັນສະຫວັດ ຈາກນະຄອນ ຫລວງວຽງຈັນ. ການມອບລາງວັນຊະນະເລີດຄັ້ງນີ້, ໂດຍທ່ານ ທະວີເພັດ ອຸລາ ຮອງຫົວໜ້າກົມ ພັດທະນາການທ່ອງທ່ຽວ, ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ.
ງານການອອກແບບອາພອນທ້ອງຖິ່ນ ເພື່ອສົ່ງເສີມປີທ່ອງທ່ຽວລາວ 2018 ຈັດຂຶ້ນ, ໂດຍການຮ່ວມມື ລະຫວ່າງໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ພາຍໃຕ້ກະຊວງຖະແຫລງຂ່າວ, ວັດ ທະນະທໍາ ແລະ ທ່ອງທ່ຽວ ແລະ ໂຄງການສົ່ງເສີມ ນັກອອກແບບໜຸ່ມນ້ອຍຂອງລາວ ພາຍໃຕ້ລາວແຟຊັນວີກ, ໂດຍການເຂົ້າຮ່ວມຂອງ ທ່ານ ນາງ ປານີ ໄຊຍະວົງ ຜູ້ກໍ່ຕັ້ງລາວແຟຊັນວີກ, ທັງເປັນຜູ້ອຳນວຍການ ໂຄງການ ພັດທະ ນານັກອອກ ແບບໜຸ່ມນ້ອຍຂອງລາວ, ພ້ອມ ດ້ວຍບັນດາສື່ມວນຊົນ.
ໂຄງການອອກແບບອາພອນລາວໃນຄັ້ງນີ້, ເພື່ອສົ່ງເສີມປີທ່ອງທ່ຽວລາວ 2018, ບັນ ດານັກອອກແບບໜຸ່ມນ້ອຍດີເດັ່ນ ຂອງລາວ ແມ່ນໄດ້ອອກແບບ ແລະ ດັດແປງແຜ່ນແພພື້ນບ້ານ ຈາກແຕ່ລະແຂວງໃນລາວ ໃຫ້ກາຍເປັນຊຸດທີ່ທັນສະໄໝ, ເຊິ່ງເປົ້າໝາຍຂອງໂຄງການພິເສດນີ້ ແມ່ນເພື່ອເພີ່ມມູນຄ່າ ແລະ ຄຸນຄ່າ ໃຫ້ແກ່ແຜ່ນແພທ້ອງຖິ່ນລາວ ແລະ ເພື່ອໃຫ້ສາກົນຮູ້ວ່າແຜ່ນແພທ້ອງຖິ່ນ ຂອງລາວ ສາ ມາດນຳ ມາປະຍຸກ ເປັນອາພອນ ແລະ ແຟຊັນທີ່ທັນສະໄໝໄດ້. ສຳລັບແຜ່ນແພທ້ອງຖິ່ນທີ່ໄດ້ຄັດເລືອກແມ່ນມາຈາກ 17 ແຂວງ (ຍົກເວັ້ນແຂວງໄຊສົມບູນ) ຈາກນັ້ນໄດ້ມອບໃຫ້ນັກອອກແບບ ໜຸ່ມນ້ອຍຂອງລາວ 15 ຄົນ ເພື່ອອອກ ແບບ ແລະ ຜະລິດ ເປັນຊຸດທີ່ທັນສະໄໝ.
ທ່ານ ທະວີເພັດ ອຸລາ ໄດ້ກ່າວວ່າ: ໃນໂຄງການຮ່ວມມືດັ່ງກ່າວ, ແມ່ນຖືວ່າເປັນການສົ່ງເສີມການທ່ອງທ່ຽວ ທາງວັດທະນະທຳໂດຍກົງ, ໂດຍຜ່ານແຜ່ນແພທ້ອງຖິ່ນ ທີ່ເປັນເອກະລັກຂອງລາວ, ຫລັງຈາກທີ່ນັກ ອອກແບບໜຸ່ມ ນ້ອຍຂອງລາວ ໄດ້ອອກແບບ ແລະ ຜະລິດເປັນທີ່ຮຽບຮ້ອຍແລ້ວ ແມ່ນຈະໄດ້ນຳໄປວາງສະແດງໃນງານຕະຫລາດນັດການທ່ອງທ່ຽວ ທີ່ມີສື່ສຽງ ທັງພາຍໃນ ແລະ ຕ່າງປະເທດ, ເພື່ອໃຫ້ຊາວຕ່າງປະເທດຜູ້ທີ່ສົນໃຈ ໃນແຜ່ນແພຂອງລາວ ແລະ ທັງເປັນການ ດຶງດູດນັກທ່ອງທ່ຽວຕ່າງປະເທດ ໃຫ້ເຂົ້າມາທ່ຽວລາວ ຫລາຍຂຶ້ນ. ໃນໂອກາດດຽວກັນ, ຜູ້ເຂົ້າຮ່ວມງານຍັງໄດ້ຊົມການເດີນແບບ ຈາກຫ້ອງເສື້ອທັງພາຍໃນ ແລະ ຕ່າງປະເທດ ທີ່ມາຈາກ ປະເທດ ກຳປູເຈຍ, ມາເລເຊຍ, ຫວຽດນາມ, ຟີລິບປິນ ແລະ ປະເທດ ຍີ່ປຸ່ນ.
ຂ່າວ: ມະນີທອນ, ພາບ: ສຸກທະວີ
KPL
