KPL
ສປ ຈີນ ຍິນດີ ຮ່ວມກັບ ບັນດາປະເທດ ອາຊຽນ ເຊື່ອມຕໍ່ ຍຸດທະສາດ ການພັດທະນາ, ຈັດຕັ້ງປະຕິບັດ “ແຜນດຳເນີນງານ ການພົວພັນ ຄູ່ຮ່ວມຍຸດທະສາດ ຮອບດ້ານຈີນ-ອາຊຽນ(2026-2030)” ໃຫ້ດີ ແລະ ຊຸກຍູ້ການສ້າງ ປະຊາຄົມ ຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ.
ຂປລ.ວິທະຍຸ-ໂທລະພາບ ສູນກາງຈີນ, ວັນທີ 28 ຕຸລານີ້, ທ່ານ ຫລີສຽງ ນາຍົກລັດຖະມົນຕີຈີນ ໄດ້ເຂົ້າຮ່ວມ ກອງປະຊຸມ ສຸດຍອດ ຈີນ-ອາຊຽນ ຄັ້ງທີ 28 ທີ່ຈັດຂຶ້ນຢູ່ ນະຄອນຫລວງ ກົວລາລຳເປີ ປະເທດ ມາເລເຊຍ. ທ່ານ ຫລີສຽງ ກ່າວວ່າ: ສປ ຈີນ ຍິນດີ ຮ່ວມກັບ ບັນດາປະເທດ ອາຊຽນ ເຊື່ອມຕໍ່ ຍຸດທະສາດ ການພັດທະນາ, ຈັດຕັ້ງປະຕິບັດ “ແຜນດຳເນີນງານ ການພົວພັນ ຄູ່ຮ່ວມຍຸດທະສາດ ຮອບດ້ານຈີນ-ອາຊຽນ(2026-2030)” ໃຫ້ດີ ແລະ ຊຸກຍູ້ການສ້າງ ປະຊາຄົມ ຮ່ວມຊາຕາກຳ ຈີນ-ອາຊຽນ ທີ່ແໜ້ນແຟ້ນກວ່າເກົ່າ. ທ່ານ ຫລີສຽງ ໄດ້ສະເໜີ ຂໍ້ສະເໜີ 3 ຂໍ້ກ່ຽວກັບເລື່ອງນີ້ຄື: ໜຶ່ງ, ເຮັດໃຫ້ຄວາມໄວ້ເນື້ອ ເຊື່ອໃຈກັນ ທາງຍຸດທະສາດເຂັ້ມແຂງກວ່າເກົ່າ, ເພີ່ມທະວີ ການແລກປ່ຽນ ທາງຍຸດທະສາດ, ແກ້ໄຂຄວາມເຫັນຂັດແຍ້ງກັນ ຢ່າງເໝາະສົມ, ເລັ່ງລັດຊຸກຍູ້ ການປຶກສາຫາລື ກ່ຽວກັບ “ກົດແຫ່ງການປະພຶດ ຢູ່ທະເລຈີນໃຕ້”; ສອງ, ເຮັດໃຫ້ການເຊື່ອມໂຍງ ດ້ານຜົນປະໂຫຍດ ລົງເລິກ ກວ່າເກົ່າ, ຖືເອົາການປະຕິບັດ ເຂດການຄ້າ ເສລີຈີນ-ອາຊຽນ ສະບັບ 3.0 ເປັນໂອກາດ ທີ່ດີເພື່ອຊຸກຍູ້ການຄ້າ ແລະ ການລົງທຶນຫັນ ເປັນເສລີ ແລະ ສະດວກກວ່າເກົ່າ, ລົງເລິກການຮ່ວມມື ໃນຂົງເຂດເສດຖະກິດ ດີຈີຕອນ, ເສດຖະກິດສີຂຽວ ແລະ ອື່ນໆ; ສາມ, ເຮັດໃຫ້ຄວາມຜູກພັນ ທາງດ້ານຈິດໃຈ ໝັ້ນທ່ຽງ ກວ່າເກົ່າ, ຈັດກິດຈະກຳຕ່າງໆ ທີ່ກ່ຽວຂ້ອງ ສຳລັບປີແລກປ່ຽນ ວັດທະນະທຳໃຫ້ດີ, ສ້າງກົນໄກ ສຳລັບ ກອງປະຊຸມ ລັດຖະມົນຕີ ທ່ອງທ່ຽວ ແລະ ການສຶກສາ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
