KPL
ຂປລ. ເມື່ອບໍ່ດົນມານີ້, ຄະນະຜູ້ແທນ ສປປ ລາວ ນຳໂດຍ ທ່ານ ນາງ ມາລີວັນ ພົມແສງສະ ຫວັນ ຮອງຫົວໜ້າຫ້ອງການ ກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມເວທີ ສົນທະນາບົດບາດຍິງ-ຊາຍ ໃນຂະແໜງພະລັງງານອາຊຽນ ແລະ ເວທີສົນທະນານະໂຍບາຍ ພະລັງງານອາຊຽນ
ຂປລ. ເມື່ອບໍ່ດົນມານີ້, ຄະນະຜູ້ແທນ ສປປ ລາວ ນຳໂດຍ ທ່ານ ນາງ ມາລີວັນ ພົມແສງສະ ຫວັນ ຮອງຫົວໜ້າຫ້ອງການ ກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມເວທີ ສົນທະນາບົດບາດຍິງ-ຊາຍ ໃນຂະແໜງພະລັງງານອາຊຽນ ແລະ ເວທີສົນທະນານະໂຍບາຍ ພະລັງງານອາຊຽນ ກ່ຽວກັບ ລະບົບພະລັງງານກາກບອນຕໍ່າ ຢູ່ກົວລາລຳເປີ ປະເທດມາເລເຊຍ ເຊິ່ງເປັນເວທີສໍາມະນາແລກປ່ຽນ, ຖອດຖອນບົດຮຽນຂອງແຕ່ລະປະເທດ, ພ້ອມທັງໄດ້ຮັບຮູ້ກ່ຽວກັບເປົ້າໝາຍ ແລະ ແຜນງານຂອງບັນດາປະເທດສາມະຊິກ ອາຊຽນໃນການສົ່ງເສີມ ຄວາມສະເໜີພາບຍິງ-ຊາຍ ໃນຂະແໜງພະລັງງານ ແລະ ເຂົ້າໃຈເຖິງຮູບແບບ, ການສ້າງນະໂຍບາຍຂອງແຕ່ລະປະເທດ ໃນການສົ່ງເສີມພະລັງງານ ກາກບອນຕໍ່າ.
ໃນເວທີສົນທະນາດັ່ງກ່າວ, ຄະນະຜູ້ແທນຈາກ ສປປ ລາວ ໄດ້ເຂົ້າຮ່ວມສົນທະນາ ໃນຫົວຂໍ້ "ການສ້າງແຜນແມ່ບົດ ລະດັບພາກພື້ນຂອງອາຊຽນ ໃນການຫັນປ່ຽນພະລັງງານ" ໂດຍທ່ານ ນາງ ມາລີວັນ ພົມແສງສະຫວັນ ໄດ້ນຳສະເໜີແນວທາງ ແລະ ນະໂຍບາຍຂອງສະຫະພັນແມ່ຍິງລາວ ໃນການສົ່ງເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ ໂດຍສະເພາະ ການເຊື່ອມສານວຽກງານດັ່ງກ່າວ ເຂົ້າກັບການຮັບປະກັນ ຄວາມສະເໝີພາບ ແລະ ການຫັນປ່ຽນພະລັງງານ. ພ້ອມກັນນັ້ນ, ໃນເວທີສົນທະນາກ່ຽວກັບ ລະບົບພະລັງງານ ກາກບອນຕໍ່າ, ຄະນະຜູ້ແທນລາວ ຍັງໄດ້ຍົກໃຫ້ເຫັນເຖິງແຜນນະ ໂຍບາຍດ້ານສິນເຊື່ອກາກບອນຂອງປະເທດ ແລະ ສິ່ງທ້າທາຍໃນການປັບປຸງ ແຜນງານປະກອບສ່ວນແກ້ໄຂ ບັນຫາ ການປ່ຽນແປງດິນຟ້າ ອາກາດແຫ່ງຊາດ (NDC) ສະບັບທີ 3.0 ທີ່ຕິດພັນກັບຂະແໜງພະລັງງານ.
ການເຂົ້າຮ່ວມເວທີສົນທະນາຄັ້ງນີ້, ຖືເປັນໂອກາດອັນດີໃນການແລກປ່ຽນ ແລະ ຖອດຖອນ ບົດຮຽນກັບບັນດາປະເທດ ສະມາຊິກອາຊຽນ, ພ້ອມທັງໄດ້ຮັບຮູ້ເປົ້າໝາຍ ແລະ ແຜນງານໃນການສົ່ງ ເສີມຄວາມສະເໝີພາບ ຍິງ-ຊາຍ ແລະ ການສ້າງນະໂຍບາຍ ພະລັງງານກາກບອນຕໍ່າໃນລະດັບພາກພື້ນ ເພື່ອນຳມາປັບໃຊ້ໃນການພັດທະນາ ຂະແໜງພະລັງງານຂອງ ສປປ ລາວ ຕໍ່ໄປ.
ຂໍ້ມູນ-ພາບ: ຂ່າວສານອຸດສາຫະກຳ ແລະ ການຄ້າ
KPL
