ຂປລ. ໃນລະຫວ່າງວັນທີ 25-27 ພຶດສະພາ 2025 ຜ່ານມາ, ສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ)  ນຳໂດຍ ທ່ານ ອຸເດດ ສຸວັນນະວົງ ປະທານ ສຄອຊ ພ້ອມດ້ວຍ ຄະນະປະທານ ສຄອຊ ໄດ້ນຳພາຄະນະທຸລະກິດ ຈາກຂະແໜງການຄ້າ, ພະລັງານ, ບໍ່ແຮ່, ​ຂົນ​ສົ່ງ, ການ​ລົງ​ທຶນ​, ອຸດສາຫະກໍາ, ທະນາຄານ, ກະ​ສິ​ກຳ, ອາຫານ ແລະ ການ​ທ່ອງ​ທ່ຽວ ເດີນທາງຕິດຕາມຄະນະທາງການ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍພັນລະຍາ ໃນໂອກາດເດີນທາງຢ້ຽມຢາມ ມາເລເຊຍ ຢ່າງເປັນ ທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 46 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ.

ໃນໂອກາດດັ່ງກ່າວ, ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ຮ່ວມກັບ ສະພາທຸລະກິດມາເລ ເຊຍ ປະຈໍາ ສປປ ລາວ, ສະຫະພັນອຸດສາຫະກຳກົນຈັກ ແລະ ວິສະວະກໍາ ມາເລເຊຍ ເຊິ່ງໄດ້ຮັບການສະໜັບສະ ໜູນຈັດງານໂດຍ ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ, ບໍລິສັດ Mega Frist ໄດ້ຮ່ວມກັນຈັດກອງປະຊຸມພົບປະລະດັບສູງ ທຸລະກິດ ລາວ-ມາເລເຊຍ ໃນຮູບແບບງານລ້ຽງ ໃນວັນທີ 27 ພຶດສະພາ 2025, ທີ່ ໂຮງແຮມ  JW Marriott, ກົວລາລໍາເປີ, ປະເທດມາເລເຊຍ 

ໃຫ້ກຽດກ່າວເປີດກອງປະຊຸມດັ່ງກ່າວໂດຍ ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ແລະ ໃຫ້ກຽດກ່າວມີຄຳເຫັນຕໍ່ກອງປະຊຸມໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ຝ່າຍມາເລເຊຍກ່າວຕ້ອນຮັບໂດຍ ທ່ານ Mac Ngan Boon ປະທານ ສະຫະພັນອຸດສາຫະກຳກົນຈັກ ແລະ ວິສະວະກຳ ມາເລເຊຍ. ນອກນີ້, ພາຍໃນງານຍັງມີຜູ້ເຂົ້າຮ່ວມຈາກພາກລັດ ຂອງລາວ ແລະ ມາເລເຊຍ ກໍຄື ທ່ານລັດຖະມົນຕີ ຈາກກະຊວງການຕ່າງປະເທດ, ກະຊວງອຸດສາຫະກຳ ແລະ ການຄ້າ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ຮອງລັດຖະມົນຕີ ກະຊວງແຜນການ ແລະ ການລົງທຶນ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ເອກອັກຄະລັດຖະທູດລາວ ປະຈໍາ ມາເລເຊຍ, ເອກອັກຄະລັດຖະທູດມາເລເຊຍ ປະຈໍາ ສປປ ລາວ, ບັນດາກົມກອງຈາກກະຊວງທີ່ກ່ຽວຂ້ອງ, ບັນດານັກທຸລະກິດ ຈາກ ລາວ ແລະ ມາເລເຊຍ ເຂົ້າຮ່ວມ.

ຈຸດປະສົງຫລັກຂອງກອງປະຊຸມ, ແມ່ນເພື່ອເປັນໂອກາດໃນການຮັດແໜ້ນສາຍພົວພັນດ້ານການຄ້າ, ດຶງ ດູດການລົງທຶນ ແລະ ການຄ້າຂາຍລະຫວ່າງສອງປະເທດ. ພ້ອມກັນນັ້ນ, ຍັງເປັນການເປີດໂອກາດໃຫ້ນັກທຸລະກິດ ທັງສອງປະເທດ ໄດ້ມີໂອກາດພົບປະແລກປ່ຽນກັນໃນຂະແໜງການຄ້າ, ພະລັງງານສະອາດ, ບໍ່ແຮ່, ອຸດສາຫະກຳ, ການບໍລິການ, ອາຫານຮາລານ, ການຂົນສົ່ງ, ກະສິກໍາ, ທ່ອງທ່ຽວດີຈິຕອນ ແລະ ອື່ນໆ.

ພ້ອມກັນນີ້, ຍັງເປັນເວທີໃຫ້ແກ່ບັນດານັກລົງທຶນຈາກມາເລເຊຍ ທີ່ມີຄວາມສົນໃຈຢາກມາລົງທຶນໃນ ສປປ ລາວ ໄດ້ຮັບຮູ້ກ່ຽວກັບໂອກາດ ແລະ ນະໂຍບາຍ ການລົງທຶນຢູ່ ສປປ ລາວ ຕື່ມອີກ.

KPL