ຂປລ. ກອງພັນໃຫຍ່ 661 ຈັດປາຖະກະຖາ ວັນສ້າງຕັ້ງກອງທັບ ປະຊາຊົນລາວ ຄົບຮອບ 76 ປີ (20 ມັງກອນ 1949-20 ມັງກອນ 2025) ໃນວັນທີ 16 ມັງກອນ 2025 ໂດຍການ ປາຖະກະຖາຂອງ ສະຫາຍ ພັນເອກ ຄໍາປານ ແພງພັນ ຫົວໜ້າການເມືອງກອງພັນໃຫຍ່ 661, ມີຄະນະພັກ-ຄະນະບັນຊາກອງພັນໃຫຍ່, ກອງພັນນ້ອຍ, ພະແນກການ ຕະຫລອດຮອດ ພະນັກງານ-ນັກຮົບທົ່ວກອງພັນໃຫຍ່ ເຂົ້າຮ່ວມຮັບຟັງ. ທັງນີ້ ກໍເພື່ອເຮັດໃຫ້ພະນັກງານ-ນັກຮົບຮັບຮູ້, ເຂົ້າໃຈເຖິງການຕໍ່ສູ້ກູ້ຊາດ ຂອງກອງທັບໃນລະບອບເກົ່າ ແລະ ລະບອບໃໝ່ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ພ້ອມທັງເສີມຂະຫຍາຍທາດແທ້, ມູນເຊື້ອຂອງຊາດ ແລະ ຂອງກອງທັບ, ການປ່ຽນແປງໃໝ່ຂອງພັກ ແລະ ປະຕິບັດສອງໜ້າທີ່ຍຸດທະສາດ ໃນໄລຍະໃໝ່ ຄື ປົກປັກຮັກສາ ແລະ ສ້າງສາພັດທະນາປະເທດ, ພ້ອມທັງຮໍ່າຮຽນເອົາແບບຢ່າງ, ຄຸນງາມຄວາມດີຂອງບັນດາຜູ້ນໍາໃນຮຸ່ນກ່ອນ ເພື່ອມາໜູນໃຊ້ ເຂົ້າໃນການ ດໍາລົງຊີວິດປະຈໍາວັນ ແລະ ເຂົ້າໃນໜ້າທີ່ວຽກງານການເມືອງຂອງຕົນ ໃຫ້ໄດ້ຮັບຜົນສໍາເລັດ.

ໂອກາດນີ້, ສະຫາຍ ພັນເອກ ຄໍາປານ ແພງພັນ ໄດ້ເລົ່າຫວນຄືນມູນເຊື້ອປະຫວັດ ແລະ ວິລະກໍາອັນລໍ້າເລີດຂອງກອງທັບປະຊາຊົນລາວ  ເຊິ່ງໄດ້ຮັບການສ້າງຕັ້ງຂຶ້ນ ໃນວັນທີ 20 ມັງກອນ 1949 ຢູ່ເຂດທີ່ໝັ້ນຖ້ຳແມ ເຂດລາວຮຸ່ງ-ພຽງສາ ເມືອງຊຽງຄໍ້ ແຂວງຫົວພັນ ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ກອງລາດຊະວົງ ຂຶ້ນ, ທ່ານ ເພັດສະວົງ ເປັນຫົວໜ້າການທະຫານ, ທ່ານ ສີສະຫວາດ ແກ້ວບຸນພັນ ເປັນຫົວໜ້າການເມືອງ ແລະ ທ່ານ ຄຳມູນ ເປັນຮອງຜູ້ບັນຊາ. ໃນມື້ດຽວກັນນັ້ນ, ໂດຍພາຍໃຕ້ການຳພາ ຢ່າງແທດເຖິງຂອງ ສາຂາພັກກອມມູນິດອິນດູຈີນ ປະຈຳແຄ້ວນລາວ, ກອງປະຊຸມໄດ້ເອົາສະຖານທີ່ ກອງລາດຊະວົງ ເປັນບ່ອນຈັດພິທີປະກາດ ສ້າງຕັ້ງກອງທັບອິດສະຫລະ ຂຶ້ນຢ່າງເປັນທາງການ ຢູ່ທີ່ສະຖານທີ່ດຽວກັນ ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ບັນຊາໂດຍກົງ. ຈາກນັ້ນມາ, ບັນດາກອງເອກະລາດອື່ນໆ ເຊັ່ນ: ກອງໄຊຈັກພັດ, ກອງຟ້າງຸ່ມ, ກອງຟ້າປັດໄຈ ແລະ ກອງໄຊເສດຖາ ກໍໄດ້ປະກາດໂຮມເຂົ້າກັນ ເປັນກອງທັບອິດສະຫລະ ພາຍໃຕ້ການຊີ້ນຳໂດຍກົງຂອງ ເລຂາພັກກອມມູນິດອິນດູຈີນ ປະຈຳລາວ; ນັບແຕ່ນັ້ນມາ ວັນທີ 20 ມັງກອນ 1949 ຈຶ່ງກາຍເປັນປະຫວັດສາດ ແຫ່ງການສ້າງຕັ້ງ ກອງທັບປະຊາຊົນລາວ. ພ້ອມນີ້, ທ່ານຍັງໄດ້ຍົກໃຫ້ເຫັນເຖິງທາດແທ້ ຂອງກອງທັບປະຊາຊົນລາວ ນັບແຕ່ມື້ສ້າງຂຶ້ນມາ ໄດ້ກາຍເປັນກໍາລັງຫລັກແຫລ່ງ ໃນຂະບວນການຕໍ່ສູ້ປະຕິວັດ ຂອງປະຊາຊົນບັນດາເຜົ່າ ຕ້ານຈັກກະພັດຜູ້ຮຸກຮານ ແລະ ໂຄ່ນລົ້ມລະບອບສັກດີນາປະຕິການ, ສ້າງຕັ້ງລະບອບໃໝ່ຂຶ້ນແທນ ແລະ ສືບຕໍ່ປົກປັກຮັກສາ, ສ້າງສາພັດທະນາປະເທດຊາດໄວ້ໃຫ້ໝັ້ນຄົງ.

ກອງທັບປະຊາຊົນລາວ ແມ່ນພັກປະຊາຊົນ ປະຕິວັດລາວ ເປັນຜູ້ຈັດຕັ້ງ, ນໍາພາບັນຊາ ແລະ ສຶກສາອົບຮົມ, ແມ່ນກອງທັບທີ່ຍຶດໝັ້ນ ລັດທິມາກ-ເລນິນ, ເປັນກອງທັບຂອງປະຊາຊົນ ທີ່ມີຄວາມຈົງຮັກພັກດີ, ມີຄວາມຊື່ສັດບໍລິສຸດ, ມີລະບຽບວິໄນທີ່ເຂັ້ມງວດ ແລະ ເປັນເຄື່ອງມືອັນແຫລມຄົມ ຂອງພັກກປະຊາຊົນລາວ ຍ້ອນກອງທັບປະຊາຊົນລາວ ກໍາເນີດມາຈາກ ປະຊາຊົນ ໂດຍປະຊາຊົນ ແລະ ຕໍ່ສູ້ເພື່ອສິດຜົນປະໂຫຍດ, ຄວາມສົມບູນພູນສຸກ ຂອງປະຊາຊົນບັນດາເຜົ່າຢ່າງແທ້ຈິງ.

ຂ່າວ: ໄພນາລິນ

KPL