KPL
ສິງກະໂປ ປະກາດ ແຜນການ ປັບປຸງ ຖະໜົນ 10 ສາຍ ຢູ່ທົ່ວເກາະ ໃນປີ 2026 ເພື່ອສ້າງຖະໜົນ ທີ່ເປັນມິດ ຕໍ່ກຸ່ມຄົນຍ່າງ ແລະ ຂີ່ລົດຖີບ ໂດຍສະເພາະ ຜູ້ສູງອາຍຸ ແລະ ເດັກນ້ອຍ.
ຂປລ. ສຳນັກຂ່າວ ຊິນຮວາ ຂອງ ສປຈີນ ລາຍງານ ຈາກປະເທດ ສິງກະໂປ ເມື່ອບໍ່ດົນມານີ້ວ່າ: ສິງກະໂປ ປະກາດ ແຜນການ ປັບປຸງ ຖະໜົນ 10 ສາຍ ຢູ່ທົ່ວເກາະ ໃນປີ 2026 ເພື່ອສ້າງຖະໜົນ ທີ່ເປັນມິດ ຕໍ່ກຸ່ມຄົນຍ່າງ ແລະ ຂີ່ລົດຖີບ ໂດຍສະເພາະ ຜູ້ສູງອາຍຸ ແລະ ເດັກນ້ອຍ. ກະຊວງ ຄົມມະນາຄົມ ສິງກະໂປ ລະບຸວ່າ ໂຄງການ “ຖະໜົນ ທີ່ເປັນມິດ” (Friendly Streets ) ຈະເລີ່ມດຳເນີນການ ເທື່ອລະກ້າວ ໃນໄລຍະ 6 ເດືອນຕົ້ນປີນີ້ ໂດຍຄາດວ່າ ຈະສຳເລັດ ໃນປີ 2026 ແລະ ທຸກພື້ນທີ່ ໃນສິງກະໂປ ຈະມີຖະໜົນ ທີ່ເປັນມິດ ຢ່າງໜ້ອຍ 1 ສາຍ ໃນປີ 2030.
ສຳນັກງານ ການຂົນສົ່ງ ທາງບົກ ຂອງ ສິງກະໂປ (ແອລທີເອ) ລະບຸວ່າ: ຖະໜົນຮູບແບບ ດັ່ງກ່າວ ຈະຕັ້ງຢູ່ບໍລິເວນ ພື້ນທີ່ຢູ່ອາໄສ ທີ່ມີ ຄົນຍ່າງໄປມາ ຈໍານວນຫລວງຫລາຍ ແລະ ຢູ່ໃກ້ກັບ ສິ່ງກໍ່ສ້າງ ທີ່ຈຳເປັນເຊັ່ນ: ຕະຫລາດ, ສູນອາຫານ, ສະໂມສອນຊຸມຊົນ, ໂຮງຮຽນ ແລະ ສະຖານີ ລົດໄຟຟ້າໃຕ້ດິນ ເນື່ອງຈາກ ພື້ນທີ່ດັ່ງກ່າວ ມີຜູ້ສູງອາຍຸ ຫລື ຄອບຄົວ ຄົນໄວໜຸ່ມ ອາໄສຢູ່ຢ່າງໜາແໜ້ນ. ການປັບປຸງ ຖະໜົນ ທີ່ເປັນມິດ ຕໍ່ຄົນຍ່າງໃນຄັ້ງນີ້ ລວມໄປເຖິງ ການກຳນົດ ຄວາມໄວລົດ ໃຫ້ຕໍ່າລົງ, ການສ້າງທາງ ມ້າລາຍ ປາສະຈາກ ສິ່ງກິດຂວາງ ເພື່ອໃຫ້ຄວາມສຳຄັນ ຕໍ່ ຄົນຍ່າງ, ເຄື່ອງໝາຍ ເທິງຖະໜົນ ຕະຫລອດຮອດ ການຮັກສາ ຄວາມສະຫງົບ ໃນການ ຈາລະຈອນ ແລະ ການສົ່ງເສີມ ຂັບຂີ່ ທີ່ ສຸພາບ ລວມທັງຂະຫຍາຍທາງຍ່າງ ໃຫ້ກວ້າງຂຶ້ນ ແລະ ອື່ນໆ./
KPL
