ຂປລ. ການຈັດຕັ້ງການທາບທາມຄຳເຫັນ ໃສ່ຮ່າງລັດຖະທຳມະນູນ ສະບັບປັບປຸງຄັ້ງນີ້ ມີຄວາມໝາຍ ສຳຄັນຢ່າງຍິ່ງ ແລະ ແມ່ນຄວາມຈຳເປັນ ຢ່າງພາວະວິໄສ ເພາະວ່າ ລັດຖະທຳ ມະນູນ ແມ່ນນິຕິກຳສູງສຸດຂອງລັດ ແຫ່ງ ສປປ ລາວ ແລະ ເປັນກົດໝາຍພື້ນຖານຂອງຊາດລາວເຮົາ.

ຕໍ່ກັບການທາບທາມຄຳເຫັນ ໃສ່ຮ່າງລັດຖະທຳມະນູນ ຄັ້ງນີ້, ສູນກາງພັກປະຊາຊົນປະຕິວັດລາວ ໄດ້ໃຫ້ທັດສະນະຊີ້ນຳ ດັ່ງນີ້: ແນໃສ່ການປັບປຸງລະບົບ ອຳນາດແຫ່ງລັດ ໃຫ້ມີປະສິດ ທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດພາກພື້ນ ແລະ ສາກົນ ແນໃສ່ສ້າງພື້ນຖານທາງດ້ານກົດໝາຍ ກໍຄືນິຕິກຳທີ່ຈະວາງອອກໃນຕໍ່ໜ້າ ໃຫ້ຮັບປະກັນແນວທາງ ການເມືອງຂອງພັກ, ການຄຸ້ມຄອງ-ບໍລິຫານລັດໃນໄລຍະໃໝ່; ການປັບປຸງລັດຖະທຳມະນູນຄັ້ງນີ້, ຕົ້ນຕໍແມ່ນສຸມໃສ່ ປັບປຸງບາງໝວດ, ບາງມາດຕາເພື່ອຮັບປະກັນ ຫລື ຮອງຮັບແນວທາງການເມືອງຂອງພັກ ແລະ ແນວທາງການຈັດຕັ້ງ, ການຄຸ້ມຄອງ-ບໍລິຫານລັດໃນໄລຍະໃໝ່ ກໍຄື ແນວທາງ ປ່ຽນແປງໃໝ່ ໃນຊຸມປີຕໍ່ໜ້າ, ໂດຍສະເພາະ ໃນສະໄໝ ທີ XII ຂອງພັກ ຫາກບໍ່ແມ່ນການປັບປຸງທັງໝົດເນື້ອໃນ ຂອງລັດຖະທຳມະນູນ. ໝາຍວ່າ ອັນໃດທີ່ເຂົ້າໃຈ ເປັນເອກະພາບ, ປະຕິບັດມີປະສິດທິຜົນ, ບໍ່ມີຄວາມສັບສົນ ຫລື ເປັນບັນຫາຫຍຸ້ງຍາກ ໃນການຈັດຕັ້ງປະຕິບັດ ກໍບໍ່ຈຳເປັນຕ້ອງປັບປຸງຕື່ມອີກ; ການປັບປຸງລັດຖະທຳມະນູນ ຕ້ອງມີເນື້ອໃນສອດຄ່ອງກັບ ບັນດາເນື້ອໃນຂອງ ໂຄງການການ ເມືອງຂອງພັກ ສະບັບທີ 3, ຮ່າງລາຍງານການເມືອງ ທີ່ຈະສະເໜີຕໍ່ກອງປະຊຸມໃຫຍ່ ສະໄໝທີ XII ຂອງພັກ, ມະຕິ 05/ຄບສພ, ມະຕິ 04/ກມສພ ແລະ ຄໍາສັ່ງຂອງຄະນະເລຂາທິການສູນກາງພັກ ເລກທີ 173/ຄລສພ ໂດຍສະເພາະ ບັນຫາບົດບາດພັກເປັນແກນນໍາ, ບັນຫາຈຸດໝາຍສັງຄົມນິຍົມ, ບັນຫາເສດຖະກິດ ເອກະລາດ ເປັນເຈົ້າຕົນເອງ, ບັນຫາການແບ່ງຂັ້ນຄຸ້ມຄອງ, ການກໍານົດຊື່ເອີ້ນຕ່າງໆ ຕ້ອງປັບປຸງໄປລວງດຽວກັນ.

ການສ້າງ ແລະ ປັບປຸງລັດຖະທຳມະນູນ ເປັນວຽກງານທີ່ສຳຄັນທີ່ສຸດ, ແຕ່ການຈັດ ຕັ້ງປະຕິບັດລັດຖະທຳມະນູນ ໃຫ້ເກີດດອກອອກຜົນເປັນຈິງ ດ້ວຍການຫັນເອົາລັດຖະທຳມະນູນ ເປັນກົດໝາຍ ແລະ ນິຕິກຳໃຕ້ກົດໝາຍ ກໍຄື ການຫັນເຂົ້າສູ່ຊີວິດຕົວຈິງ ຂອງທົ່ວສັງຄົມນັ້ນ ເປັນວຽກງານໜຶ່ງ ທີ່ມີຄວາມໝາຍສຳຄັນ ແລະ ມີຄວາມຫຍຸ້ງຍາກສັບສົນຍິ່ງກວ່າການສ້າງ ແລະ ປັບປຸງລັດຖະທຳມະນູນ ຫລາຍສິບເທົ່າ. ສະນັ້ນ, ພວກເຮົາຈົ່ງພ້ອມກັນປະກອບຄຳຄິດເຮັດໃຫ້ ຮ່າງລັດຖະທຳມະນູນສະບັບນີ້ ກາຍເປັນສະບັບສົມບູນ ແລະ ໃນເມື່ອສະພາ ແຫ່ງຊາດ ໄດ້ຮັບຮອງ ແລະ ຖືກປະກາດໃຊ້ ໂດຍລັດຖະດຳລັດ ຂອງປະທານປະເທດແລ້ວ ມັນເລັ່ງທວງໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດ, ຜູ້ປະກອບການ ທັງພາກລັດ ແລະ ເອກະຊົນ ກໍຄື ປະຊາຊົນລາວບັນດາເຜົ່າໃນທົ່ວປະ ເທດ ຈົ່ງໄດ້ພ້ອມກັນສຶກສາ, ຄົ້ນຄວ້າ ແລະ ເຊື່ອມຊຶມ ເນື້ອໃນຂອງລັດຖະທຳມະນູນ ໃຫ້ເລິກເຊິ່ງ, ພ້ອມທັງຍົກສູງ ສະຕິເຄົາລົບ ແລະ ປະຕິບັດ ລັດຖະທຳມະນູນ ແລະ ກົດໝາຍ ໃຫ້ເຂັ້ມງວດ, ສັກສິດ ແນໃສ່ເຮັດໃຫ້ການສ້າງລັດປະຊາທິປະໄຕປະຊາຊົນລາວ ພາຍໃຕ້ການນຳພາຂອງ ພັກປະຊາຊົນ ປະຕິວັດລາວ ເປັນລັດທີ່ປົກຄອງດ້ວຍກົດໝາຍ  ໃຫ້ມີຜົນສັກສິດເປັນກ້າວໆ, ຮັບປະກັນການເສີມຂະຫຍາຍ ສິດເປັນເຈົ້າປະເທດຊາດ, ສິດ ແລະ ປະຊາທິ ປະໄຕ ຂອງປະຊາຊົນລາວ ບັນດາເຜົ່າ ເພື່ອປົກປ້ອງຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄວ້ຢ່າງໝັ້ນຄົງ, ພັດທະນາເສດຖະກິດ-ສັງຄົມ ໃຫ້ຂະຫຍາຍຕົວ ແລະ ຫລຸດພົ້ນອອກ ຈາກຄວາມຫຍຸ້ງຍາກ ທີ່ພວກເຮົາພວມປະສົບໃນປັດຈຸບັນ ຕາມທິດຍູ້ແຮງການສ້າງເສດຖະກິດເອກະລາດ ເປັນເຈົ້າຕົນເອງ, ເສີມຂະ ຫຍາຍຄວາມເປັນເຈົ້າການ ໃນການເຊື່ອມໂຍງ ກັບພາກພື້ນ ແລະ ສາກົນ, ນໍາພາປະເທດຊາດ ກ້າວເດີນຕາມເສັ້ນທາງກ້າວຂຶ້ນສັງຄົມນິຍົມ ຢ່າງໜັກແໜ້ນ ແລະ ມີໄຊ.

ຂ່າວ: ກິດຕາ

KPL