KPL
ກອງປະຊຸມເວທີ ປຶກສາຫາລື ການທະນາຄານອາຊີ ຄັ້ງທີ 18 ທີ່ຈັດຂຶ້ນໂດຍ ອົງການປົກຄອງເຂດບໍລິຫານ ພິເສດ ຮົງກົງ ແລະ ອົງການ ພັດທະນາການຄ້າ ຮົງກົງ ໄດ້ຈັດຂຶ້ນຢູ່ ສູນປະຊຸມວາງສະແດງຮົງກົງ, ກອງປະຊຸມ ຈະດຳເນີນ ເປັນເວລາ 2 ວັນພາຍໃຕ້ ຫົວຂໍ້ “ຕິດຈັກໃໝ່ ແຫ່ງການເຕີບໂຕ”
ຂປລ.ວິທະຍຸ ສາກົນ ແຫ່ງ ສປ ຈີນ, ວັນທີ 13 ມັງກອນນີ້, ກອງປະຊຸມເວທີ ປຶກສາຫາລື ການທະນາຄານອາຊີ ຄັ້ງທີ 18 ທີ່ຈັດຂຶ້ນໂດຍ ອົງການປົກຄອງເຂດບໍລິຫານ ພິເສດ ຮົງກົງ ແລະ ອົງການ ພັດທະນາການຄ້າ ຮົງກົງ ໄດ້ຈັດຂຶ້ນຢູ່ ສູນປະຊຸມວາງສະແດງຮົງກົງ, ກອງປະຊຸມ ຈະດຳເນີນ ເປັນເວລາ 2 ວັນພາຍໃຕ້ ຫົວຂໍ້ “ຕິດຈັກໃໝ່ ແຫ່ງການເຕີບໂຕ” ໂດຍສຸມໃສ່ ການເຮັດໃຫ້ຮົງກົງ ເສີມຂະຫຍາຍ ທ່າແຮງ ທີ່ເປັນ ສູນການທະນາຄານສາກົນ ຕື່ມອີກ, ສະແຫວງຫາເຄື່ອງຈັກໃໝ່ ແຫ່ງການເຕີບໂຕ ໃນສະພາບການປ່ຽນແປງ ແລະ ອື່ນໆ.ໃນໂອກາດນີ້ ທ່ານ ຫລີເຈ່ຍຊາວ, ຜູ້ວ່າການເຂດບໍລິຫານພິເສດຮົງກົງ ໄດ້ກ່າວຄຳປາໄສ ໃນພິທີໄຂກອງປະຊຸມ. ກອງປະຊຸມ ຍັງໄດ້ເຊື້ອເຊີນ ຜູ້ນຳ, ນັກທຸລະກິດ, ຜູ້ຊ່ຽວຊານ ດ້ານການທະນາຄານ ແລະ ນັກເສດຖະສາດ ທີ່ມີຊື່ສຽງ ຮ້ອຍກວ່າຄົນ ຂຶ້ນກ່າວຄຳປາໄສ ໃນກອງປະຊຸມຄັ້ງນີ້.
ກອງປະຊຸມ ເວທີປຶກສາຫາລື ໄດ້ຈັດໃຫ້ມີ ກິດຈະກຳຕ່າງໆ 40 ກວ່າຄັ້ງ ເຊັ່ນ ງານກ່າວປາຖະກະຖາ, ການສົນທະນາ ດ້ານນະໂຍບາຍ ແລະ ກອງປະຊຸມ ເວທີປຶກສາຫາລື ຫົວຂໍ້ ສະເພາະ 40 ເປັນຕົ້ນ ໂດຍສຸມໃສ່ ຫົວຂໍ້ຈຸດສຸມຕ່າງໆ ເຊັ່ນ: “ການຄາດຄະເນ ເສດຖະກິດທົ່ວໂລກ”, “ໂອກາດຈາກ ສປ ຈີນ” ແລະ ອື່ນໆ ໂດຍສຸມໃສ່ ໂອກາດ ການຄ້າໃນຕະຫລາດ ຈະເລີນໃໝ່ຕ່າງໆ ເຊັ່ນ: ແຜ່ນດິນໃຫຍ່ຈີນ, ອາຊຽນ ແລະ ຕາເວັນອອກກາງ ເຊິ່ງຈະດຶງດູດບຸກຄົນ ໃນວົງການການທະນາຄານ ແລະ ການຄ້າ ຫລາຍກວ່າ 3.600 ຄົນເຂົ້າຮ່ວມ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
