ຂປລ.ວິທະຍຸ ສາກົນ ແຫ່ງ ສປ ຈີນ, ເມື່ອບໍ່ດົນມານີ້, ທ່ານ ສີ ຈິ້ນຜິງ, ເລຂາທິການໃຫຍ່ ຄະນະກຳມະການ ສູນກາງພັກ ກອມມູນິດຈີນ, ປະທານ ປະເທດຈີນ, ປະທານ ຄະນະກຳມະການ ການທະຫານ ສູນກາງຈີນ ໄດ້ໃຫ້ການຊີ້ນຳ ທີ່ສຳຄັນ ຕໍ່ວຽກງານ ຕິດຕາມກວດກາ ດ້ານການເງິນ ໂດຍເນັ້ນໜັກວ່າ ຕ້ອງສຸມໃສ່ ຄວາມຮັບຜິດຊອບ ຕົ້ນຕໍ ແລະ ວຽກງານຕົ້ນຕໍ, ລົງເລິກ ການປະຕິຮູບ ແລະ ການປະດິດສ້າງໃໝ່, ເພີ່ມທະວີ ການສ້າງສາຕົນເອງ, ພະຍາຍາມ ສ້າງລະບົບ ຕິດຕາມ ກວດກາ ດ້ານການເງິນ ແບບໂຮມສູນ ເປັນເອກະພາບກັນ, ປົກຫຸ້ມ ຢ່າງຮອບດ້ານ, ມີອິດທິພົນ ແລະ ປະສິດທິຜົນສູງ, ຮັບປະກັນ ການພັດທະນາ ທີ່ມີຄຸນນະພາບສູງ ຂອງເສດຖະກິດສັງຄົມ ດ້ວຍການຕິດຕາມ ກວດກາ ດ້ານການເງິນທີ່ມີຄຸນນະພາບສູງ, ປະກອບສ່ວນ ອັນໃໝ່ ເຂົ້າໃນການຊຸກຍູ້ ການສ້າງປະເທດ ໃຫ້ເຂັ້ມແຂງ ແລະ ການຟື້ນຟູຄວາມຈະເລີນຮຸ່ງເຮືອງ ຂອງປະຊາຊາດຈີນ ຢ່າງຮອບດ້ານ ດ້ວຍຄວາມທັນສະໄໝ ແບບຈີນ. ກອງປະຊຸມ ວຽກງານຕິດຕາມກວດກາ ດ້ານການເງິນ ທົ່ວປະເທດຈີນ ກໍ່ຄື ກອງປະຊຸມ ຍ້ອງຍໍສັນລະເສີນ ຄະນະ ແລະ ບຸກຄົນ ທີ່ດີເດັ່ນ ຂອງອົງການຕິດຕາມ ກວດກາ ດ້ານການເງິນ ທົ່ວປະເທດຈີນ ໄດ້ໄຂຢູ່ ນະຄອນຫລວງ ປັກກິ່ງ ຂອງ ສປ ຈີນ. ໃນກອງປະຊຸມ, ທ່ານ ອູເຈີ້ງລຸງ ທີ່ປຶກສາແຫ່ງລັດ ທັງເປັນຫົວໜ້າ ເລຂາທິການ ຄະນະລັດຖະບານຈີນ ໄດ້ອ່ານຄຳຊີ້ນຳ ທີ່ສຳຄັນ ຂອງທ່ານ ສີ ຈິ້ນຜິງ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL