- ບັນດາ​ທ່ານພະນັກງານ, ທະຫານ, ຕໍາຫລວດ ແລະ ປະຊາຊົນລາວບັນດາເຜົ່າ ທີ່

          ນັບຖື ແລະ ຮັກແພງ.

ມື້ນີ້ ວັນທີ 10 ມັງກອນ ເປັນຕົວເລກ 10.01 ເຊິ່ງແມ່ນສັນຍາລັກ ເລກລະຫັດຂໍ້ມູນດີຈິຕອນ. ສະນັ້ນ, ລັດຖະບານ ຈຶ່ງໄດ້ຮັບຮອງເປັນວັນດີຈິຕອນແຫ່ງຊາດ ຕາມດຳລັດຂອງນາຍົກລັດຖະມົນຕີ ສະບັບເລກທີ 301/ລບ, ລົງວັນທີ 31 ຕຸລາ 2023 ແລະ ໄດ້ປະກາດຢ່າງເປັນທາງການ ໃນງານສັບ ປະດາດີຈິຕອນ ປີ 2024 ເພື່ອຊຸກຍູ້ສົ່ງເສີມ ການຫັນເປັນດີຈິຕອນ ຕາມແນວທາງ ຂອງພັກ-ລັດ. ໃນປີ 2025 ນີ້, ພວກເຮົາສະເຫລີມສະຫລອງ ວັນດີຈິຕອນແຫ່ງຊາດ ພາຍໃຕ້ຄຳຂວັນວ່າ: “ພັດທະນາພື້ນ ຖານໂຄງລ່າງດີຈິຕອນ ຂອງ ສປປ ລາວ ໃຫ້ເຂັ້ມແຂງ ແລະ ຢືນຍົງ” ເພື່ອສ້າງຂະບວນການຂໍ່ານັບຮັບຕ້ອນ 3 ວັນບຸນປະຫວັດສາດ ຂອງປະເທດເຮົາຄື: ວັນສ້າງຕັ້ງພັກຄົບຮອບ 70 ປີ, ວັນສະ ຖາປະນາ ສປປ ລາວ ຄົບຮອບ 50 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ ຢ່າງເປັນຂະບວນຟົດຟື້ນ.

ບັນດາທ່ານ ທີ່ນັບຖື ແລະ ຮັກແພງ !

ປັດຈຸບັນນີ້, ມວນມະນຸດເຮົາ ກໍາລັງກ້າວເຂົ້າສູ່ຍຸກສະໄໝແຫ່ງການປະຕິວັດ ອຸດສາຫະກຳຄັ້ງທີ 4 (ຫລື ເອີ້ນຫຍໍ້ວ່າຍຸກອຸດສາຫະກໍາ 4.0) ເອີ້ນແນວນີ້ກໍຍ້ອນວ່າ ໃນສາມສະຕະວັດທີ່ຜ່ານມານີ້ ໄດ້ເກີດມີການປະຕິວັດອຸດສາຫະກຳ 3 ຄັ້ງແລ້ວ ທີ່ສົ່ງຜົນສະທ້ອນອັນໃຫຍ່ຫລວງ ຕໍ່ການຂະຫຍາຍ ຕົວຂອງສັງຄົມມະນຸດ ຄື: ການປະຕິວັດອຸດສາຫະກຳຄັ້ງທີ 1: ເກີດຂຶ້ນໃນທ້າຍສະຕະວັດທີ 18 (ປີ 1784) ຍ້ອນບັນດານັກວິທະຍາສາດ ໄດ້ຄົ້ນພົບວິທີການນໍາໃຊ້ອາຍນໍ້າ ເພື່ອເປັນພະລັງງານ ໃຫ້ແກ່ເຄື່ອງຈັກອຸດສາຫະກຳ ເຮັດໃຫ້ການຜະລິດອຸດສາຫະກຳ ຂະຫຍາຍຕົວແບບກ້າວກະໂດດ ແລະ ພາໃຫ້ເກີດມີຊົນຊັ້ນນາຍທຶນ ແລະ ກຳມະກອນ. ການປະຕິວັດອຸດສາຫະກຳຄັ້ງທີ 2 ເກີດຂຶ້ນໃນທ້າຍສະຕະວັດທີ 19 (ປີ 1870) ຍ້ອນວ່າບັນດາ ນັກວິທະຍາສາດໄດ້ຄົ້ນພົບພະລັງງານໄຟຟ້າ ແລະ ໄດ້ນໍາໃຊ້ພະລັງງານໄຟຟ້າ ເຂົ້າໃນອຸດສາຫະກຳ ຊຶ່ງພາໃຫ້ເກີດມີການຜະລິດຂະໜາດໃຫຍ່ ເຊັ່ນ: ການຜະລິດອຸດສາຫະກຳໜັກ, ການຫລອມໂລຫະ, ການຜະລິດພາຫານະ ແລະ ເຄື່ອງກົນຈັກຫລາຍຢ່າງ ເຮັດໃຫ້ການພົວພັນ ການຜະລິດປ່ຽນແປງຢ່າງເລິກເຊິ່ງ, ເກີດມີການປະຕິວັດທຶນນິຍົມຢູ່ຫລາຍປະເທດ ແລ້ວກ້າວໄປເຖິງມີການປະຕິວັດສັງຄົມ ນິຍົມໃນປະເທດຣັດເຊຍ ໃນປີ 1917. ສັງຄົມມະນຸດໄດ້ມີການປ່ຽນແປງຢ່າງໃຫຍ່ຫລວງ. ການປະຕິວັດອຸດສາຫະກຳຄັ້ງທີ 3 ເກີດຂຶ້ນໃນທ້າຍສະຕະວັດທີ 20 (ຊຸມປີ 1960) ຍ້ອນບັນດານັກວິທະຍາສາດໄດ້ຄົ້ນພົບ ແລະ ປະດິດເຄື່ອງຄິດເລກທັນສະໄໝ ທີ່ເອີ້ນວ່າ Computer, ນະວັດຕະກຳ ດັ່ງກ່າວໄດ້ຊ່ວຍໃຫ້ມະນຸດສາມາດຄົ້ນຄວ້ານໍາໃຊ້ວິທະຍາສາດ ແລະ ເຕັກໂນໂລຊີໃໝ່ຫລາຍດ້ານ ໃນການຜະລິດອຸດສາຫະກຳ, ຄົ້ນຄວ້າທຳມະຊາດຢູ່ໃນໂລກ, ຢູ່ອາວະກາດ ແລະ ພື້ນ ມະຫາສະໝຸດ. ສະນັ້ນ, ຈຶ່ງເຮັດໃຫ້ການຜະລິດ ແລະ ການດຳລົງຊີວິດຂອງສັງຄົມມະນຸດ ມີການພັດທະນາ ແລະ ຂະຫຍາຍຕົວຢ່າງເລິກເຊິ່ງ. ການປະຕິວັດອຸດສາຫະກຳຄັ້ງທີ 4 ເກີດຂຶ້ນໃນສະ ຕະວັດທີ 21 ນີ້ (ເລີ່ມແຕ່ຊຸມປີ 2010), ຍ້ອນບັນດານັກວິທະຍາສາດໄດ້ຄົ້ນຄວ້າ ພັດທະນານໍາໃຊ້ເຕັກໂນໂລຊີທັນສະໄໝ ໃນ 3 ຂົງເຂດແບບປະສົມປະສານກັນ ເຊັ່ນ: ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ເຕັກໂນໂລຊີດ້ານຟີຊິກ ແລະ ເຕັກໂນໂລຊີ ຊີວະພາບ ຊຶ່ງໄດ້ກາຍເປັນ ເຕັກໂນໂລຊີດີຈິຕອນ ຂອງຍຸກອຸດສາຫະກຳ 4.0 ເປັນຕົ້ນ ເຕັກໂນໂລຊີ ອິນເຕີເນັດແຫ່ງສັບພະສິ່ງ (IoT), ຖານຂໍ້ມູນມະຫາສານ (Big Data) ແລະ ກຸ່ມຂໍ້ມູນຜູກພັນ (Block Chain), ປັນຍາປະດິດ, ຫຸ່ນຍົນ ແລະ ພາຫະນະບໍ່ມີຄົນຂັບ, ນາໂນເຕັກໂນໂລຊີ ແລະ ວິສະວະກຳພັນທຸກຳ, ໂຮງງານອັດສະລິຍະ ແລະ ສ້າງຕົວເມືອງອັດສະລິຍະ. ບັນດາເຕັກໂນໂລຊີດີຈິຕອນທີ່ກ່າວມານັ້ນ ໄດ້ກາຍເປັນພາຫະນະຄົ້ນຄວ້າໂລກ, ດັດແປງທຳມະຊາດ ແລະ ກາຍເປັນກຳລັງຂັບເຄື່ອນ ຂະບວນການຜະລິດ ແລະ ການແຂ່ງຂັນລະຫວ່າງປະເທດ. ສະນັ້ນ, ການປະຕິວັດອຸດສາຫະກຳ ຄັ້ງທີ 4 ນີ້ ຈຶ່ງເຮັດໃຫ້ການຊັ່ງຊາກຳລັງ ຢູ່ໃນໂລກມີການປ່ຽນແປງ, ປະເທດໃດສາມາດເປັນເຈົ້າເຕັກໂນໂລຊີໃໝ່, ນຳໃຊ້ນະວັດຕະກຳໃໝ່ ກໍຈະມີກຳລັງແຮງຂຶ້ນ ແລະ ມີອິດທິພົນສູງເດັ່ນຂຶ້ນໃນເວທີສາກົນ, ກົງກັນຂ້າມ ປະເທດໃດທີ່ຍັງຫລ້າຫລັງ, ບໍ່ເຂົ້າເຖິງເຕັກໂນໂລຊີທີ່ທັນສະໄໝ, ຂຸດຄົ້ນແຕ່ຊັບພະຍາກອນທຳມະຊາດ, ບໍ່ພັດທະນາຊັບພະຍາກອນມະນຸດ ຈະກາຍເປັນປະເທດທີ່ຫລ້າຫລັງ ອ່ອນແອ ແລະ ບໍ່ມີກຳລັງຕໍ່ລອງໄດ້.

ການປະຕິວັດອຸດສາຫະກຳ ຄັ້ງທີ 4 ພວມເປັນກະແສຟອງຄື້ນໃໝ່ ພັດຜ່ານໄປທົ່ວໂລກ ຊຶ່ງ ສປປ ລາວ ພວກເຮົາກໍບໍ່ອາດ ຈະຫລີກລ່ຽງໄດ້. ສະນັ້ນ, ເພື່ອຮອງຮັບຍຸກອຸດສາຫະກຳ 4.0 ຢ່າງເປັນເຈົ້າການ ແລະ ນໍາໃຊ້ຜົນສໍາເລັດ ໃນທາງດ້ານວິທະຍາສາດ ແລະ ເຕັກໂນໂລຊີ ເຂົ້າໃນການພັດທະນາປະເທດເຮົາ ໃນໄລຍະໃໝ່ນັ້ນ ມີຄວາມຈໍາເປັນຢ່າງພາວະວິໄສ ຈະຕ້ອງຫັນເປັນດີຈິຕອນຢູ່ປະເທດເຮົາ. ການຫັນເປັນດີຈິຕອນ ແມ່ນການນຳໃຊ້ເຕັກໂນໂລຊີດີຈິຕອນ ຢູ່ໃນທຸກຂົງເຂດການພັດທະນາເສດຖະ ກິດ-ສັງຄົມ ໃນຂອບເຂດທົ່ວປະເທດ ເພື່ອເຮັດໃຫ້ການຜະລິດ ແລະ ການພົວພັນການຜະລິດ ມີປະ ສິດຕິພາບ ແລະ ມີຄຸນະພາບໃໝ່ທີ່ດີຂຶ້ນກວ່າເກົ່າ. ການຫັນເປັນດີຈິຕອນ ແມ່ນຂະບວນວິວັດ ທີ່ເປັນທ່າອ່ຽງລວມຂອງໂລກ. ສະນັ້ນ, ການຫັນເປັນດີຈິຕອນຢູ່ ປະເທດເຮົາ ຈຶ່ງເປັນພາລະກິດປະຕິວັດທີ່ສໍາຄັນ ໃນການຫັນເປັນອຸດສາຫະກຳ ແລະ ທັນສະໄໝ ຕາມແນວທາງປ່ຽນແປງໃໝ່ຂອງພັກເຮົາ.

ນີ້ແມ່ນໂອກາດດີ 1.000 ປີ ທີ່ຫາຍາກຄືດັ່ງສຸພາສິດລາວກ່າວໄວ້, ເພາະວ່າໃນຍຸກແຫ່ງການປະ ຕິວັດອຸດສາຫະກຳ ຄັ້ງທີ 1 ນັ້ນ, ປະເທດເຮົາຍັງເປັນປະເທດ ທຸກຍາກ ບໍ່ທັນມີໂອກາດໄດ້ນໍາໃຊ້ເຕັກໂນໂລຊີທັນສະໄໝ, ໃນຍຸກແຫ່ງການປະຕິວັດອຸດສາຫະກຳ ຄັ້ງທີ 2, ປະເທດເຮົາກໍ່ຍັງ ຕົກເປັນເມືອງຂຶ້ນຂອງຕ່າງປະເທດ ຖືກເຂົາກົດຂີ່ຂູດຮີດ ໂດຍບໍ່ມີໂອກາດພັດທະນາປະເທດ, ໃນຍຸກແຫ່ງການປະຕິ ວັດອຸດສາຫະກຳ ຄັ້ງທີ 3 ປະເທດເຮົາກໍກຳລັງດຳເນີນການຕໍ່ສູ້ກູ້ຊາດ ເພື່ອຂັບໄລ່ພວກຈັກກະພັດລ່າເມືອງຂຶ້ນ. ແຕ່ມາໃນຍຸກສະໄໝປັດຈຸບັນນີ້, ພາຍໃຕ້ການນໍາພາອັນປີຊາສາມາດ ຂອງພັກປະຊາຊົນປະຕິວັດລາວ ເຮັດໃຫ້ປະເທດເຮົາໄດ້ ມີເງື່ອນໄຂພັດທະນາ, ລູກຫລານ ປະຊາຊົນເຮົາ ໄດ້ມີເງື່ອນໄຂສຶກສາຮໍ່າຮຽນ ເພື່ອນຳໃຊ້ເຕັກໂນໂລຊີໃໝ່ ທີ່ທັນສະໄໝ, ພັກ-ລັດ ເຮົາໄດ້ເປີດກວ້າງການຮ່ວມມື ກັບບັນ ດາປະເທດເພື່ອນມິດຍຸດທະສາດ ແລະ ບັນດາປະເທດທີ່ເປັນມິດໃນທົ່ວໂລກ, ດຶງດູດການລົງທຶນ ແລະ ຖ່າຍທອດເຕັກໂນໂລຊີ ຈາກຕ່າງປະເທດ. ສະນັ້ນ, ການຫັນເປັນດີຈິຕອນໃນຍຸກນີ້ ຈະຊ່ວຍໃຫ້ປະເທດເຮົາແກ້ໄຂຄວາມ ຫຍຸ້ງຍາກຊໍ້າເຮື້ອ ຍາວນານ, ພາປະເທດໃຫ້ຫລຸດພົ້ນຈາກສະພາວະດ້ອຍພັດທະນາ ແລະ ກ້າວເດີນທຽບທັນກັບ ບັນດາປະເທດຢູ່ໃນພາກພື້ນ ແລະ ໃນໂລກ.

ຂະບວນການຫັນເປັນດີຈິຕອນ ຢູ່ປະເທດເຮົາຈະຕ້ອງຕິດພັນຢ່າງສະໜິດແໜ້ນ ກັບການຈັດ ຕັ້ງຜັນຂະຫຍາຍ ແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ໃນແຕ່ລະໄລຍະ ເພື່ອໃຫ້ຮັບປະກັນຄວາມ ໝັ້ນຄົງຂອງລະບອບປະຊາທິປະໄຕປະຊາຊົນ, ສ້າງການຫັນປ່ຽນ ການພັດທະນາ ເສດຖະກິດ-ສັງຄົມ ໄປສູ່ຄຸນະພາບໃໝ່ຢ່າງແຂງແຮງ ໂດຍໃຫ້ມີຄວາມສົມດຸນລະຫວ່າງ ການພັດທະນາເສດຖະກິດ-ສັງຄົມ ແລະ ສິ່ງແວດລ້ອມ ຕາມທິດການພັດທະນາແບບຍືນຍົງ ແລະ ສີຂຽວ. ສະນັ້ນ, ທົ່ວພັກທົ່ວລັດ ແລະ ທົ່ວສັງຄົມ ຕ້ອງໄດ້ຮີບຮ້ອນຫັນປ່ຽນຈິນຕະນາການຢ່າງເລິກ ເຊິ່ງ ເພື່ອກຳເອົາກາລະໂອກາດ ພັດທະນາປະເທດຊາດ. ການຫັນເປັນດີຈິຕອນ ຕ້ອງດໍາເນີນຢ່າງເລິກເຊິ່ງໃນ 3 ດ້ານ ທີ່ກ່ຽວພັນ ​ເຊິ່ງກັນ ແລະ ກັນ ແບບກາຍອິນຊີ ຄື: ສ້າງເສດຖະກິດດີຈິຕອນ, ສ້າງສັງຄົມດີຈິຕອນ ແລະ ສ້າງການບໍລິຫານລັດແບບ ດີຈິຕອນ ໂດຍຕິດພັນກັບການ ພັດທະນາຊັບພະຍາກອນມະນຸດ ທີ່ມີຄຸນະພາບສູງ, ສ້າງພື້ນຖານໂຄງລ່າງ ICT ທີ່ທັນສະໄໝ, ປົກປັກຮັກສາ ສິ່ງແວດລ້ອມ ແລະ ຮັບປະກັນຄວາມປອດໄພດ້ານໄຊເບີຢ່າງໜັກແໜ້ນ.

 ໂດຍປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ, ໄລຍະ 4 ປີ ຜ່ານມານີ້ຂະແໜງ ເຕັກໂນໂລຊີ ແລະ ການສື່ສານ ໄດ້ຕັດສິນໃຈຜ່ານຜ່າຂໍ້ຫຍຸ້ງຍາກຫລາຍຢ່າງ ແລະ ສາມາດສ້າງຜົນງານທີ່ດີເດັ່ນຂຶ້ນມາໄດ້ຫລາຍດ້ານ. ປັດຈຸບັນນີ້, ສັນຍານໂທລະຄົມລະບົບເຄືອຍຂ່າຍ 2G ກວມໄດ້ 97%, ລະບົບ 3G ໄດ້ 85% ແລະ ລະບົບ 4G ກວມ 78% ຂອງຈໍານວນບ້ານທົ່ວປະເທດ. ອັນພົ້ນເດັ່ນແມ່ນປີ 2024 ທີ່ຜ່ານມາ, ບັນດາບໍລິສັດໂທລະຄົມ ໄດ້ຂະຫຍາຍສັນຍານລະບົບ 5G ຢູ່ 4 ແຂວງ ແລະ ນະຄອນຫລວງວຽງຈັນ. ການນຳໃຊ້ໂທລະສັບຕັ້ງໂຕະ ແລະ ມືຖືມີທັງໝົດ 6,3 ລ້ານເລກໝາຍ, ການນຳໃຊ້ອິນເຕີເນັດມີ 4,5 ລ້ານບັນຊີ, ຕິດຕັ້ງສາຍກາບໃຍແສງໄດ້ 97.153 ກິໂລແມັດ. ພ້ອມກັນນັ້ນ, ຍັງໄດ້ສ້າງຖານຂໍ້ມູນມະຫາສານ, ສ້າງລະບົບຄລາວ ແລະ ລະບົບກຸ່ມຂໍ້ມູນພູກພັນ ເພື່ອເກັບຮັກສາ ແລະ ວິໄຈນຳໃຊ້ຂໍ້ມູນ. ບັນດາກະຊວງຂະແໜງການ ແລະ ຜູ້ປະກອບການກໍໄດ້ພັດທະນາຖານລະບົບ ເພື່ອບໍລິການ ການບໍລິຫານລັດ ແລະ ຮັບໃຊ້ສັງຄົມເຊັ່ນ: ພັດທະນາຖານລະບົບວຽກງານບໍລິຫານລັດໄດ້ 37 ລະບົບ ໃນນັ້ນມີເຄືອຂ່າຍ G-Net ເຊື່ອມໂຍງໄດ້ 18 ກະຊວງ, 17 ແຂວງ ແລະ 1 ນະຄອນຫລວງ, ສ້າງລະບົບຫ້ອງການທັນສະໄໝ, ລະບົບສື່ສານພາກລັດ G-Chat, G-Share ແລະ ລະບົບກອງປະຊຸມທາງໄກ. ພັດທະນາຖານລະບົບ ເສດຖະກິດດີຈິຕອນ ໄດ້ 16 ລະບົບ, ໃນນັ້ນມີທັງລະບົບການຊຳລະ, ລະບົບການເກັບພາສີອາກອນແບບທັນສະໄໝ ແລະ ລະບົບຄຸ້ມຄອງການແລກປ່ຽນເງິນຕາຕ່າງປະເທດ. ພັດທະນາຖານລະບົບສັງຄົມດິຈິຕອນໄດ້ 13 ລະບົບເຊັ່ນ: ລະບົບຂ່າວ ສານ Lao Pedia, ລະບົບການສຶກສາທາງໄກ L-Mooc, ລະບົບການຄຸ້ມຄອງການສັກຢາວັກຊີ​ນ ແລະ ລະບົບລາວສູ້ໆຕິດຕາມເຝົ້າລະວັງ ການລະບາດຂອງພະຍາດ.

ນອກຈາກນັ້ນ, ກະຊວງເຕັກໂນໂລຊີ ແລະ ການສື່ສານ ຍັງໄດ້ພັດທະນາລະບົບຮັກສາຄວາມປອດໄພໄຊເບີ ແລະ ສ້າງນິຕິກຳຮັບໃຊ້ໃຫ້ແກ່ການຫັນເປັນດີຈິຕອນ 67 ສະບັບ, ເອົາໃຈໃສ່ພັດທະນາຊັບພະຍາກອນມະນຸດ ດ້ານດີຈິຕອນ ເພື່ອຮອງຮັບການຫັນເປັນດີຈິຕອນຂອງປະເທດເຮົາ. ອັນພົ້ນເດັ່ນກວ່າໝູ່ແມ່ນ ປະທານປະເທດ ໄດ້ອອກລັດຖະດຳລັດ ແຕ່ງຕັ້ງຄະນະຫັນເປັນດີຈິຕອນລະດັບຊາດ ໂດຍແມ່ນ ທ່ານນາຍົກລັດຖະມົນຕີ ເປັນປະທານ ຊຶ່ງມາເຖິງປັດຈຸບັນ, ບັນດາກະຊວງ, ຂະແໜງການ ແລະ ບັນດາແຂວງ, ນະຄອນຫລວງ ກໍໄດ້ສ້າງຕັ້ງຄະນະຫັນເປັນດີຈິຕອນຂອງຕົນຂຶ້ນ ເພື່ອຊີ້ນຳ-ນຳພາການຫັນເປັນດີຈິຕອນ ໃຫ້ປະສົບຜົນສໍາເລັດ.

ໃນປີ 2025 ນີ້, ກະຊວງເຕັກໂນໂລຊີ ແລະ ການສື່ສານ ຈະສືບຕໍ່ພັດທະນາພື້ນຖານໂຄງລ່າງ ດ້ານໂທລະຄົມ ແລະ ອິນເຕີເນັດ ໃຫ້ມີຄຸນນະພາບສູງ ໃນເຂດຕົວເມືອງ ແລະ ຂະຫຍາຍເຂົ້າໄປຫາເຂດຫ່າງໄກສອກຫລີກ, ປັບປຸງຄຸນນະພາບ ອິນເຕີເນັດໃຫ້ມີຄວາມໄວສູງ ໃນລາຄາທີ່ເໝາະສົມ, ປັບ ປຸງ ແລະ ພັດທະນາ ບັນດາຖານລະບົບ (Platform) ບໍລິການ ແລະ ບໍລິຫານລັດດີຈິຕອນ, ເສດ ຖະກິດດີຈິຕອນ ແລະ ສັງຄົມດີຈິຕອນ ໃຫ້ສາມາດເຊື່ອມໂຍງຂໍ້ມູນທີ່ຈໍາເປັນ ໃຫ້ບໍລິການປະຊາຊົນໃຫ້ໄດ້ຢ່າງກວ້າງຂວາງ ຮັບປະກັນ ໃຫ້ມີຄວາມປອດໄພໄຊເບີ ໃນລະດັບສູງ ແລະ ພັດທະນາທັກສະດີຈິຕອນ ໃຫ້ແກ່ທົ່ວສັງຄົມ, ສ້າງແຮງງານດີຈິຕອນ ເພື່ອຮອງຮັບການຫັນເປັນດີຈິຕອນ ຂອງປະເທດເຮົາ.

ບັນດາທ່ານທີ່ນັບຖື ແລະ ຮັກແພງ!

ໃນໂອກາດສະເຫລີມສະຫລອງ ວັນດີຈິຕອນແຫ່ງຊາດ ທີ່ມີຄວາມໝາຍສຳຄັນນີ້, ຂ້າພະເຈົ້າຂໍຮຽກຮ້ອງມາຍັງບັນດາທ່ານ ຈົ່ງໄດ້ນຳໃຊ້ເຕັກໂນໂລຊີດີຈິຕອນ, ອິນເຕີເນັດ ແລະ ຂໍ້ມູນຂ່າວສານ ໃຫ້ມີຜົນປະໂຫຍດສູງສຸດໃນທຸກໆຂົງເຂດວຽກງານ ທັງພາກລັດ ແລະ ພາກເອກະຊົນ, ມີສະຕິລະວັງຕົວສູງ ໃນການນຳໃຊ້ ສື່ສັງຄົມອອນລາຍ ເພື່ອບໍ່ໃຫ້ຕົກເລ່ກົນຂອງພວກຄົນບໍ່ດີ, ເອົາໃຈໃສ່ຫັນເປັນທັນສະໄໝ ແລະ ນຳໃຊ້ເຕັກໂນໂລຊີດີຈິຕອນ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ແຜນພັດທະນາເສດຖະກິດດີຈິຕອນແຫ່ງຊາດ 5 ປີ (2021-2025) ແລະ ປະຕິບັດສອງວາລະແຫ່ງຊາດໃນການແກ້ໄຂບັນຫາເສດຖະກິດ-ການເງິນ ແລະ ບັນຫາຢາເສບຕິດໃຫ້ປະສົບຜົນສຳເລັດຢ່າງສະຫງ່າງາມ.

ນະໂອກາດອັນສະຫງ່າລາສີນີ້, ຂ້າພະເຈົ້າຂໍອວຍພອນໄຊອັນປະເສີດ ມາຍັງບັນດາທ່ານຜູ້ນໍາພັກ-ລັດ, ບັນດາທ່ານພະນັກງານ, ທະຫານ, ຕຳຫລວດ, ນັກຮຽນຮູ້ປັນຍາຊົນ ຕະຫລອດເຖິງບັນດາຜູ້ປະກອບການທຸລະກິດ ແລະ ປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ສຸມທຸກເຫື່ອແຮງ ແລະ ສະຕິປັນຍາເຂົ້າໃນການປະຕິບັດ 2 ໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ, ຊຸກຍູ້ສົ່ງເສີມການຫັນເປັນດີຈິຕອນ ຂອງປະເທດເຮົາ ໃຫ້ກ້າວໜ້າ ແລະ ເປັນຂະບວນການທີ່ໜັກແໜ້ນ ເພື່ອປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມ ຕາມທິດສີຂຽວ, ຍືນຍົງ, ເຮັດໃຫ້ປະຊາຊົນ ເຮົາມີຄວາມຮັ່ງມີຜາສຸກ, ສັງຄົມມີຄວາມສາມັກຄີເປັນປຶກແຜ່ນ, ປະເທດຊາດມັ່ງຄັ່ງເຂັ້ມແຂງ ຈະເລີນຮຸ່ງເຮືອງຕະຫລອດໄປ.

KPL