KPL
ສປຈີນ ໄດ້ສ້າງຄວາມ ກ້າວໜ້າ ທາງດ້ານ ການສຳຫລວດລິທຽມ, ໂດຍມີ ປະລິມານ ສຳຮອງ ລິທຽມ ເພີ່ມຂຶ້ນ ຈາກ 6% ເປັນ 16,5% ຂອງ ປະລິມານ ສຳຮອງ ລິທຽມ ໃນທົ່ວໂລກ ຈັດເປັນ ອັນດັບ2 ຂອງໂລກ.
ຂປລ. ສຳນັກຂ່າວ ຊິນຮວາ ຂອງ ສປຈີນ, ສຳນັກງານ ສຳຫລວດ ທໍລະນີ ວິທະຍາ ແຫ່ງປະເທດ ສປຈີນ ສັງກັດ ກະຊວງ ຊັບພະຍາກອນ ທຳມະຊາດ ເປີດເຜີຍວ່າ: ສປຈີນ ໄດ້ສ້າງຄວາມ ກ້າວໜ້າ ທາງດ້ານ ການສຳຫລວດລິທຽມ, ໂດຍມີ ປະລິມານ ສຳຮອງ ລິທຽມ ເພີ່ມຂຶ້ນ ຈາກ 6% ເປັນ 16,5% ຂອງ ປະລິມານ ສຳຮອງ ລິທຽມ ໃນທົ່ວໂລກ ຈັດເປັນ ອັນດັບ2 ຂອງໂລກ. ສປຈີນ ໄດ້ຄົ້ນພົບ ແນວແຮ່ລິທຽມ ປະເພດ ສະປໍດູມິນ (spodumene) ທາງພາກຕາເວັນຕົກ ແລະ ຊັບພະຍາກອນລິທຽມ ໃນທະເລສາບເກືອ ຢຸ່ເຂດຊິງໄຫ່-ທິເບດ ໄດ້ເພີ່ມຂຶ້ນ ຢ່າງຫລວງຫລາຍ,
ນອກຈາກນີ້ ຄະນະນັກວິໄຈ ຂອງ ສປຈີນ ຍັງເອົາຊະນະ ຄວາມທ້າທາຍ ທາງດ້ານເຕັກນິກ ຄັ້ງສຳຄັນ, ດ້ວຍການສະກັດ ລິທຽມ ຈາກ ເລປິໂດໄລ (lepidolite) ຊຶ່ງເປັນ ແຮ່ທາດ ທີ່ມີ ປະລິມານ ລິທຽມສູງ ແຕ່ການແປຮູບໄດ້ຍາກ ແລະ ມີຕົ້ນທຶນສູງ. ລິທຽມ ເປັນອົງປະກອບ ສຳຄັນ ສຳລັບ ອຸດສາຫະກຳ ເກີດໃໝ່ ຫລາຍປະເພດ. ໃນນັ້ນ ລວມເຖິງ ອຸດສາຫະກຳ ຍານພາຫະນະ ໄຟຟ້າ, ລະບົບ ການເກັບ ພະລັງງານ, ການສື່ສານ ເຄື່ອນທີ່, ການປິ່ນປົວໃນໂຮງໝໍ ແລະ ອື່ນໆ. ການສຳຫລວດ ລິທຽມ ຂອງຈີນ ໄດ້ເພີ່ມຂຶ້ນ ຈະຊ່ວຍ ຫລຸດຜ່ອນ ການພຶງພາ ການຈັດຫາ ຈາກຕ່າງ ປະເທດ ແລະ ສົ່ງຜົນໃຫ້ ຕະຫລາດ ລິທຽມ ລະດັບໂລກ ມີຄວາມສົມດຸນຂຶ້ນ./
KPL
