KPL
ຈຳນວນ ຜູ້ເສຍຊີວິດ ຈາກ ເຫດແຜ່ນດິນໄຫວ ຄັ້ງໃຫຍ່ ໃນເຂດປົກຄອງ ຕົນເອງ ທິເບດ ຂອງ ສປຈີນ ເພີ່ມຂຶ້ນເປັນ ຢ່າງໜ້ອຍ 126 ຄົນ ແລະ ໄດ້ຮັບບາດເຈັບ ຢ່າງໜ້ອຍ 188 ຄົນ
ຂປລ. ສຳນັກຂ່າວ ຕ່າງປະເທດ ລາຍງານ ຈາກນະຄອນຫລວງ ປັກກິ່ງ ຂອງ ສປຈີນ ເມື່ອວັນທີ 7 ມັງກອນ 2025, ຈຳນວນ ຜູ້ເສຍຊີວິດ ຈາກ ເຫດແຜ່ນດິນໄຫວ ຄັ້ງໃຫຍ່ ໃນເຂດປົກຄອງ ຕົນເອງ ທິເບດ ຂອງ ສປຈີນ ເພີ່ມຂຶ້ນເປັນ ຢ່າງໜ້ອຍ 126 ຄົນ ແລະ ໄດ້ຮັບບາດເຈັບ ຢ່າງໜ້ອຍ 188 ຄົນ, ໂດຍສຳນັກງານ ສຳຫລວດທໍລະນີ ວິທະຍາ ສ.ອາເມລິກາ ກວດພົບ ການເກີດ ແຜ່ນດິນໄຫວ ຮຸນແຮງ ຂະໜາດ 7,1 ລິກເຕີ ມີສູນກາງຢູ່ ພູຫິມາໄລ ໃນເຂດປົກຄອງຕົນເອງ ທິເບດ ຂອງ ສປຈີນ ແລະ ແຮງສັ່ນສະເທືອນ ອາຄານ ຢູ່ໃນນະຄອນຫລວງ ກັດມັນດູ ຂອງ ເນປານ ແລະ ລັດພິຫານໃນ ອິນເດຍ ຊຶ່ງຫ່າງໄກ ໄປຫລາຍຮ້ອຍ ກິໂລແມັດ.
ສະຖານີໂທລະພາບກາງ ແຫ່ງປະເທດ ສປຈີນ (ຊີຊີທີວີ) ລາຍງານວ່າ ປັດຈຸບັນ ເຮືອນຊານອີກຫລາຍກວ່າ 3.600 ຫລັງຄາ ໄດ້ຮັບຄວາມເສຍຫາຍ . ໃນຂະນະດຽວກັນ, ທ່ານ ສີຈິ້ນຜິງ ປະທານ ປະເທດ ສປຈີນ ໄດ້ຮຽກຮ້ອງໃຫ້ໜ່ວຍງານ ທຸກແຫ່ງ ທີ່ ກ່ຽວຂ້ອງ ເລັ່ງໃຫ້ຄວາມຊ່ວຍເຫລືອ ແກ່ຜູ້ປະສົບໄພ. ແຜ່ນດິນໄຫວ ໃນຄັ້ງນີ້ ຖືວ່າ ຮຸນແຮງທີ່ສຸດ ຂອງ ສປຈີນ ນັບແຕ່ ເກີດແຜ່ນດິນໄຫວ ຮຸນແຮງ 6,5 ລິກເຕີ ຢູ່ແຂວງຢູນນານ ເມື່ອປີ 2014 ໂດຍມີຜູ້ເສຍຊີວິດ ຫລາຍກວ່າ 600 ຄົນ./
KPL
