ຂປລ. ອົງການກາແດງແຫ່ງຊາດລາວ ຈັດກິດຈະກຳຍ່າງເພື່ອສຸຂະພາບ ແລະ ວາງສະແດງຮູບພາບ ເນື່ອງໃນວັນສ້າງຕັ້ງ ອົງການກາແດງແຫ່ງຊາດລາວ ຄົບຮອບ 70 ປີ (1 ມັງກອນ 1955 ຫາ 1 ມັງກອນ 2025) ໃນວັນທີ 4 ມັງກອນ2025 ທີ່ປະຕູໄຊນະຄອນຫລວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ປະທານປະເທດ, ປະທານກິດຕິມະສັກອົງ ການກາແດງແຫ່ງຊາດລາວ, ມີບັນດາລັດຖະມົນຕີ ຫົວໜ້າອົງການທຽບເທົ່າ,ເຈົ້າຄອງ ນະຄອນຫລວງວຽງຈັນ, ຕາງໜ້າອົງການສາກົນ ແລະ ພະນັກງານຫລັກແຫລ່ງ ເຂົ້າຮ່ວມ.

ທ່ານ ຄໍາລາວັນ ຈັນທະລາວັນ ປະທານອົງການກາແດງ ແຫ່ງຊາດລາວ ໄດ້ໃຫ້ຮູ້ວ່າ: ການຈັດກິດຈະກຳຄັ້ງນີ້ເປັນ ການສະເຫລີມສະຫລອງ ວັນສ້າງຕັ້ງອົງການກາແດງແຫ່ງຊາດລາວ ຄົບຮອບ 70 ປີ, ທັງເປັນການສ້າງຂະບວນການ ຂໍ່ານັບຮັບຕ້ອນ ການສະເຫລີມສະຫລອງ 3 ວັນປະຫວັດສາດ ຄື: ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີແລະ ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ. ພ້ອມນີ້, ທ່ານຍັງໄດ້ຫວນຄືນເຖິງ ປະຫວັດຫຍໍ້ແລະ ຄວາມເປັນມາຂອງ ອົງການກາແດງແຫ່ງຊາດລາວ,ໃນວັນທີ 1 ມັງກອນ 1955 ອົງການກາແດງແຫ່ງຊາດລາວໄດ້ຖືກສ້າງຕັ້ງຂຶ້ນໂດຍມີຊື່ວ່າ: ສະພາກາຊາດລາວ ໂດຍເຄື່ອນໄຫວ ໜ້າທີ່ຕົ້ນຕໍຄື: ການຈັດຕັ້ງປະຕິບັດ ພັນທະຕາມພາລະບົດບາດຂອງຕົນ ແລະ ຕາມສົນທິສັນຍາສາກົນ ທີ່ລາວເປັນພາຄີເພື່ອຊ່ວຍເຫລືອ ດ້ານມະນຸດສະທຳ ແລະປະຊາສົງເຄາະກະທັນຫັນ,ໃນປີ 1975 ສະພາກາຊາດລາວໄດ້ປ່ຽນຊື່ມາເປັນສະພາກາແດງລາວ ໄດ້ຈັດຕັ້ງເຄື່ອນໄຫວ ຕາມນິຕິກຳ ໂດຍການຂົນຂວຍຍາດແຍ່ງ ການຊ່ວຍເຫລືອ ຈາກສາກົນຊ່ວຍຂະແໜງ ສາທາລະນະສຸກ ເຊັ່ນ: ໂຄສະນາປ້ອງກັນພະຍາດ, ຄຸ້ມຄອງອັດຕາການເກີດ, ການຕາຍ, ໝູນໃຊ້ຢາພື້ນເມືອງ ສົມທົບຢາຫລວງ ແລະ ຝຶກອົບຮົມຄວາມຮູ້ດ້ານ ການສົ່ງເສີມສຸຂະພາບ ໃຫ້ກຸ່ມຄົນເສຍອົງຄະ ທີ່ຖືກຜົນກະຈາກສົງຄາມ. ໃນປີ 1999 ຈົນເຖິງປັດຈຸບັນສະພາ ກາແດງລາວໄດ້ປ່ຽນຊື່ມາເປັນ ອົງການກາແດງແຫ່ງຊາດລາວ ໄດ້ປະຕິບັດ ໜ້າທີ່ ໃນການຈັດຕັ້ງປະຕິບັດ ວຽກງານອີງໃສ່ 7 ຫລັກການ ແລະ 9 ໜ້າວຽກຄື: ການຊ່ວຍເຫລືອບັນເທົາທຸກເບື້ອງຕົ້ນ, ການປຸກລະດົມ ແລະ ຂົນຂວາຍບໍລິຈາກເລືອດ ແລະ ການສະໜອງເລືອດປອດໄພ, ການສົ່ງເສີມສຸຂະພາບຂັ້ນພື້ນຖານ, ການປະຖົມພະຍາບານ, ການກູ້ໄພສຸກເສີນ, ການໂຄສະນາຂົນຂວາຍແຫລ່ງທຶນ, ການສ້າງສະມາຊິກ ແລະ ອາສາສະໝັກກາແດງ, ການສືບທາວຫາຍາດພີ່ນ້ອງ ແລະ ການພົວພັນ ແລະ ຮ່ວມມືສາກົນ.

ປັດຈຸບັນອົງການກາແດງແຫ່ງຊາດລາວ ມີລະບົບການຈັດຕັ້ງຄື: ອົງການກາແດງແຫ່ງຊາດລາວ ອົງການກາແດງແຂວງ ແລະ ຫ້ອງການກາແດງເມືອງ. ເພື່ອໃຫ້ສອດຄ່ອງຕໍ່ແນວທາງ ນະໂຍບາຍຂອງພັກ ແລະ ລັດຖະບານ, ອົງການກາແດງແຫ່ງຊາດລາວ ໄດ້ມີແຜນຍຸດທະສາດ 10 ປີເລີ່ມແຕ່ 2021-2030 ໂດຍມີວິໄສທັດວ່າ: ປະຕິບັດ

ວຽກງານມະນຸດສະທໍາທີ່ມີ ການເຂົ້າຮ່ວມຂອງທຸກຊັ້ນຄົນ ຢູ່ໃນສັງຄົມດ້ວຍຄວາມສະໝັກໃຈ ເຊິ່ງມີ 3 ເປົ້າໝາຍຄື: ການພັດທະນາອົງການ ໃຫ້ເຂັ້ມແຂງແລະຍືນຍົງ; ການສົ່ງເສີມ ສຸຂະພາບ ເພື່ອຄຸນນະພາບຊີວິດທີ່ດີ ແລະ ການກຽມພ້ອມຕອບໂຕ້ ໄພພິບັດ-ຊ່ວຍເຫລືອບັນເທົາທຸກ, ການປຸກລະດົມບໍລິຈາກເລືອດ ແລະ ສະໜອງເລືອດ ທີ່ປອດໄພໃຫ້ແກ່ຄົນເຈັບ.

ທ່ານ ຄໍາລາວັນ ຈັນທະລາວັນ ຍັງໃຫ້ຮູ້ອີກວ່າ: ໃນໄລຍະຜ່ານມາມີ ບາງວຽກງານສາມາດ ໄດ້ຈັດຕັ້ງປະຕິ ບັດລື່ນຄາດໝາຍ ທີ່ສະພາແຫ່ງຊາດ ໄດ້ຮັບຮອງ ເປັນຕົ້ນວຽກງານ ປຸກລະດົມ ຂົນຂວາຍ ແລະ ບໍລິຈາກເລືອດ ແລະສະໜອງເລືອດທີ່ປອດໄພ ໃຫ້ແກ່ຄົນເຈັບ ໃນທົ່ວປະເທດ ຊຶ່ງເປັນບ່ອນອີງໃນການຍ້ອງຍໍ ສັນລະເສີນ ແລະ ເປັນຜົນງານທີ່ພົ້ນເດັ່ນ ຂອງອົງການ ກາແດງແຫ່ງຊາດລາວ.

ຂໍ້ມູນ-ພາບ: ອົງການກາແດງແຫ່ງຊາດ

KPL