ຂປລ. ກອງພັນນັກຮຽນທີ 1 ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ສະຫລຸບວຽກງານຮອບດ້ານ ປະຈຳປີ 2024 ແລະ ຜ່ານທິດທາງແຜນການປະຈຳປີ 2025 ໃນວັນທີ 31 ທັນວາ 2024 ໂດຍການເປັນປະທານຂອງທ່ານ ພັນເອກ ສະແຫວງ ແດນນາມົນ ຫົວໜ້າການເມືອງ ໂຮງຮຽນວັດທະນະທຳຊົນເຜົ່າກອງທັບ, ມີຄະນະພັກ-ຄະນະບັນຊາ, ພະນັກງານ-ນັກຮົບ ແລະ ນັກຮຽນ ເຂົ້າຮ່ວມ.

    
     

ທ່ານ ພັນໂທ ແສນ ດວງມີໄຊ ຫົວໜ້າການທະຫານກອງພັນນັກຮຽນທີ 1 ໄດ້ຜ່ານບົດສະຫລຸບ ຕີລາຄາຜົນງານການເຄື່ອນໄຫວວຽກງານໃນໄລຍະ 1 ປີຜ່ານມາ ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກ ໄດ້ເອົາໃຈໃສ່ສຶກສາອົບຮົມການເມືອງ ນຳພາແນວຄິດ ໃຫ້ພະນັກງານ ນັກຮົບຢ່າງຕໍ່ເນື່ອງ ເຮັດໃຫ້ກົມກອງມີຄວາມເຂັ້ມແຂງ ດ້ານການຈັດຕັ້ງຄຸ້ມຄອງ ໃນການປະຕິບັດຂໍ້ກຳນົດ 7 ລະບອບ 18 ວຽກຂອງກອງທັບ ກໍຄືຂໍ້ກຳນົດກົດລະບຽບຂອງໂຮງຮຽນວາງອອກ ປະຕິບັດນະໂຍບາຍແນວທາງຂອງພັກ-ລັດ ມະຕິຄຳສັ່ງຂອງຂັ້ນເທິງຢ່າງເຂັ້ມງວດ ພ້ອມນັ້ນຍັງໄດ້ຊຸກຍູ້ໃຫ້ນັກຮຽນ ເອົາໃຈໃສ່ຄົ້ນຄວ້າຮໍ່າຮຽນ ໃຫ້ເປັນປົກກະຕິປະກອບສ່ວນ ເຂົ້າໃນຂະບວນການຕ່າງໆ ຂອງກົມກອງ ແລະ ໂຮງຮຽນຈັດຂຶ້ນ ພະນັກງານ-ນັກຮົບ ມີຄວາມຫ້າວຫັນ ປະກອບສ່ວນເຂົ້າໃນ ການກໍ່ສ້າງພື້ນຖານ ໂຄງລ່າງຂອງກົມກອງ ແລະ ພາລະກິດປົກປັກຮັກສາ ສ້າງສາພັດທະນາປະເທດຊາດ ຕ້ານສະກັດກັ້ນບັນດາ ປະກົດການຫຍໍ້ທໍ້ຕ່າງໆ ທີ່ຈະເກີດຂຶ້ນໃຫ້ຫລຸດໜ້ອຍຖອຍລົງ ແລະ ທັນເວລາ ໃນນີ້ສ້າງສະມາຊິກພັກແຂງໄດ້ 22 ສະຫາຍ ຍິງ 01 ສະຫາຍ, ພ້ອມນີ້ ກົມກອງຍັງໄດ້ຊຸກຍູ້ພະນັກງານ-ນັກຮົບ ອອກແຮງເພີ່ມພູນຜະລິດຜົນ ປູກຝັງ ລ້ຽງສັດ ໃນນີ້, ປູກຜັກຊະນິດຕ່າງໆ ຕາມລະດູການ ເພື່ອເປັນສິນຄ້າ ຂາຍອອກນອກໄດ້ 50 ກິໂລກຣາມ ເປັນເງິນ 500.000 ກີບ, ຮັບເງິນບໍລິຫານກອງພັນນຳໂຮງຮຽນ ແລະ ຮັບຈາກເງິນອັດຕາກິນລາພັກນັກຮຽນ ເສົາ-ທິດ ລວມລາຍຮັບ 43 ລ້ານກວ່າກີບ. ນອກນີ້, ຍັງໄດ້ປະຕິບັດນະໂຍບາຍຕໍ່ພະນັກງານ-ນັກຮົບ ຜູ້ທີ່ເຈັບເປັນ ເຂົ້າໂຮງໝໍ, ເສຍຊີວິດ, ສ້າງຄອບຄົວໃໝ່, ເກີດລູກ ແລະ ອື່ນໆ ສຳລັບວຽກງານອື່ນໆ ທີ່ປິ່ນອ້ອມກົມກອງ ກໍມີຜົນສຳເລັດເປັນຢ່າງສູງ.

ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມ ຍັງໄດ້ພ້ອມກັນປະກອບຄຳຄິດເຫັນ ໃສ່ບົດສະຫລຸບ ແລະ ທິດທາງແຜນການໃນຕໍ່ໜ້າ ຢ່າງມີເນື້ອໃນເລິກເຊິ່ງ ພ້ອມທັງມອບຂອງຂວັນໃຫ້ນັກຮຽນຜູ້ທີ່ດີເດັ່ນ ປະເພດ 1 ຈຳນວນ 16 ສະຫາຍ ແລະ ປະເພດ 2 ຈຳນວນ 28 ສະຫາຍ ຕື່ມອີກ.

  
       


ໂອກາດນີ້, ທ່ານ ພັນເອກ ສະແຫວງ ແດນນາມົນ ໄດ້ຍ້ອງຍໍຊົມເຊີຍຕໍ່ຜົນສຳເລັດ ໃນການເຄື່ອນໄຫວວຽກງານໃນໄລຍະທີ່ຜ່ານມາ ພ້ອມທັງຮຽກຮ້ອງໃຫ້ຄະນະບັນຊາກົມກອງ ເອົາໃຈໃສ່ໃກ້ຊິດຕິດແທດອ້າຍນ້ອງຂອງຕົນ ນຳພາ-ຊີ້ນຳເຄື່ອນໄຫວໜ້າທີ່ ວຽກງານຢູ່ພາຍໃນກົມກອງ, ຊຸກຍູ້ໃຫ້ນັກຮຽນມີຄວາມກະຕືລື້ລົ້ນ ຫ້າວຫັນ ໃນການສຶກສາຄົ້ນຄວ້າຮໍ່າຮຽນ ມີຄວາມສາມັກຄີພາຍໃນ ໃຫ້ແໜ້ນແຟ້ນ, ເອົາໃຈໃສ່ໃນການປະຕິບັດຂໍ້ກຳນົດ ກົດລະບຽບ 7 ລະບອບ 18 ວຽກຂອງກອງທັບ ໃຫ້ມີຄວາມເຂັ້ມງວດເຂັ້ມແຂງ, ປະກອບສ່ວນຢ່າງຕັ້ງໜ້າ ເຂົ້າໃນຂະບວນການຕ່າງໆຂອງກົມກອງ ກໍຄືຂອງໂຮງຮຽນຈັດຂຶ້ນ, ພ້ອມກັນຍົກສູງສະຕິຕໍ່ການຈັດຕັ້ງ ຕ້ານສະກັດກັ້ນປະກົດການຫຍໍ້ທໍ້ຕ່າງໆ ໃຫ້ທັນສະພາບການ, ພ້ອມກັນສ້າງກົມກອງໃຫ້ກາຍ ເປັນກົມກອງປອດໃສ ປອດໄພ ປອດຄະດີ ແລະ ກົມກອງວັດທະນະທຳ ນັກຮົບວັດທະນະທຳ, ພ້ອມກັນນຳເອົາແຜນການໃນຕໍ່ໜ້າ ນຳໄປຈັດຕັ້ງປະຕິບັດໃຫ້ໄດ້ຮັບປະສິດທິຜົນສູງ.

KPL