KPL
ທະນາຄານກາງ ກຳປູເຈຍ (NBC) ໄດ້ອອກປະກາດເຕືອນ ໃຫ້ປະຊາຊົນ ລະມັດລະວັງ ທະນະບັດ ໂດລາສະຫະລັດປອມ ພາຍຫລັງ ກວດພົບເງິນໂດລາ ສະຫະລັດປອມ ໄດ້ໝູນວຽນ ຢູ່ພາຍໃນ ກຳປູເຈຍ.
ຂປລ. ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້ ທະນາຄານກາງ ກຳປູເຈຍ (NBC) ໄດ້ອອກປະກາດເຕືອນ ໃຫ້ປະຊາຊົນ ລະມັດລະວັງ ທະນະບັດ ໂດລາສະຫະລັດປອມ ພາຍຫລັງ ກວດພົບເງິນໂດລາ ສະຫະລັດປອມ ໄດ້ໝູນວຽນ ຢູ່ພາຍໃນ ກຳປູເຈຍ. ໂດຍ ທະນາຄານກຳປູເຈຍ ໄດ້ອະນຸຍາດໃຫ້ ທະນາຄານ ແລະ ສະຖາບັນການເງິນ ຢືດທະນະບັດ ໂດລາສະຫະລັດປອມ ຂອງ ລູກຄ້າ ໂດຍບໍ່ຕ້ອງຈ່າຍ ຄ່າຊົດເຊີຍ ແລະ ສົ່ງຕໍ່ໃຫ້ໜ່ວຍຂ່າວລັບ ຂອງ ສ.ອາເມລິກາ ເພື່ອດຳເນີນການ ສອບສວນ ແນໃສ່ປ້ອງກັນ ການໝູນວຽນ ຂອງ ເງິນໂດລາສະຫະລັດປອມ ແລະ ເປັນຂັ້ນຕອນ ຕາມຄຳຮ້ອງຂໍ ຂອງ ໜ່ວຍຂ່າວລັບ ສ.ອາເມລິກາ.
ໂດຍທ່ານ ຄີໂສ ວັນຣີ ຜູ້ອຳນວຍການໃຫຍ່ ຝ່າຍຮັບຜິດຊອບ ດັ່ງກ່າວ ຂອງ ທະນາຄານກາງ ກຳປູເຈຍ ກ່າວວ່າ: ທະນາຄານກາງ ແລະ ສະຖາບັນການເງິນ ຈຳເປັນຕ້ອງ ເປີດເຜີຍ ຕົວຕົນ ຂອງ ລູກຄ້າ ທີ່ໝູນວຽນເງິນໂດລາສະຫະລັດປອມ ຕໍ່ ທະນາຄານກາງ ກຳປູເຈຍ, ພ້ອມທັງ ປະກາດເຕືອນ ປະຊາຊົນ ເຝົ້າລະວັງ ເປັນພິເສດ ແລະ ກວດກາ ທະນາບັດ ໂດລາສະຫະລັດ ຢ່າງລະອຽດ ກ່ອນຈະຮັບມາ./
KPL
