ຂປລ. ສຳນັກ​ຂ່າວ ຊິນ​ຮວາ​ ຂອງ ສປຈີນ, ວັນທີ 4 ມັງກອນ ທີ່ຜ່ານມາ ອົງການ ​ຕະຫລາດ​ ພະລັງງານ (EMA) ສັງກັດ ​ກະຊວງ​ ການ​ຄ້າ ​ແລະ ອຸດສາຫະກຳ ຂອງ​ ສິງກະ​ໂປ ​ເປີດ​ເຜີຍ​ວ່າ: ສິງກະໂປ ຈະ​ສ້າງ​ໜ່ວຍ​ຜະລິດ​ ກັງ​ຫັນ​ແກັສ ພະລັງງານ ​ຄວາມ​ຮ້ອນ​ຮ່ວມ​ ແຫ່ງ​ໃໝ່ ໂດຍຈະເລີ່ມ​ ​ດຳ​ເນີນ​ງານ ໃນ​ປີ 2029.

​          ໂດຍ ​ທ່ານ ປົວ ກົກຄອງ ປະທານ​ ກຳມະການ​ ບໍລິຫານ ອົງການ ກ່າວ​ວ່າ: ນີ້​ເປັນ​ສິ່ງ​ຈຳ​ເປັນ​ ຕໍ່​ການ​ຜະລິດ​ໄຟຟ້າ​ ເພື່ອໃຫ້​ພຽງພໍ​ ກັບ ​ຄວາມ​ຕ້ອງການ ​ໃນ​ຊີວິດ​ປະຈຳ​ວັນ ​ທີ່​ເພີ່ມ​ຂຶ້ນ​ ຢ່າງ​ຕໍ່​ເນື່ອງ ລວມ​ເຖິງ ​ການ​ປ່ຽນຜ່ານ​ສູ່ ອະນາ​ຄົດ​ພະລັງງານ​ ກາກ​ບອນ​ຕໍ່າ ຂອງ​ ສິງກະ​ໂປ. ຄາດວ່າ ໜ່ວຍ​ຜະລິດ ​ໄຟ​ຟ້າ​ແຫ່ງ​ໃໝ່ ​ຈະ​ມີ​ກຳລັງ ​ການ​ຜະລິດ ຢ່າງ​ໜ້ອຍ 600 ​ເມ​ກະ​ວັດ, ໂດຍແມ່ນ ປາຊີ​ຟິກ​ໄລ ພາວ​ເວີຣ (PacificLight Power) ເປັນບໍລິສັດ​ຜູ້​ຄ້າ​ຍ່ອຍ​ໄຟຟ້າ ​ໃນ​ສິງກະ​ໂປ ທີ່​ກໍ່ສ້າງ​ ຢູ່​ເກາະ ຈູຣົງ ແລະ ມີ​ຄວາມ​ສາມາດ ​ດຳ​ເນີນ​ງານ ​ໂດຍການ ນຳ​ໃຊ້ ​ໄຮ​ໂດຣ​ເຈນ​ ຢ່າງ​ໜ້ອຍ 30% ​ໃນ​ໄລຍະ​ທຳ​ອິດ ​ແລະ ​ໃຊ້​ໄຮ​ໂດຣ​ເຈນ ຄົບ100% ​ໃນ​ອານາ​ຄົດ.

​          ນອກນັ້ນ, ອົງການດັ່ງກ່າວ ຍັງລະບຸວ່າ ຄວາມ​ຕ້ອງການ​ ພະລັງງານ ​ຂອງ ສິງກະ​ໂປ ຈະ​ເພີ່ມ​ຂຶ້ນ ​ຢ່າງ​ຕໍ່​ເນື່ອງ ​ເພາະ​ວ່າ ມີພາກ​ທຸລະ​ກິດ ທີ່​​ໃຊ້​ໄຟ​ຟ້າ​ ເພີ່ມ​ຂຶ້ນ ຢ່າງ​​ຫລວງຫລາຍ ​ເຊັ່ນ: ການ​ຜະລິດ​ຂັ້ນ​ສູງ, ​ເສດຖະກິດ ດິຈີ​ຕອນ ​ແລະ ການ​ຫັນ​ມາ​ນຳໃຊ້ ພະລັງງານ ​ໄຟຟ້າ ​ຂອງ​ ລະບົບ​ຂົນ​ສົ່ງ, ຄາດວ່າ ​ຄວາມ​ຕ້ອງການ​ ໄຟຟ້າ ຈະເພີ່ມຂຶ້ນ​ສູງ​ສຸດ​, ສິງກະ​ໂປ ມີ​ທ່າ​ອ່ຽງ​ເຕີບ​ໂຕ ດ້ວຍ​ອັດຕາ​ ການ​ເຕີບ​ໂຕ ຕໍ່​ປີ​  3,7 - 5,7% ​ໃນ​ໄລຍະ 6 ປີ​ຕໍ່ໜ້າ​ ຢູ່​ທີ 10,1 - 11,8 ກິ​ກາ​ວັດ​ ໃນ​ປີ 2030./

KPL