KPL
ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດພິທີ ມອບ-ຮັບ ໂຄງການກໍ່ສ້າງ ແລະ ເປີດນ້ຳໃຊ້ ເຮືອນນອນໂສດ ພະນັກງານຄູອາຈານ ວັນທີ 25 ທັນວາ 2024
ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ຈັດພິທີ ມອບ-ຮັບ ໂຄງການກໍ່ສ້າງ ແລະ ເປີດນ້ຳໃຊ້ ເຮືອນນອນໂສດ ພະນັກງານຄູອາຈານ ວັນທີ 25 ທັນວາ 2024 ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ພູມີ ດາລາເພັດ ຮອງຫົວໜ້າກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາໂຮງຮຽນ, ພະນັກງານ ບໍລິສັດ, ອະນຸກຳມະການ ແລະ ວິຊາການທີ່ກ່ຽວ ຂ້ອງ ເຂົ້າຮ່ວມ.
ໂຄງການກໍ່ສ້າງເຮືອນນອນໂສດ ພະນັກງານ ຄູອາຈານ ຂອງໂຮງຮຽນວັດທະນະທຳຊົນເຜົ່າກອງ ທັບ ແມ່ນທຶນຂອງກະຊວງປ້ອງກັນປະເທດ ໄດ້ເລີ່ມລົງມືກໍ່ສ້າງ ແຕ່ວັນທີ 01 ມັງກອນ 2024 ມາຮອດ ວັນທີ 01 ທັນວາ 2024 ແມ່ນສຳເລັດຕາມການກຳນົດເວລາ 12 ເດືອນ ໂດຍແມ່ນ ບໍລິສັດ ສົມຫວັງ ຈະເລີນ ກໍ່ສ້າງ-ຂົວທາງ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ລວມມູນຄ່າທັງໝົດ 8,8 ຕື້ກວ່າກີບ. ຈາກນັ້ນ ກໍໄດ້ເຊັນບົດບັນທຶກມອບຮັບຢ່າງເປັນທາງການ ລະຫວ່າງ ທ່ານ ສົມຫວັງ ປະທານ ບໍລິສັດ ສົມຫວັງ ຈະເລີນ ກໍ່ສ້າງ-ຂົວທາງ ຈຳກັດຜູ້ດຽວ ແລະ ສະຫາຍ ພັນເອກ ເພັດສະໝອນ ວິລະວອນ ຫົວໜ້າການທະຫານ ໂຮງຮຽນວັດທະນະທຳຊົນເຜົ່າກອງທັບ.
ໂອກາດນີ້, ສະຫາຍ ພົນຈັດຕະວາ ພູມີ ດາລາເພັດ ກໍ່ໄດ້ສະແດງຄວາມຂອບໃຈມາຍັງ ບໍລິສັດ ສົມຫວັງ ຈະເລີນ ກໍ່ສ້າງ-ຂົວທາງ ຈຳກັດຜູ້ດຽວ ທີ່ໄດ້ເອົາໃຈໃສ່ທຸ້ມເທກຳລັງ ແລະ ສະຕິປັນຍາເຂົ້າໃນການກໍ່ສ້າງ, ພ້ອມທັງຮຽກຮ້ອງໃຫ້ ຄະນະພັກ-ຄະນະບັນຊາໂຮງຮຽນ ຈົ່ງເອົາໃຈໃສ່ສຶກສາອົບຮົມໃຫ້ ພະນັກງານ-ນັກຮົບ-ຄູອາຈານ ຢູ່ໃນກົມກອງຈົ່ງຊ່ວຍກັນ ປົກປັກຮັກສາອາຄານ, ລະບົບໄຟຟ້າ, ນໍ້າປະ ປາ ຕະຫລອດຮອດ ອຸປະກອນຕ່າງໆ ທີ່ໄດ້ປະກອບຢູ່ໃນອາຄານໃຫ້ສາມາດນໍາໃຊ້ໄດ້ຍາວນານ.
ຂ່າວ: ໂອລິນ ມິ່ງມີໄຊ
KPL
