*ຄອບຄົວນາງ ແດງ ແລະ ທ່ານຫອມ  ປະຊາຊົນ ບ້ານນາຊຽງດີ ເມືອງຮຸນ ແຂວງອຸດົມໄຊ ຍິ້ມດ້ວຍຄວາມດີໃຈທີ່ຊີວິດການເປັນຢູ່ດີຂຶ້ນເທື່ອລະກ້າວ  ຍ້ອນໄດ້ຮັບການຊ່ວຍເຫລືອຈາກອົງການອາຫານໂລກ ໃນການຊຸກຍູ້ສົ່ງເສີມປະຊາຊົນປູກຝັງ-ລ້ຽງສັດ ໃຫ້ຫລາຍຈົນກາຍເປັນສິນຄ້າ ເພື່ອສ້າງລາຍຮັບເຂົ້າຄອບຄົວ ແລະ ປະກອບສ່ວນເຂົ້າໃນໂຄງການອາຫານທ່ຽງ 30 ເປີເຊັນ ຂອງຜົນຜະລິດ. 

    ທ່ານ ຫອມ ແກ້ວປະເສີດ ອາຊີບຊາວກະສິກອນຢູ່ບ້ານນາຊຽງດີ ເມືອງຮຸນ ແຂວງອຸດົມໄຊ ໜ່ຶງໃນຄອບຄົວທີ່ໄດ້ຮັບການຊ່ວຍເຫລືອຈາກອົງການອາຫານໂລກ ໄດ້ໃຫ້ສຳພາດຕໍ່ນັກຂ່າວເມື່ອບໍ່ດົນມານີ້ວ່າ: ໄລຍະຜ່ານມາຄອບຄົວຂອງຕົນໄດ້ຮັບອຸປະກອນສ້າງເຮືອນຮົ່ມຈາກການຊ່ວຍເຫລືອຂອງໂຄງການພັດທະນາຊົນນະບົດ ໂດຍສົ່ງເສີມໃຫ້ປູກຜັກໃນເຮືອນຮົ່ມ, ຕໍ່ມາໄດ້ຮັບທຶນຊ່ວຍເຫລືອຈາກອົງການອາຫານໂລກ 1.600.000 ກີບຕື່ມອີກ ເພ່ືອສ້າງເຮືອນຮົ່ມປູກພືດຜັກ ພາຍຫລັງໄດ້ຮັບໂຄງການແລ້ວກໍເລີ່ມປູກຜັກ, ພາຍໃນ 3 ປີ  ເຫັນວ່າການປູກຜັກໃນເຮືອນຮົ່ມມີຜົນດີຫລາຍຢ່າງເປັນຕົ້ນແມ່ນສາມາດປູກຜັກໄດ້ທຸກລະດູ ສ້າງລາຍຮັບເຂົ້າຄອບຄົວໄດ້ປະມານ 3 ລ້ານ ກີບຕໍ່ເດືອນ, ສ່ວນບ່ອນຈຳໜ່າຍແມ່ນຂາຍພາຍໃນບ້ານເຫັນວ່າຍັງບໍ່ສາມາດຕອບສະໜອງພຽງພໍ ກັບຄວາມຕ້ອງການຂອງຜູ້ບໍລິໂພກໄດ້ເທື່ອ, ດ່ັງນັ້ນຈຶ່ງມີແນວຄິດຢາກຂະຫຍາຍຕື່ມອີກ, ພໍດີໃນໄລຍະກາງປີນີ້ໂຄງການອາຫານໂລກ ໄດ້ນຳເອົາທຶນການສ້າງເຮືອນຮົ່ມໃຫ້ຕື່ມອີກ, ໃນນັ້ນ ຕົນເອງໄດ້ຮັບເອົາອີກ 2 ຫລັງ ເພື່ອຂະຫຍາຍຜົນລະປູກ, ນັບແຕ່ນັ້ນມາໄດ້ເຮັດໃຫ້ຄອບຄົວມີລາຍຮັບຈາກການຂາຍຜັກເພ່ີມຂຶ້ນຕື່ມ.

    ນາງ ແດງ ແກ້ວປະເສີດ ເຊິ່ງເປັນ ຄອບຄົວດຽວກັນກັບ ທ່ານ ຫອມ ແກ້ວປະເສີດ ກໍໄດ້ຮັບໂຄງການຊ່ວຍເຫລືອຈາກອົງການອາຫານໂລກ ໃນການສົ່ງເສີມແມ່ຍິງ ເຊິ່ງນາງ ແດງ ໄດ້ເລ່ົາສູ່ຟັງວ່າ: ຕົນເອງດີໃຈຫລາຍທີ່ໄດ້ຮັບໂຄງການຊ່ວຍເຫລືອດັ່ງກ່າວ, ເພາະເປັນໂຄງການທີ່ສົ່ງເສີມການປູກການລ້ຽງ ໃຫ້ປະຊາຊົນພາຍໃນບ້ານເວົ້າລວມ, ເວົ້າສະເພາະແມ່ນຄອບຄົວຂອງຕົນເອງທີ່ມີລາຍໄດ້ຈາກການປູກຜັກຂາຍ, ອີກຢ່າງໜຶ່ງຕົນເອງກໍເປັນຄົນມັກດ້ານກະສິກຳຢູ່ແລ້ວ ແຕ່ລະປີກໍໄດ້ປູກເພື່ອບໍລິໂພກພາຍໃນຄອບ ຄົວແຕ່ບໍ່ໄດ້ປູກເປັນສິນຄ້າ, ໃນເບື້ອງຕົ້ນໂຄງການໄດ້ສ້າງເຮືອນຮົ່ມ ແລະ ສະໜອງອຸປະກອນເຮັດສວນໃຫ້, ພາຍຫລັງທີ່ໄດ້ຮັບໂຄງການແລ້ວສາມາດປູກພືດຜັກໄດ້ທຸກລະດູການ ເຊິ່ງພາຍໃນສວນແມ່ນປູກພືດໝູນວຽນເຊັ່ນ: ປູກໝາກເຂືອ, ໝາກເຜັດ, ໝາກຖົ່ວ, ກະຫລໍ່າປີ, ຜັກກາດ, ຜັກສະຫລັດ, ຫອມຕ່າງໆປູກໄດ້ຫລາຍກາຍສິນ ຄ້າທີ່ສ້າງລາຍຮັບເຂົ້າສູ່ຄອບຄົວ ເຮັດໃຫ້ເສດຖະກິດຄອບຄົວດີຂຶ້ນ ເລື້ອຍໆ, ພາຍຫລັງຜະລິດໄດ້ແລ້ວ ກໍນຳມາຈຳໜ່າຍພາຍໃນບ້ານສ້າງ ລາຍຮັບໄດ້ປີໜຶ່ງຫລາຍລ້ານກີບ. ນອກຈາກນີ້ກໍໄດ້ປະກອບສ່ວນເຂົ້າ ໃນໂຄງການອາຫານທ່ຽງໃນໂຮງ ຮຽນ 30 ເປີເຊັນ ຂອງຜົນຜະລິດ ໃນສ່ວນສະເລ່ຍປີໜຶ່ງ ປະມານ 30- 40 ກິໂລ, ສຳລັບການປະກອບສ່ວນ ເຂົ້າໃນໂຄງການອາຫານທ່ຽງເປັນ ຄວາມພາກພູມໃຈອີກຢ່າງໜຶ່ງ ເພາະລູກຫລານໄດ້ກິນອີ່ມ ກິນອາ ຫານທີ່ມີປະໂຫຍດຕໍ່ຮ່າງກາຍ ແລະ ຍັງເປັນການສ້າງໃຫ້ໂຄງການອາ ຫານທ່ຽງໃນໂຮງຮຽນມີຄວາມຍືນ ຍົງອີກດ້ວຍ.

ໂດຍ: ມາລີດາ

KPL