*ບັນຫາໃຫຍ່ສຳລັບພໍ່ແມ່ຫລາຍໆທ່ານທີ່ຍັງບໍ່ຮູ້ວິທີເຊັດໂຕໃຫ້ກັບລູກ ​ໃນ​ເວລາ​ທີ​ລູກ​ເປັນ​ໄຂ້ຄີງຮ້ອນ  ດັ່ງນັ້ນ ມື້ນີ້ຄໍ​ລໍາ​ ສຶກສາ​ຫາ​ຄວາມ​ຮູ້ ຈະ​ພາ​ບັນດາ​ທ່ານມາ​ຮູ້ຈັກວິທີການເຊັດໂຕໃຫ້ກັບເດັກນ້ອຍທີ່ຖືກຕ້ອງຄວນເຮັດແນວໃດ ​ເນື່ອງ​ຈາກວ່າຂັ້ນ​ຕອນ​ນີ້ ມີ​ຄວາມ​ສໍາຄັນ​ຫລາຍ ​ເພາະ​ເປັນ​ວີ​ທີ​ການ​ປົວ​ເບື້ອງ​ຕົ້ນ ​ເພື່ອ​ບໍ່​ໃຫ້​ໄຂ້​ຂຶ້ນ​ສູງ​ຈົນ​ເກີດ​ອັນ​ຕະຫລາຍຕໍ່​ເດັກນ້ອຍ.

   ສໍາລັບການເຊັດໂຕ ​ເພື່ອຫລຸດໄຂ້ໃນເດັກທີ່ ອາຍຸ 6 ເດືອນ ຫາ 5 ປີ ຄວນເຮັດໃຫ້ຖືກວິທີ ເນື່ອງຈາກເດັກນ້ອຍມີໂອກາດຊັກ ຈາກພາວະໄຂ້ຂຶ້ນສູງໄດ້ ໂດຍອຸນຫະພູມປົົກກະຕິຂອງຮ່າງກາຍ ຄື 36,5-37,5 °c , ພາວະໄຂ້ຕ່ຳ ຄືພາວະທີ່ອຸນຫະພູມຢູ່ລະຫວ່າງ 37.6-38.4 °c, ພາວະໄຂ້ສູງຄືພາວະທີ່ອຸນຫະພູມ 38.5 °c ຂຶ້ນໄປ. ສະ​ນັ້ນ, ຂໍ້ແນະນຳໃນການເຊັດໂຕເດັກນ້ອຍ :

1. ໃຊ້ນ້ຳອຸ່ນ ຫລື  ນ້ຳທຳມະດາເຊັດໂຕ "ບໍ່ຄວນໃຊ້ນ້ຳເຢັນເຊັດ", 

2. ມອດພັດລົມ ຫລື  ແອ ເພື່ອບໍ່ໃຫ້ເດັກໜາວສັ່ນ.

3. ໃຊ້ແພຂົນໜູຜືນນ້ອຍຈຸບນ້ຳໃຫ້ຊຸ່ມ ເຊັດບໍລິເວນໜ້າ, ລຳໂຕດ້ານໜ້າ ແລະ ດ້ານຫລັງ, ແຂນ, ຂາ.

4. ໃຫ້ເຊັດໂຕຈາກປາຍມື ປາຍຕີນ ເຂົ້າຫາລຳໂຕເພື່ອລະບາຍຄວາມຮ້ອນ.

5. ເວລາເຊັດໂຕໃຫ້ອອກແຮງຄືກັບຖູໂຕ.

6. ໝັ່ນປ່ຽນຜ້າຈຸບນ້ຳດຸໆ

7. ວາງແພໄວ້ບໍລິເວນໜ້າຜາກ-ຫົວ, ບ່ອນພັບຄໍ, ຂີ່ແຮ້ ແລະ ແອບແອ້ຂາ 

8. ຄວນເຊັດໂຕປະມານ 10-15 ນາທີ 

9. ຫລັງຈາກເຊັດໂຕ ຄວນ​ເຊັ​ດໂຕເດັກນ້ອຍໃຫ້ແຫ້ງ ແລະ ນຸ່ງເຄື່ອງທີ່ເບົາສະບາຍໃຫ້

10. ແທກໄຂ້ຄືນອີກ 15-30 ນາທີຕໍ່ມາ ຖ້າໄຂ້ລົງສະແດງວ່າການເຊັດໂຕໄດ້ຜົນ ແຕ່ຖ້າຫາກໄຂ້ບໍ່ລົງຄວນເຊັດໂຕໃໝ່ອີກ. 

11. ຖ້າເຊັດໂຕຊ້ຳແລ້ວໄຂ້ຍັງບໍ່ລົງ ຄວນຟ້າວພາລູກໄປພົບແພດ.

   ຂໍ້ຄວນລະວັງໃນການເຊັດໂຕເດັກ ຫາກເດັກມີອາການໜາວສັ່ນຄວນຫຍຸດເຊັດໂຕທັນທີ ແລະ ຫາກອາການຍັງບໍ່ດີຂຶ້ນ ຄວນຮີບພາລູກໄປໂຮງໝໍ.

ໂດຍ: ມາລີດາ

KPL