KPL
ຫວຽດເທລ ( Viettel) ຈະສະໜອງ ສະຖານີ ກະຈາຍ ອິນເຕີເນັດ 4G ແລະ 5G ໃຫ້ຄູ່ຮ່ວມມື High Cloud Technologies. ນີ້ແມ່ນ ໂຄງການ ໂທລະຄົມ ມະນາຄົມ ໃຫຍ່ທຳອິດ ຂອງ Viettel ຢູ່ພາກພື້ນຕາເວັນອອກກາງ.
ຂປລ.ວິທະຍຸ ກະຈາຍສຽງ ຫວຽດນາມ, ຫວຽດເທລ ( Viettel) ຈະສະໜອງ ສະຖານີ ກະຈາຍ ອິນເຕີເນັດ 4G ແລະ 5G ໃຫ້ຄູ່ຮ່ວມມື High Cloud Technologies. ນີ້ແມ່ນ ໂຄງການ ໂທລະຄົມ ມະນາຄົມ ໃຫຍ່ທຳອິດ ຂອງ Viettel ຢູ່ພາກພື້ນຕາເວັນອອກກາງ.ສັນຍາ ທີ່ມີມູນຄ່າ ຫລາຍກວ່າ 1 ລ້ານໂດລາ ສະຫະລັດ ສະໜອງ ລະບົບ ອິນເຕີເນັດ 5G ໃຫ້ແກ່ ຕະຫລາດຕາເວັນອອກກາງ ໂດຍກຸ່ມບໍລິສັດ ອຸດສາຫະກຳ ເຕັກໂນໂລຢີສູງ Viettel (Viettel High Tech) ລົງນາມ ກັບບໍລິສັດ High Cloud Technologies (ຂອງ UAE - ສະຫະລັດ ເອເມເຣັດ ອາຣັບ) ໄດ້ດຳເນີນໃນງານວາງສະແດງ ການປ້ອງກັນຊາດ ສາກົນ ຫວຽດນາມ ປີ 2024 (ແຕ່ວັນທີ 19 – 22 ທັນວາ), ຢູ່ຮ່າໂນ້ຍ. ຕາມຜູ້ຕາງໜ້າ UAE ແລ້ວ, ບັນດາຜະລິດຕະພັນຂອງ Viettel ໄດ້ຮັບການຕີລາຄາສູງ ກ່ຽວກັບ ຄຸນນະພາບ ແລະ ລາຄາແກ້ງແຍ້ງ ເມື່ອທຽບໃສ່ ບັນດາບໍລິສັດອື່ນໆ, ຈະຊ່ວຍເປີດກວ້າງ ຂອບເຂດ ການກະຈາຍສັນຍານ ໂທລະຄົມ ມະນາຄົມຢູ່ ສະຫະລັດ ເອເມເຣັດ ອາຣັບ ແລະ ເຂດອື່ນໆ ຢູ່ຕາເວັນອອກກາງ, ພິເສດແມ່ນບັນດາເຂດຊານເມືອງ ແລະ ຊົນນະບົດ. ສິ່ງດັ່ງກ່າວ ໄດ້ນຳມາເຊິ່ງຜົນປະໂຫຍດອັນໃຫຍ່ຫລວງ ໃນການຍົກສູງ ການສຶກສາ ແລະ ປົວແປງຊີວິດສັງຄົມຢູ່ ຂອງປະຊາຊົນໃຫ້ດີຂຶ້ນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
